АКО СИТЕ РАБОТИ СЕ РЕАЛИЗИРААТ СПОРЕД ПЛАНОТ, НАСКОРО ЌЕ БИДЕМЕ СВЕДОЦИ НА МОТОЦИКЛ ПРИДВИЖУВАН ОД „СТРУЈА“ ПРОИЗВЕДЕНА ОД ВОДОРОД СО ПОМОШ НА ГОРИВНИ ЌЕЛИИ, А ЌЕ МОЖЕ ДА СЕ КУПИ ЗА 10.700 ДОЛАРИ. ДИЗАЈНОТ Е ПОСЕБЕН ИЛИ НЕШТО КАКО ЛАМБОРЏИНИ НА ДВЕ ТРКАЛА.
Врвните научни кругови што се занимаваат со проблематиката на зелените горива велат дека е подобро моторните возила да добијат систем за добивање електрична енергија преку водородот како гориво. Всушност, горивни ќелии преку кои водородот ќе биде претворен во електрична енергија и на тој начин ќе се придвижува возилото.
Секако идејата за водородот има противници, но многу поголем е бројот на тие што му даваат предност. И производителите почнуваат да ја унапредуваат технологијата на горивните ќелии и еден по еден сè почесто ја вградуваат. Овој пат технологијата е вградена во мотоцикл што со својот дизајн заслужува внимание.
Зборуваме за компанијата Сегвеј која пред повеќе од две децении беше позната по своето чудно возило на две тркала, управувано преку одржување рамнотежа, нешто слично како велосипедот, само што нема педали, а има тркала што не се поставени едно зад друго, туку едно до друго. Поради исклучително интересните решенија во 2015 година компанијата ја купи кинеската компанија Најнбот, позната по дигитализирани направи што работат преку посебни команди, нешто слично на роботите.
Кинеската компанија се впушти во проект наречен електрифициран мотоцикл, но не со батерии, туку со горивни ќелии. Засега планот им се остварува и работите се одвиваат во вистинска насока, барем такви известувања пристигнуваат од производителот. Всушност, мотоциклот е втора генерација од концептот наречен „апекс Х2“ претставен во 2019 година. Новиот концепт е негово продолжение, но во краткиот извештај производителот вели дека нивниот производ ќе влезе во продажба во 2023 година по цена од 10.500 долари.
Водородот е сместен во посебни резервоари под висок притисок што може да бидат лесно заменети, потрошениот се вади и се става полн, а според конструкторите со еден грам течен водород мотоциклот ќе минува еден километар. Сепак, Сегвеј не наведува со која брзина ќе се движи мотоциклот при потрошувачката од еден грам на еден километар. Не се споменуваат ни материјалите од кои е направен мотоциклот, а уште помалку кажуваат каков рам користи концептот. Ништо не наведуваат, освен што ја објавија цената, годината кога ќе почнат со продажбата и мал дел од брзинските способности – од 0 до 100 км/ч за 4 секунди и 150 км/ч крајна брзина. Сето тоа го постигнуваат 80 коњски сили произведени од електромотор. Од сликите се забележуваат еднокраките виљушки и на предното и на задното тркало. Дизајнот е најзабележлив, современ, со остри линии како да е „ламборџини каунтач“.
Ова е смел потег на Најнроб заедно со Сегвеј, компанија што никогаш досега не произвела сериски мотоцикл, а сега го најавува „апекс Х2“ и тоа со супер современа и пред сè со чиста, зелена, еколошка технологија. Апекс е името на мотоциклот, а „Х2“ е водородот на кој му недостасува едно „О“ за да биде „H2O“, односно водената пареа што ќе ја испушта мотоциклот за време на возењето. Мошне интересен производ со цена што не е многу висока, односно доволно ниска за производот да добие масовно производство. Не знаеме што ќе се случи до 2023 година, но се надеваме и на цела палета модели на две тркала. Ако „сегвеј апекс х2“ е врв во понудата, тогаш производителот мора да понуди и мотоцикли со помала силина, некој вид скутер или изведба со наполу помала силина и со сличен остар дизајн како на фотографиите.
Можно е при конструирањето на мотоциклот да се користи тридимензионален сечач за производство на некои делови. Тие направи брзо и со ласерска прецизност ги обликуваат деловите, така што производот ќе добие квалитет. Ако е така, тогаш сериското производство може веднаш да почне.
ТОП НОВОСТИ
