Светско првенство во Формула Е-КОГА ДВАЈЦА СЕ ТЕПААТ…

ВОЗАЧИТЕ НА ЈАГУАР И НИВНИОТ САТЕЛИТСКИ ТИМ ЕНВИСИОН СО ИСТАТА МАШИНЕРИЈА, МИЧ ЕВАНС И НИК КАСИДИ, БЕА ГЛАВНИ ПРОТАГОНИСТИ ЗА ВОЗАЧКАТА ТИТУЛА ВО ФОРМУЛА Е, А ИСТОВРЕМЕНО И НИВНИТЕ ЕКИПИ СЕ НАТПРЕВАРУВАА ЗА КОНСТРУКТОРСКАТА КРУНА, НО НА КРАЈОТ ШАМПИОН СТАНА ЏЕЈК ДЕНИС

Завршницата на сезоната во Формула Е се состоеше од две „дуплекс“ трки, односно два гран при викенда кои имаа по два посебни натпревара. Импровизираните патеки во Рим и Лондон по традиција се поместени на крајот од календарот, па во пресрет на нивното одржување главните фаворити имаа можност добро да размислат.

Сè уште има многу поени за освојување, а мојата позиција е дека треба да се обидам да ја намалам предноста на водечките. Моите ривали освојуваат убави бодови, исто како мене, па не бев во можност да се издвојам како што можеби би сакал, но сè уште сум во игра за титулата и тоа е најважното. Има четири трки до крајот, тоа се многу можности и јас дефинитивно имам потреба од силен викенд за да можам да останам во игра за титулата на последното гран при во Лондон, изјави Мич Еванс од Јагуар.

Токму Еванс во 2022 година ги освои двете трки возени низ улиците на Рим, со таа разлика што тогаш сè уште се возеа болидите од таканаречената „Генерација 2“, а воедно и временските услови не беа екстремно жешки како на средината од јули оваа година.

Се случи токму возачите на Јагуар да го „отворат“ гран при викендот во Рим, освојувајќи ги првите две стартни места за првата трка, при што Мич Еванс беше побрз од тимскиот колега Сем Бирд, кој поради мала невнимателност по своја вина не успеа да стигне до пол позицијата.

Зад нив имаше четири возачи кои не беа во комбинација за светската титула (Фенестраз, Буеми, Раст и Мортара), додека Џејк Денис беше на седмото место, а Ник Касиди на деветтото.

Бирд сепак ја започна трката преземајќи го водството во првите неколку круга, но веќе во деветтиот круг предизвика прекин на истата бидејќи излета во шестиот свиок, а во тој момент беше паднат на четвртото место. Групата возачи зад него успеа да го избегне неговиот болид кој се одби од ѕидот назад на патеката, а меѓу нив беа и Денис и Касиди. Сепак швајцарскиот пилот Себастијан Буеми не успеа да го заобиколи, по што и другите возачи зад него беа вовлечени во инцидентот кој што направи хаос и поради големиот број на возачи кои претрпеа штета, трката беше прекината.

Во тие моменти Фенестраз водеше пред Еванс и Раст, но во рестартот се појавија само 14 возачи. Фенестраз му го препушти водството на Денис, кој постојано напредуваше, но во финишот Еванс успеа да му се доближи и да го престигне во директен дуел за победа. До крајот Касиди и Гунтер, исто така, успеаја да го престигнат Денис, со што направија дополнителен заплет со нив тројца како главни протагонисти во борбата за титулата.

Денеска го загубивме само третото место, бидејќи не бевме во можност да ги победиме Мич и Ник, поради тоа што имавме поинаква пресметка за рестартот, тие секако ќе ме победеа поради нивните подобри перформанси. Но што се однесува до Гунтер, едноставно испуштивме три бода. Во финишот почнав да ја губам брзината со прилично брзо темпо, но успеав да издржам да не бидам престигнат и од Верње. Искрено мислам дека утре не можам да се борам за победа, бидејќи се потребни фундаментални промени во внатрешноста на болидот, а тоа не е возможно поради хомологацијата. Во нормална трка не би можеле да победиме, но сè е можно да се случи, мојот болид има добра управливост, но е послаб во однос на нивните бидејќи не генерира добар контакт со подлогата. Очекувам да биде тешко и во Лондон, ние ќе се обидеме да спасиме што можеме и да освоиме пристоен износ на поени, гласеше анализата на Џејк Денис.

