ПОТРЕБНО Е ДА МУ ПОСВЕТИТЕ МАЛО ВНИМАНИЕ НА АВТОМОБИЛОТ ВО ЕКОТ КОГА НАБЛИЖУВА ТОПЛИОТ ПЕРИОД ОД ГОДИНАТА. ТОА МАЛО ВНИМАНИЕ МНОГУ ВРЕДИ И ЗА ВАС ЗА ВАШИОТ АВТОМОБИЛ, А ПРЕД СÈ ЗА БЕЗБЕДНОСТА ВО СООБРАЌАЈОТ.
Толку од зимата, уште малку и ете ја пролетта, а тогаш температурите ќе бидат редовно во плус и тоа со двоцифрени броеви. Тоа е повеќе од убаво, ако се има во предвид дека топлиот период од годината повеќе се користи за патувања. Милениците на четири тркала сега ќе имаат прилика да го покажат сето свое умеење и да ги оправдаат парите за кои се купени. Еднодневни ексурзии, викенди, продолжени викенди, одмори и сето тоа проткаено со уживање. Токму последново, за негово исполнување во целост потребно е возилото да биде прописно подготвено.
· Прво и основно, типично за зимските месеци е фрлањето разновиден ситен материјал и сол на асфалтот како превенција од формирање површини од мраз. Тој ситен материјал, особено солта, негативно влијае на каросеријата. Солта врзана со влагата и останатите гасови во атмосферата, најмногу издувните и останатите оксиди, формира „хемија“ која најдобро е да биде отстранета, измиена со вода. Најпаметно е на крајот од зимата автомобилот да биде темелно измиен, посебно околу тркалата и секако долниот дел. Клучен фактор за безбедно возење се чистите стакла, препорачуваме да ги измиете два до три пати за сета нечистотија да биде темелно отстранета. Со тоа добивате беспрекорно чисто ветробранско стакло на кое бришачите најлесно ќе ја отстрануваат водата без појавување на карактеристичните флеки. И не заборавајте да проверите колку течност преостанала во садот. Доколку снема течност среде возење, бришачите само дополнително ќе ја усложнат ситуацијата со размачкување на нечистотијата, а тоа е последно што сакате да се случи. Затоа навреме проверете го нивото на течноста за миење на стаклото и не е лошо секогаш да си носите резерва.
· Завршивме со миењето, сега на ред се пневматиците и тоа не било кои туку летните. Ако немате, задолжително да си набавите, а доколку ги имате, откако ќе ги ставите на тркалата, прописно да бидат напумпани, како што наведува производителот и веднаш да се балансираат. Откако сè средивте со пневматиците, останува уште нешто, а тоа е притисокот во нив кој треба постојано да го проверувате, затоа што пневматикот го дава максимумот само кога е правилно напумпан. Покрај таа проверка, да го проверите и резервното тркало или комплетот за санирање на дупнати пневматици. Тука завршуваме со пневматиците и сега се фокусираме на светлосната групација. Ништо повеќе од тоа дали сите сијалички работат и дали фаровите правилно го фрлаат светлосниот сноп пред автомобилот. Доколку снопот не е како што треба, веднаш да се исправи тој недостаток.
· Потоа акумулаторот бара проверка и зачистување на клемите и нивно прскање со посебен спреј за што подобар контакт. Да се провери и количеството на течноста за ладење на моторот и нејзиното ниво постојано да е некаде помеѓу цртичките за минимум и максимум. Во топлиот период од годината испрарувањата се значително поголеми и затоа препорачуваме проверка на нивото.
· Во претходно исчистената внатрешност ако почуствувате дека воздухот кој влегува преку дифузорите има некаков мирис, тоа е знак дека треба да го смените филтерот за полен или да биде подложен на чистење со компресор. Ова чистење со компресор, ако почесто го правите, подолго ќе ви трае поленовиот филтер. Генерално кај нас поленовиот филтер мора често да се чисти и менува затоа што количеството на прашина на еден кубен метар е за неколку пати поголемо. Тоа и вие можете да го забележите – без разлика дали е во централното градско подрачје или некаде на периферија, прашината видливо е присутна на асфалтот.
Ете толку од таканаречената летна подготовка на автомобилот. Сте ги направиле горенаведените проверки и сега друго ништо не ви преостанува туку само да седнете во вашиот миленик на четири тркала и да отпатувате некаде. За крај на нашиов текст, а за почеток на вашите патувања, ви препорачуваме веднаш ставање на сигурносни ремени, внимателно возење, без зборување на мобилен телефон, прилагодување на брзината според зададените услови на патот, држете растојание и без брзање, уживајте во возењето.
ТОП НОВОСТИ
