КРАТКИОТ ИЛИ ВИКЕНД ОДМОР (CITY BREAK) ОД НЕКОЛКУ ДЕНА ВО ГРАДОВИТЕ Е СÈ ПОПОПУЛАРНА ФОРМА НА ПАТУВАЊЕ И НАЈЧЕСТО ТОА Е ТРИДНЕВЕН ИЛИ ЧЕТИРИДНЕВЕН ПРЕСТОЈ ВО ПОГОЛЕМИТЕ ЕВРОПСКИ ГРАДОВИ, НО И ВО МЕСТА КОИ СЕ МАЛКУ ПОЗНАТИ, НО КОИ ПЛЕНАТ СО СВОЈАТА УБАВИНА. ГЛАВНА ЦЕЛ НА ОВИЕ ПАТУВАЊА Е ПОБРЗО ДА СЕ СТИГНЕ ДО САКАНАТА ДЕСТИНАЦИЈА, ДА СЕ ЗАПОЗНААТ ОСНОВНИТЕ КУЛТУРНО-ЗАБАВНИ ОДЛИКИ, ДА СЕ ПОЧУВСТВУВА ЖИВОТОТ НА УЛИЦАТА, ДА СЕ ОДИ НА ШОПИНГ… ОСОБЕНО Е ПОПУЛАРЕН КАЈ ЛУЃЕТО ШТО НЕМААТ ПОВЕЌЕ ОД НЕКОЛКУ ДЕНА ЗА ПАТУВАЊЕ, НО И КАЈ ОНИЕ ШТО САКААТ ДА ЈА СМЕНАТ СРЕДИНАТА БАРЕМ ЗА НЕКОЛКУ ДЕНА НАКРАТКО.
Ако не сте од оние што во секое време знаат која дестинација сакат да ја посетат, прво добро размислете што очекувате од патувањето. Според тоа дали се фокусирате на култура, забава или на шопинг, одлучете кој град или област е најдобар за ваков одмор. За да се одлучите полесно, понекогаш е добро да проверите што се случува во моментов во големите европски градови, особено во период кога заради општата состојба со Ковид-19 групните патувања главно се откажани. Добро разгледајте кои се моментните цени на авионските билетите за да можете да направите конечна одлука за тоа каде ќе патувате. Колку побрзо резервирате, толку е поевтино. А и сместувањето можете да го резервирајте преку интернет.
Хотелите лоцирани подалеку од центарот може да ви заштедат пари, но проверете дали местото е добро поврзано со другите делови на градот, така што почетната мала цена да не се претвори во најскапо патување. Ако патувате до дестинацијата со автомобил, задолжително проучете низ кои места поминувате за да можете да направите пауза.
НЕОБИЧЕН МИКС НА СТАРОТО И НОВОТО
Нашиот предлог за краток одмор е прекрасниот Луксембург, минијатурна држава опкружена од Белгија, Германија и Франција, кој се наоѓа на врвот на најбогатите и најмали европски земји. Благодарејќи на географската положба, тука се споени различни култури и тоа претставува микс на старото и новото. Познат е по старите дворци и палати, карпестата уметност (северниот дел е богат со пештери исцртани со цртежи од праисторијата), како и по подземните канали што во Првата и во Втората светска војна служеле како засолниште за десетици илјади граѓани, а еден дел од нив денес се подземни галерии и туристички атракции.
Луксембург е една од најмалите држави во светот. Зафаќа површина од 2,6 илјади квадратни километри и спаѓа во најбогатите земји во Европската Унија. Луксембург не го крие своето богатство. Најскапите возила се честа глетка на улиците, постарите куќи се одржувани, а новите се беспрекорно проектирани; улиците се поплочени, нема трага од ѓубре, а патишта се рамни како стакло. Овде ќе видите како живеат луѓето со минимална плата од околу 1.800 евра и со просечна плата од околу 4.000 евра во земја во која нема доволно луѓе за да се пополнат сите работни места.
Тајната на успехот што го оствари оваа „минијатурна“ држава во голема мера лежи во челичната индустрија, големиот број банки и во виното „мосел“. Уште пред повеќе од три децении локалните жители ги увиделе придобивките на безвизниот режим и без голем напор почнале да ги извезуваат своите производи и да споделуваат искуства со колегите од Германија и од Франција.
ЕВРОПСКА ПРЕСТОЛНИНА
Луксембур секогаш бил во поволна позиција кога станувало збор за европската интеграција. Уште од основањето на ЕУ во 1952 година неколку иституции биле лоцирани во овој град. Како роден град на Роберт Шуман, еден од татковците на Европа, Луксембург има привилегија да биде еден од престолнините на Европа, не само поради географската поставеност во срцето на Европа, туку и поради повеќејазичноста. Со повеќе од 150 различни националности, градот претставува вистинска економска, социјална и културна комбинација од раси и идеи.
Главниот град на оваа мала држава носи исто име – Луксембург. Во него живеат 80.000 жители. Во моментов тој е финансиски центар и главно седиште на многу интeрнационални организации, вклучително и на Европската Унија. Тоа е еден од најбогатите градови во светот, со развиен банкарски центар. Целиот град изгледа како голема изложба. Ако сте љубител на ренесансата, ќе уживате во градот со ренесансна архитектура. Можете да го користите Јавниот градски превоз кој е бесплатен, односно за користење на автобусите и на трамваите повеќе не треба да се плаќа билет.
Градот Луксембург е волшебна мешавина од антиката и модерното во комбинација со локалното и глобалното, едноставноста и луксузот.
ИСТОРИЈА ШТО ЌЕ ВЕ ФАСЦИНИРА
Сè до 20 век Луксембург бил сиромашна земја. Архитектурата се состоела од помали куќи и рурални цркви што датирале од 17 век, кои сè уште постојат и сведочат за тоа време. Имало само неколку големи земјопоседници што покажувале видливи амбиции за градење.
