ОСТРОВОТ САНТОРИНИ ЧИЕ ОФИЦИЈАЛНО ИМЕ Е ТЕРА Е ВУЛКАНСКИ ОСТРОВ, КОЈ СЕ НАОЃА ВО ЈУЖНОТО ЕГЕЈСКО МОРЕ, ОКОЛУ 200 КМ ЈУГОИСТОЧНО ОД ГРЧКОТО КОПНО. ТОЈ Е НАЈГОЛЕМИОТ ОСТРОВ ОД ЕДЕН МАЛЕЧОК КРУЖЕН АРХИПЕЛАГ КОЈ ГО НОСИ ИСТОТО ИМЕ. ОВОЈ МАЛЕЧОК АРХИПЕЛАГ Е НАЈЈУЖНИОТ ДЕЛ ОД ЕДЕН ПОГОЛЕМ АРХИПЕЛАГ ОСТРОВИ, ПОЗНАТ КАКО КИКЛАДИТЕ. САНТОРИНСКИОТ АРХИПЕЛАГ СЕ СОСТОИ ОД ТРИ ПОГОЛЕМИ ОСТРОВИ И НЕКОЛКУ ПОМАЛИ: САНТОРИНИ, ТЕРАЗИЈА, КАКО И НЕНАСЕЛЕНИТЕ ОСТРОВИ НЕА КАМЕНИ, ПАЛАИА КАМЕНИ, АСПРОНИСИ И НЕКОИ ДРУГИ.
Помеѓу овие острови се наоѓа голема, скоро правоаголна лагуна, која во средината ја достигнува највисоката длабочина од околу 400 метри, што значи дека ова невообичаеано парче море било и е безбедно пристаниште за било каков вид бродови. Пристаништата на островите се сите во внатрешниот дел од лагуната, а главниот град Фира се искачува високо над карпите, надгледувајќи ја оваа збунувачка глетка. Веќе првите впечатоци од ова место делуваат нереални, а посетителот кој правпат зачекорува на ова парче некогашен вулкан се чувствува како дел од некоја приказна.
Гратчињата и селата на островите, со нивните бели симпатични куќички се сместени на врвовите од вулканските планини и извишувања давајќи им на островите впечаток дека се работи за тродимензионална уметничка слика. Најпознати места, со секаков вид сместување се Тира, Имеровигли, Фирастефани (Фира) и Оиа. Ова е комерцијалниот дел од Санторини, кој живее од туризмот и од сликата што ја има за да привлече посетители. Градовите Периса и Камари привлекуваат илјадници фанатици по чоколаден тен на нивните нетипични, настанати од вулканска лава плажи, со совршено ситен црн песок. Но внимавајте. Доколку сакате да ги посетите овие плажи, имајте на ум дека црниот песок е топол како да е од пеколот. На обичен летен ден, не можете да пропешачите од местото на вашиот пешкир до морето, а да немате некој вид обувка на нозете. Периса и Камари се интересни гратчиња во летниот период.
Преполни се со ресторанчиња, барови, кафетерии, слаткарници, продавници за накит, сувенирници и што сè нè. Периса е можеби пофамилијарниот од двата града, бидејќи во него се наоѓаат и големи суепермаркети, кампови и воден парк за деца. И Камари и Периса имаат нуркачки центри, и на оние кои ја сакаат подводната авантура, нуркањето помеѓу овие острови ќе им биде вистинско доживување. Она што е најинтересно за Санторини е фактот што посетителот сè уште може да ја доживее типичната островска Грција.
Кога се спуштате од споменатите градови до плажите, ќе поминете низ малечки населени места како Мегалокори или Емборио, земјоделски заедници кои не се предаваат на туризмот, па можете да застанете на ручек во не толку луксузен ресторан, но ресторан во кој се слуша грчка музика, се јадат типични грчки јадења од свежи намирници, и во кои, сопствениците ќе сакаат повеќе од сè да се пофалат со нивното домашно вино. Третиот дел од Санторини се вика Акротири, најпознат по археолошките остатоци од времето на Минојците. Самото место Акротири не е толку познато кај туристите бидејќи патот кој води до археолошкото наоѓалиште не поминува низ гратчето. Но ова гратче нуди многу работи за посета.
