ПО ПЕТГОДИШНО ОТСУСТВО ЖЕНЕВА ПОВТОРНО Е ВО ИГРА. ГОДИНАВА ПО 91. ПАТ ЌЕ СЕ ОРГАНИЗИРА СОБИР НА НАЈНОВОТО ОД АВТОМОБИЛСКАТА ИНДУСТРИЈА, А ЗА ПРВПАТ ИЗЛОЖБАТА БИЛА ОТВОРЕНА ВО ДАЛЕЧНАТА 1905 ГОДИНА. ОВОЈ САЕМ НА „ЧЕТИРИТЕ ТРКАЛА“ БЕШЕ ЈАГОДАТА ОДОЗГОРА НА КРЕМОТ, НО ДЕНЕС Е ДАЛЕКУ ОД ТАА СЛИКА
Тешко време за саемските манифестации на кои автомобилите ја имаат главната улога. Изложувачите, односно производителите како да немаат желба да бидат присутни под рефлекторите и пред будните очи на новинарите и публиката. А до пред само неколку години не беше така. Сите бараа место повеќе, квадрат површина повеќе и сите сакаа да бидат на местата каде најмногу врви публиката. Потоа постоеше натпревар помеѓу изложувачите кој ќе направи позанимлив штанд. Тука доаѓаа до израз досетливите дизајнери за уредување внатрешен простор – игра на сенки со светло и со бои. Воопшто, саемските манифестации се собир на производители од цел свет и сега секој од нив сака да се претстави во што поубаво светло и затоа своевидниот натпревар е неизбежен. Практично тој натпревар не постои, саемот не организира нешто такво меѓу учесниците, но сепак е присутен сам по себе, се чувствува неговото присуство во воздухот. Има некој порив меѓу изложувачите да бидат подобри од останатите со штандовите и секако да внесат некаква досетка при претставувањето автомобилите која дотогаш не била видена. И сето тоа го прават за да бидат единствени, посебни, да се разликуваат од останатите.
Претходно спомнато постоело околу еден век, деценија – две, плус – минус, колку што од прилика постојат саемските манифестации и сега одеднаш ретко кој е заинтересиран за одење на саем. Првите симптоми на отсуство се појавија некаде на крајот од минатиот век кога автомобилската индустрија имаше некаков пад, а самите тие велеа дека падот бил голем. Го паметите времето кога трите сопствениците на американските гиганти Форд, Џенерал Моторс и Крајслер разговараа со тогашниот претседател Џорџ Буш за да добијат државна помош? Тогашната криза во автомобилската индустрија ја имаше насекаде не само во американската. Од тоа време наваму почна отсуството од најголемите саемски манифестации: Детроит, Женева, Париз / Франкфурт, Пекинг / Шангај и Токио, а да не зборуваме за регионалните саемски настани.
Од саем на саем, бројот на отсутните се зголемуваше, а крајниот крах се случи кога на планетава завладеа вирусот. Поради претходните причини саемот во Женева беше откажуван пет години по ред, 2019, 2020 2021, 2022 и 2023. Минатата година организаторот најави отворање на саемските врати во 2024 год. Организаторот ја покани сета автомобилска индустрија, но се одзваа само неколку од нив, што е катастрофа со оглед на тоа што Женева беше светски врв меѓу саемите. БЈД, Дачија, Исузу, Кимера Автомобили, Луцид, МГ Мотор, Микролино, Пининфарина, Рено и Тотем Автомобили. Десет на број – тоа се производителите кои ќе изложуваат во Женева. Покрај нив ќе бидат присутни уште дваесетина – триесет изложувачи од пропратната индустрија и тоа е сѐ. Ете на какви гранки спадна Салонот за автомобили во Женева, а беше најголем меѓу најголемите, најпрестижен, кремот меѓу големата петорка од саеми.
Вратите на халите од Палекспо ќе бидат отворени за автомобилите и пропратната индустрија на 26 февруари за кога е закажана средбата со новинарите, 27 февруари е вип ден, нешто слично со новинарскиот, но зачинет со малку забава, а за посетителите изложбата ќе биде отворена од 28 февруари до 3 март. Билетот чини 16 франци за возрасни и девет франци за деца на возраст од 6 до 16 год. а за тие што ќе дојдат по 16:00 влезницата чини 8 франци. Одделот посветен на деца од две до шест години е бесплатен во првиот час, а потоа наплатуваат по 6 франци за секој изминат час. Кога веќе сме кај цените на влезниците, некаде се спомнува цена од 25 франци за возрасни и 18 за деца и студенти, а 20 за организирани посети со над 10 лица.
Сѐ на сѐ, осум денови Салон за автомобили Женева 2024, а во добрите стари времиња кога имавме изложба на автомобили во сега веќе исчезнатиот Скопски Саем, „автоманијата“ траеше 10 денови, а некои години и над 10. И тоа е некаков успех, нашиот саем траел повеќе денови од тој во Женева.
ТОП НОВОСТИ