Старата тврдина град Луксембург е една од ретките тврдини со разновидност на стилови на воена архитектура, од времето на средниот век до првата половина на 19 век. Дел од трагите оставени низ текот на времето се вратите што датираат од 12 и од 13 век, надворешните ѕидови од времето на Џон Слепиот, шпанските кули, австриските кули и прусиските бараки…
Casemates du Bock. Луксембуршката карпа Бок со утврдувањата се наоѓа на влезот во познатиот Касематес ду Бок. Станува збор за подземни тунели долги 21 км, издлабени во цврста карпа. Подземните одбранбени тунели биле изградени во 1644 година во периодот на шпанската доминација. Биле поставени на различни нивоа и на длабочина од 40 метри. Затоа Луксембург е наречен и Гибралтар на Северот. По демонтирањето на тврдината, 17 км од тунелот останале во добра состојба. Денес голем дел од овие утврдувања може да се посетат пешки, а еден дел со организирана тура. Влезот е дозволен од 1 март до 3 ноември. Билетите за возрасни чинат 7 евра, а за студенти 6 евра.
Plateau Bourbon е целосно изградена во архитектонски стил инспириран од градбите во Париз и во Берлин на почетокот на 20 век. Зградата со кула на левата страна денес е седиште на банката Banque et Caisse d’Epargne de l’Etat. Позната е по музејот на банката што е ретроспектива на историјата на банката и банкарството во Луксембург воопшто.
Grand Ducal Palace е официјална резиденција на големиот војвода од Луксембург. Зградата со декорации во ренесансен стил била изградена во 16 век
Cathedral to the Blessed Virgin е неверојатен пример за доцниот готички стил што открива различни компоненти и орнаменти инспирирани од ренесансниот стил. На почетокот била наречена црква на Jesuit, а во 1870 година папата Пиус IX ù ја посветил оваа црква на Дева Марија.
Adolphe Bridge или мостот Адолф, кој, исто така, го нарекуваат нов мост, е подигнат помеѓу 1900 и 1903 година за време на владеењето на големиот војвода Адолф. Мостот, долг 85 метри (вкупна должина 153 метри), висок 42 метра, имал најголем камен свод што дотогаш бил направен, и се протегал по долината Петрусе.
Vianden, една од најпопуларните екскурзии во Луксембург е патувањето во селото од бајките и замокот Вијанден. Главна атракција на Вијанден е замокот изграден во 12 век. Замокот бил седиште на грофовите до 15 век, а подоцна бил продаван сè додека не станал обична урнатина и во 1977 година станал државна сопственост. Сега е убаво уреден и вистинско задоволство е да се шета по неговите соби и ходници.
Погледот на овој замок потсетува на многу бајки од детството за принцови и принцези, волшебници и вештерки. Налето живописното опкружување го претвора градот во вистинска кошница, во која се собираат туристи од цел свет, запоседнувајќи ги многубројните кафулиња и пабови на главната улица, од каде што има одличен поглед на замокот.
КУЛТУРА ОД ЦЕЛИОТ СВЕТ ИЛИ УМЕТНОСТА НА ЖИВЕЕЊЕТО
Во Луксембург музеите имаат церемонијален облик. Во Градскиот историски музеј се собрани повеќе од илјада години историја на овој град. Во Националниот музеј на историја и уметност е лоциран еден од најубавите римски мозаици северно од Алпите. Постојаните и привремените изложби на Националниот музеј на природна историја ги фасцинираат сите љубители на модерната уметност. Музејот на модерна уметност Grand-Duc Jean MUDAM е еден од најамбициозните архитектонски и културни проекти. Кинеско-американскиот архитект Иеох Минг Пеи го осмислил и го дизајнирал проектот и ја трансформирал тврдината Туген, која била стратегиска воена локација, и ја претворил во уметничка креација.
Во близина на MUDAM е Филхармонијата, која е домаќин на многу престижни музички групи. Филхармонијата на Луксембург, изградена од Кристијан де Портзапарк, покрива широк спектар на музички интереси. Тука може да се слушнат класични ремек-дела, да се откријат современи композитори, да се слуша класичен и европски џез и да се истражуваат музички култури од целиот свет. Оркестарот на Филхармонијата на Луксембург, исто така, се наоѓа во зградата.
Градскиот Гранд театар е домаќин на опери, мјузикли, денс-шоуа и претстави што се играат на француски, германски и на англиски јазик.
Во сезоната Луксембург нуди голем број најразлични концерти и фестивали, од мјузиклот „Printemps musical“, фестивалот „Summer in the City“, за индијанското лето „Live at Vauban“ до „Winterlights“ и „Schueberfouer“, еден од најголемите панаѓури во Европа што привлекува повеќе од 2 милиона посетители секоја година.
Има многу можности за славење во Луксембург, а секогаш тие се поврзани со кулинарската уметност. Има многу ресторани што нудат префинета кујна и одлична услуга. Зелените површини во Pétrusse Valley, јавните паркови и живописните брегови на регионот Алзете се идеални за релаксација, а пешачката зона е вистински шопинг автопат со огромен број бутици и продавници.
Пиењето бело вино (домашен ризлинг) претставува омилен ритуал. Покрај уживањето во овој пијалак, уживајте во одличниот вкус на kachkeis – варено сирење, во чадено свинско месо во сос, ребра на скара, црн пудинг… На крајот од вашата прошетка низ Луксембург посетете ја Чоколадната куќа (спроти Grand Ducal Pалата) и уживајте во вкусот на вистинската чоколада, но и во вкусните колачи, пити и торти.
ТОП НОВОСТИ
