Најчесто пишуваме за автомобилите од континентов, потоа за тие американските и задолжително за тие од Далечниот Исток, но најретко се застапени автомобилите од јужната хемисфера на планетава. Ова е миг што не смее да се пропушти бидејќи оттаму пристигна убава вест. На крајот од минатиот месец во Бразил беше претставен сосема нова марка Лекар и сосема нов модел „459 хибрид“. Воедно тоа е и најмладата, најновата автомобилска марка на светот.
Во името на моделот го има зборот „хибрид“ што значи мотор со внатрешно согорување и електромотор. Ото моторот е со три цилиндри и зафатнина од 1,0 литри, позајмен од производителот Хорс кој во светот има дури осум фабрики и годишно произведува по 3,2 милиони погонски единици, бензински, хибридни, хибридни со приклучок, менувачи и батерии. Оваа компанија со вкупно 9.000 вработени, е основана со заеднички вложувања на Гили, Рено и Арамко. Со цел резервоар гориво „459 хибрид“ ќе изминува 1.000 км плус 100 км од електричниот мотор и истиот може да се полни на обична електро мрежа. Вкупната силина на хибридниот погон брои 163 КС способни за 10,9 сек од 0 до 100 км/ч.
„Лекар 459 хибрид“ должински располага со 4,35 м, тежок е скромни 1,4 тони, но можеле да бидат и поубедливи, додека растојанието меѓу оските брои 2,7 м. Според првичните најави, „сув“ возилото има товарен простор од 530 л.
Ова се само компјутерски фотографии, а кога возилото ќе биде за првпат претставено пред светската јавност, дополнително ќе информираме. Производителот најавува појавување на „лекар 459 хибрид“ во 2026 год.
ТОП НОВОСТИ
