ЗИМСКИОТ ПЕРИОД СО СЕБЕ НОСИ НЕ ТОЛКУ ЧИСТИ КОЛОВОЗИ И ЗАТОА ТРЕБА МАКСИМАЛНО ДА БИДЕТЕ КОНЦЕНТРИРАНИ ДОДЕКА ВОЗИТЕ, ЗАТОА ШТО НЕ ЗНАЕТЕ ШТО ВЕ ЧЕКА ВО СЛЕДНИОТ СВИОК, ДАЛИ ВОДА КАЛ, МАГЛА, СНЕГ ИЛИ МРАЗ. И СЕКАКО, НЕ ЗАБОРАВАЈТЕ ГИ ЗИМСКИТЕ ПНЕВМАТИЦИ И СИНЏИРИТЕ ЗА НА СНЕГ.
Дали сте подготвени за зимава? Прашањево е на место и многу интересно, нели!? Не се сомневам во вас, сигурно сте подготвени за студот и снегот кои веќе се присутни. Сега следи уште едно прашање, а тоа е дали вие во комбинација со вашите миленици на четири тркала сте подготвени да се соочите со зимата?
Автомобилот е сериозна направа и штета е да не биде соодветно подготвен за студениот период од годината. Со неподготвен автомобил шансите да направите „беља“ се многу поголеми. Ниски температури, лизгав коловоз, што од дожд, што од лапавица и снег и кога сето тоа ќе се измеша со прашината, земјата и песокот присутни на асфалтот, добиваме супер лизгава површина. Не е работата од готово да правите вересија, туку безбедно да се чувствувате во секој момент од возењето.
Првиот чекор кон безбедноста е летните пневматици да ги замените со зимски. Зошто? Затоа што летните, самото име кажува, се наменети за користење во топлиот период од годината и затоа што смесата од која се направени, не ги менува својствата сè до температура од +7 степени С, а на пониски од оваа својствата се губат, материјалот станува крут, а контактот со подлогата значително е ослабнат. И на сето тоа сега ќе ги додадеме плитките шари заедно со влажниот коловоз и сè друго што е на него.
Зимските пневматици се направени од друга смеса, односно таа не ги губи својствата на ниски температури и успешно се справува со контактот кога подлогата е лизгава, водена, покриена со снег не само поради смесата од која е направена туку и до подлабоките шари (профилот) и од нивниот облик. Тоа е исто како со летната и зимската облека. Како тоа замислувате среде зима да возите со летни пневматици, а вие излегувате од дома наоблечени и со зимски обувки кои скапо сте ги платиле затоа што се водонепропустливи? Зошто не излезете на снег со влечки или се еспадрили, така нешто лесно и едноставно? Не ви се допаѓа идејата, нели!? Ако можете вашиот автомобил да го возите со летни обувки, а надвор паѓа снег, зошто да не можете и вие да облечете некое кошулче и обувки салонки и така да се шетата по снегот?
Безбедноста при возењето да ви биде прво и единственото за кое треба да посветите посебно внимание. Соодветно подготвен автомобил за зимски услови и прилагодување на брзината според условите на патот се двете основни нешта за безбедно да стигнете до посакуваното одредиште. Патиштата се лизгави и токму таму каде најмалку се надевате токму таму на тоа место автомобилот може да покаже нестабилност и да скршне од патот, не сакајќи.
Покрај зимски пневматицити, за целосна зимска подготовка треба да ја проверите и батеријата, потоа течноста за ладење и темелно да ги исчистите ветробранските стакла, а за крај на подготовката проверете ги метличките од бришачите, а ако се истрошени веднаш заменете ги.
Што се однесува до синџирите, нив, како што умееше да каже еден мој многу добар пријател, учете да ги ставате на суво. Сега вие извлечете поука од неговиов совет и не „влегувајте“ во филм дека токму вам никогаш нема да ви притребаат синџирите.
Ви посакуваме среќен пат, возете нимателно и никако брзо. Важно е да стигнете таму каде посакувате, а за колку време ќе стигнете тоа не е ни толку битно. Повеќе мислете на тоа дека некој ве чека да се појавите, отколку да мислите како да возите побрзо и да стасате побрзо.
ТОП НОВОСТИ
