ИАКО СЕЗОНАТА ПОЧНА ВО ПОБЕДНИЧКИ СТИЛ ЗА ФЕРСТАПЕН И РЕД БУЛ, МЕКЛАРЕН УСПЕА ДА ГО СВРТИ ВНИМАНИЕТО СО УНАПРЕДУВАЊЕ НА ПЕРФОРМАНСИТЕ ОВАА ПРОЛЕТ, НО ИЗБЛИЦИТЕ НА ПЕРФОРМАНСИ ВО ФЕРАРИ ОСТАНАА МИСТЕРИЈА ПРВАТА ПОБЕДА СЕЗОНАВА ЈА ИМАА НА НАЈБАВНАТА ТРКА ВО МОНАКО, А ВТОРАТА ДОЈДЕ НА НАЈБРЗАТА ТРКА ВО МОНЦА
Продолжувањето на сезоната во Формула 1 започна во холандскиот Зандворт, каде што публиката се надеваше на враќање на перформансите кај Ферстапен и Ред Бул, но несопирливиот тренд на промени покажа дека Ландо Норис и Мекларен се побрзи. Оскар Пјастри ко,ј исто така, забележа победа во Унгарија на оваа трка играше споредна улога, финиширајќи четврти, зад Ферстапен и Леклер.
Но, ако прогнозите за Монца можеа да бидат повлијателни, веројатно поголеми шанси ќе требаше да се дадат на Луис Хамилтон и Мерцедес, бидејќи нивните победи оваа година беа остварени на брзи „олд-скул“ патеки како Силверстоун и Спа Франкоршамп. И навистина, Мерцедес беше во „топ 6“ заедно со Мекларен и Ферари, додека Ферстапен имаше само седми резултат во квалификациите кои го понесоа епитетот на најизедначени оваа сезона. Причината за тоа е дека токму првата шесторка имаше резултати во третата сесија набиени во интервал од две десеттинки: Норис ја освои пол позицијата со 1:19.327, додека шестиот Хамилтон имаше резултат од 1:19.513.
Како што често знае да се случи, брзината во еден круг и брзината во трка се различни параметри, па овој поредок несомнено беше предодреден за да биде сменет. Првенствено, агресивното возење и мотивација да остане во борба за титулата очекувано го доведоа Макс Ферстапен во позиција да напаѓа, што тој успешно го правеше од самиот старт. Но, не беше единствен, затоа што Пјастри прв го престигна Норис, а поради тоа шанса доби и Леклер, кој успешно ја искористи. Наспроти ова, Расел најмногу загуби при стартот и – „картите се измешаа“.
Од стабилизацијата по стартот преку извршување на стратегијата се дојде и до конечната разврска, но слично како во Спа, повторно се случи стратегијата со помалку застанувања да биде во пракса помоќна од возењето со свежи гуми. Ферари во соопштението по трката нагласи дека „одлуката да се користи помала аеродинамична потисна сила била исправна, бидејќи им дозволила на возачите да ги искористат силните точки на болидот, а една од нив е токму таа што е „нежен“ по прашање на пневматиците“. Оттука, учинокот на Леклер беше оценет како одличен при справувањето со пневматиците, па затоа и успеа со тврдите гуми да издржи 37 од 53 круга во трката. Саинц беше на чекор да ја комплетира „еден-два“ победата, но во финишот беше престигнат од Пјастри и Норис.
Неверојатно чувство! Првпат победив во Монца во 2019 година и тоа беше мошне емотивен момент за мене и за целиот тим. Не очекував дека и оваа победа ќе биде таква, но ете ги повторно истите чувства. Да се гледа прославата на навивачите заедно со нас е неверојатно нешто, среќен сум што можевме да се радуваме и втор пат. Голема благодарност до сите во тимот, имавме перфектна стратегија и ги победивме нашите ривали. Ќе дадеме сè од себе за да го зачуваме овој моментум до крајот на сезоната, користејќи ја секоја шанса што ќе ни се укаже,- рече победникот Шарл Леклер по трката.
Ова е мега резултат и вистински поттик за нашата самодоверба! Имавме одлична трка во која Шарл извози неверојатно добро и навистина мислам дека заслужено сме победници. Бевме разочарани по пласманот во квалификациите, бидејќи знаевме дека можеме подобро. Од почетокот на сезоната, имаме подобра брзина во трка отколку во квалификациите, а тоа беше случај и денес. Минатата година справувањето со пневматиците беше наша најголема слабост, но сега е предност која ја должиме на новиот болид. И на претходната трка во Зандворт имавме увид дека нашата брзина е константна, а на оваа верувавме дека ќе мора два пати да одиме во бокс, но абењето на гумите беше толку ниско и ја приспособивме стратегијата. Некогаш мора да се преземе ризик, а денеска тоа даде резултат. Работевме тимски и знаевме дека Саинц ќе ни биде од помош ако ја имаме истата стратегија, а дополнително беше важно да се имаат две мислења за состојбата на пневматиците,- објасни тимскиот шеф на Ферари, Фредерик Васер. На крајот, во борбата за титулата најмногу ќе има влијание тоа што Ферстапен не успеа во финишот да направи повеќе од шестото место, но фактот дека Леклер и Пјастри му земаа драгоцени бодови на неговиот прв ривал Ландо Норис, засега го остава со мирен сон. Холанѓанецот останува лидер во поредокот со 303 поени, додека Норис има 241, а Леклер сега е трет со 217 бода. Пјастри има 197 и се чини дека е далеку од шансата да направи пресврт, па ќе треба да се согледа одлуката на Мекларен, кој веќе од следната трка ќе мора да размислува дали Норис треба да биде нивниот единствен шампионски кандидат или не?
Благодарение на освоените 37 поени, меѓу кои оние 25 за нивната 246 победа во историјата, Ферари се врати во игра за титулатата кај конструкторите. Ред Бул сега има 446 бода, Мекларен е втор со 438, додека Ферари е трет со 407 поени. До крајот на сезоната има уште осум трки, а следни на програмата во септември се оние во Азербејџан и Сингапур.
ТОП НОВОСТИ
