ТОЛКУ МНОГУ ГИ ИМА ШТО Е НЕВОЗМОЖНО ДА СЕ СОБЕРАТ НА ЕДНА ИЗЛОЖБА. НАЈНОВИТЕ ПОДАТОЦИ ВЕЛАТ ДЕКА ВО КИНА ИМА ПОМЕЃУ 140 И 150 МАРКИ НА АВТОМОБИЛИ. ЗАСЕГА НЕ Е ПОЗНАТО КОЛКУ ОД НИВ ЌЕ ИЗЛОЖУВААТ, А ИСТОТО ВАЖИ И ЗА СТРАНСКИТЕ МАРКИ. ОВОЈ ПАТ САЕМСКОТО МОТО Е „НОВА ЕРА НОВИ АВТОМОБИЛИ“
Големата петорка од автомобилската индустрија полека почна да се ситни, Женева помина и сега на ред е Пекинг. Овој саем за првпат е организиран во 1990 год. и се одржува секоја втора година. Досега саемот 17 пати ги отворал вратите за изложувачите и посетителите, а годинава ќе ги отвори по 18. пат. Специфично е тоа што на почетокот странските изложувачи речиси и да ги немаше, но како одминуваа годините нив ги имаше сѐ повеќе и повеќе. И тогаш и сега главни беа кинеските производители, а како нема да бидат кога се на домашен терен.
Според најновите статистички податоци денес во Кина постојат 140 активни марки на автомобили од кои 97 се домашни, а 43 се со заеднички вложувања од странски компании со кинески. И сега доаѓаме до следново, ако секој од производителите изложи по три модели, на саемот ќе има собир од 420 автомобили. А каде се странските изложувачи? На секој автомобил да посветите по 30 секунди, вам ќе ви требаат 210 минути или три часа и 30 минути да ги видите сите. Сепак за некои автомобили ќе ви бидат потребни повеќе од 30 секунди да ги разгледате, така што и тие 210 минути ќе ви бидат малку, односно ќе се сторат 420 или седум часа. Сега можете да си замислите која гужва ќе биде за време на изложбата која ќе се одржи од 25 април до 4 мај, а ќе бидат прикажани: концепти, потоа патнички возила, возила за посебна намена, на пример пожарникарски, чистачи на снег, собирачи на отпад итн. На други штандови ќе се објаснува производствениот процес, на други ќе се дискутира за дизајнот, а на трети ќе се објаснува употребата на високата технологија и компјутерите во оваа индустрија, ќе биде изложена најнова опрема за изработка на автомобили заедно со најновите материјали, а ќе има и штандови на кои ќе биде објаснето како и на кој начин се заштитува животната средина при производниот процес. За тие што сакаат што подобро да го одржуваат и сервисираат возилото, за нив ќе има совети од врвни конструктори.
Како и на минатите изданија, така и на ова (18-то), се очекува домашните изложувачи да бидат најбројни. Ќе биде интересно да се види списокот на странските изложувачи и истиот да се спореди со тој од саемот што неодамна заврши во Женава на кој имаше само 11.
ТОП НОВОСТИ
