ЧОВЕКОТ ОТСЕКОГАШ КОПНЕЕЛ ДА ИМА КРИЛЈА. КОГА ТОА МУ УСПЕАЛО СО АЛБЕРТО САНТОС -ДУМОНТ И СО БРАЌАТА РАЈТ, ПОГЛЕДИТЕ ГИ НАСОЧИЛ КОН ЛЕТАЧКИТЕ АВТОМОБИЛИ. НАЈГОЛЕМ ЧЕКОР ВО ТАА НАСОКА ИМА НАПРАВЕНО СЛОВАЧКАТА КОМПАНИЈА КЛЕИ АВИЕЈШН
Ако некој мисли дека производителите на автомобили денес целосно се зафатени со плановите за развој на електромобилите, се лаже и себеси, но и другите. Речиси сите се влезени во машината наречена летачки автомобили, а Хонда е една од ретките што размислува и забрзано работи дури и на вселенските летала. Тојота (Џоби Авиејшн), Хјундаи, Фолксваген, Стелантис, Гили, Сузуки (Скајдрајв), Гвангжу Аутомобил Груп, БМВ, Икспенг и многу други – се само дел од компаниите што велат дека наредната година ќе ги претстават своите летала. Во овој момент дури 250 фирми во своите работилници низ светот произведуваат прототипови на мали летала и секојдневно ги тестираат. Ова личи на времето од пред повеќе од еден век кога голем број работилници и фабрики ги тестираасвоите автомобили со цел да ги направат побрзи, поудобни, поупотребливи, поквалитетни итн. Тие мали летала што сега се во развојна фаза многу повеќе личат на дронови и хеликоптери отколку на автомобил со крилја. Сепак, има неколку производители чии летала се речиси автомобили. Некои од нив подготвуваат летала што ќе можат вертикално да полетуваат и слетуваат, а други одат кон тоа леталото да се користи во секојдневниот сообраќај. Оттаму е името летачки автомобил. Токму во оваа класа најдалеку е отидена словачката работилница Клеин Вижн со летачкиот автомобил наречен „аеромобил (еркар)“. Како што вели главниот во компанијата, кога „еркар“ ќе влезе во сериско производство, за основниот модел ќе треба да платите 500.000 евра, а за најопремениот еден милион.
Клуб Мобилити во неколку наврати објавуваше текстови за летачките возила, почнувајќи од калифорниската компанија Алеф Аеронаутикс, преку словачката Клеин Вижн, до Хонда со нејзините планови за месечеви летала и возила, но и вселенски летала. Хјундаи и Фолксваген беа тие што најавуваа производство и тестирање на „втол“ (вертикал тејк оф енд лендинг) летала способни за вертикално полетување и слетување. Некаде на почетокот од годинава и Стелантис најави планови за правење аеромобил. За остварување на таа цел, Стелантис се врза со калифорниската компанија Арчер Авиејшн. Соработката помеѓу овие две компании датира од 2020 година, така што нема непознати за нив. Тие длабоко се навлезени во работата и планираат леталото да го претстават наредната година. Стелантис ќе биде производител на леталото, а Арчер Авиејшн е планер на севкупната работа и сопственик на нацртите. Како што обелоденија на саемот ЦЕС во Лас Вегас, Стелантис ќе вложи уште 150 милиони долари во развојот на леталото и изградба на фабрика во местото Ковингтон, Џорџија. Инаку, леталото носи име „арчер миднајт“ и повеќе личи на класичен авион што на крилата има неколку вертикално поставени елиси и многу е далеку од автомобил. Може да понесе тежина од околу 600 кг, односно во него има 4 + 1 место, четири патници и пилот. Наменет е за прелет на кратки растојанија не подолги од 20 – 25 минути, изразено во километри не повеќе од 150 -160, а полнењето на батериите трае 10 минути. Најверојатно мислат на полнење од 20 до 80 отсто. Најново од Арчер Авиејшн и Стелантис е договорот за продажба на 100 летала на Јунајтед Ерлајнс. Од Тојота пристигна вест дека вложила околу 400 милиони долари во Џоби Авиејшн.
Во моментов пет компании се водечки во испитувањата и правењето летала: Скајдрајв Инк, Џоби Авиејшн, Лилиум, Арчер Авиејшн и Аеромобил. Последнава треба да биде надвор од конкуренција затоа што сопственикот Стефан Клеин вели дека неговиот „аеромобил“ е веќе подготвен за сериско производство (2027).
ТОП НОВОСТИ