Најголемиот дел од населението се занимава или со некој занает, или, пак, со фармерство. Во ова мирно и целосно опуштено место има тврдина, која се ноаѓа на највискиот дел од гратчето и нуди поглед кој не се опишува со зборови, кој се протега на вулканските брегови на островот, синото море и виноградите околу населените места. Плажите под Акриотри се едни од најдобрите (Црвената плажа и Вличада). Тука се, исто така, едни од најдобрите и можеби најевтините таверни. Блиску до овие плажи е и популарната плажа Периса. Најинтересна од плажите е можебите плажата Калдера, сместена внатре во самиот вулкански кратер.
Санторини нуди повеќе од баровите и рестораните, видиковците на Тира, спокојот на Оиа, и плажите и баровите на надворешниот брег. На пример, некои сметаат дека рушевините во Акротири се доказ за посетоењето на цивилизацијата на Атлантида. Градот кој некогаш во антиката го населувале Минојците, цивилизација која живеела и на другите острови на Кикладскиот архипелаг и на Крит, е многу добро зачуван бидејќи бил покриен со вулканска пепел. Поради материјалот од кој биле направени куќите и останатите згради (тули од кал), целото наоѓалиште сега е ставено под некој вид високо софистициран покрив кој би требало да му даде релативно трајна заштита на локалитетот.
Вреди да се забележи дека за време на ископувањата на Акротири (многу често се нарекува „Помпеја од егејско море“) не се пронајдени човечки остатоци. А тоа, пак, води археолозите да веруваат дека луѓето биле свесни за претстојната ерупција, и го напуштиле градот пред катастрофата да се случи. Поркрај остатоците во Акриотри, тука се и рушевините во античка Тира, сместени на планина помеѓу плажите Камари и Периса. Најдобро е да го посетите ова наоѓалиште пред да удри предпладневното сонце. Терасестите остатоци кои гледаат накај морето датираат од 3от век пред н.е., но има остатоци од хеленската и од римската цивилизација. Многу од артефактите најдени на Санторини се сместени во Предисторискиот музеј во Тира, кој е навистина лесен за наоѓање. Музејот е една од најважните културни атракции во Санторини. Отворен во 2000 година, музејот на античко богатство вклучува и голема колекција на разнобојни фрески ископани во Акротири.
ХРАНА
Санторини е стар остров и неговата храна е комбинација од климатските фактори и вкусовите од староседелците. Во Тира и Оиа можете да најдете што сакате и по било која цена која можете да си ја дозволите. За добра храна по пристојна цена потребна е кола. Правило е да се бараат подалечни и не толку популарни места, ако сакате да стигнете до вистинскиот квалитет. Затоа барајте семејни рибни таверни кои се наоѓаат на помалите плажи или села. Најтипична закуска на овие острови е пржени доматни ќофтиња. Трудете се во салата да има локални домати, растени во самите бавчи на сопствениците. Тие се едни од највкусните и најсочните домати во Европа. Интересен податок е дека на Санторини, во 2002 година се одржа конференција за чери домати, каде експерти и фанови од целиот свет ги споделуваа нивните искуства. Ваков вид конференции сè уште се оддржуваат редовно.
НОЌЕН ЖИВОТ
Санторини не го запоставува ниту ноќниот живот. Местата каде се наоѓаат самите плажи нудат барови со гласна музика, многу коктели, диџеи и тие клубови се највеќе посетувани од странските туристи. Оние кои се дојдени на меден месец, или во некоја романтична комбинација за да уживаат во зајдисонцето, претпочитаат да останат во Тира, каде баровите се наредени долж сртот на вулканот. Некои туристички водачи сметаат дека зајдисонцето од Тира ја подига свесноста за убавината и моќта на природата. Некои од хотелите организираат грчки вечери со типична музика во живо, каде се служи типична храна и каде се кршат чинии кога расположението ќе го достигне климаксот.
ТОП НОВОСТИ