Сепак, откако ја даде таа изјава, Англичанецот Денис најпрвин стигна до пол позицијата за втората трка, возејќи најбрзо време во квалификациите од 1:37.986, а Ник Касиди задоцни помалку од една десетинка со што му овозможи на ривалот да освои три поени за најдоброто стартно место. Еванс беше поразен од Касиди во нивниот полуфинален дуел, што овозможи таков расплет на крајот.

Дуелот на двајцата возачи од Нов Зеланд продолжи и во трката, кога Еванс се судри со Касиди во седмиот свиок од патеката, оставајќи го Џејк Денис, и покрај песимистичката изјава дадена претходниот ден, да забележи убедлива победа од стартот до целта и повторно да избие во водство на табелата. Во такви услови второто и третото место ги освоија Норман Нато и Сем Бирд.

Возилата пред мене забавија повеќе отколку што очекував. Реагирав, но ми блокираа задните тркала и потоа се удрив во Ник. Едноставно во тој момент ситуацијата ескалираше, мала грешка, но ме исфрли врз неговиот болид, по што самиот бев елиминиран од трката, а во голема мера придонесе и тој да биде елиминиран. Навистина ужасна ситуација. Морам да го прифатам таквиот расплет, но не се обидував да направам ништо лошо. Во текот на целата сезона немав допрено друг болид и сега се чувствувам лошо и поради себе и поради тимот, а веројатно најмногу поради Ник бидејќи тој не направи ништо погрешно, а Џејк со победата ги докрајчи неговите шанси, објасни Мич Еванс.

Разговаравме со Мич, тој зборуваше повеќето од времето. Мислам дека е добар дечко, дека е одличен возач, а вакви нешта се случуваат, но сепак е срцепарателно. Имав големи оштетувања и мислам дека можев да бидам повреден, но имав среќа. Се разбира, тоа не беше и мојата прва реакција, но кога го гледам болидот сега мислам дека имав голема среќа, помирливо рече Ник Касиди.

Како последица на судирот во Рим, Мич Еванс доби казна од пет места на стартот во првата од двете трки низ улиците на Лондон. Во пресрет на таканареченото финале Денис имаше 24 поени предност во однос на Касиди, додека Еванс со 58 поени помалку од лидерот веќе делуваше како аутсајдер.

Дополнително, на претходните трки возени на неговиот „домашен терен“, Англичанецот Денис секоја година имаше најмалку по една победа, со што се наметна како комплетен фаворит за титулата.

Оваа патека му одговараше на мојот пакет од минатото, кога го возев болидот од генерација 2 со погон од БМВ. Сега немам такви очекувања, бидејќи нештата се темелно променети. Овие момци знаат како да возат, а јас имав подобар болид од нив минатите години. Ќе одам чекор по чекор, но сепак имам самодоверба, и сметам дека сум доволно релаксиран, па со нетрпение очекувам да се најдам зад воланот. „Ако ми било пишано“ тоа ќе биде тоа, ако не, тоа е тоа, рече Денис, кој вози за истиот тим (Андрети), но сега со машинерија на Порше.

Иако беше непријатно изненаден во Рим, Касиди остана оптимист пред стартот на акцијата во Лондон.

Мислам дека сè уште имам добра шанса. И тројцата имаме добро подготвени болиди што можат да победуваат овој викенд. Треба да ги засукаме ракавите, да ја завршиме работата бидејќи сè е можно.

Мислам дека голем фактор може да бидат временските услови, затоа што во случај на дожд може да добиеме ненадејна шанса, бидејќи за нас може да биде добар таквиот расплет, во спротивно тројцата ќе се најдеме на подиумот, елаборираше возачот од Нов Зеланд.

Касиди го започна викендот одлично, поставувајќи најбрзо време од 1:11.264, што беше три десетинки побрзо од најблиските конкуренти, но половина секунда побрзо во однос на неговите ривали во борбата за титулата. Сепак, квалификацискиот формат кој протежира директни дуели на возачите во борбата за пол позицијата доведе до тоа во финалната рунда да се сретнат Еванс и Касиди, при што трите бода за најдоброто постигнување отидоа кај возачот со помали шанси  Мич Еванс (еден круг извозе за 1:10.578).

Поради казната тој стартуваше од шесто место, па така во првиот ред се најдоа неговите ривали, Касиди и Денис. Почетното водство му припадна на Касиди, додека Денис мораше да се чува од нападите на тимскиот колега на лидерот, Себастијан Буеми. Откако Буеми го презема второто место, беше пропуштен од Касиди да ја води трката. Но при истекот на првата половина од предвидената должина на трката, кога Касиди се обиде да се врати во водство, Буеми нималку колегијално му се спротивстави, при што дојде до контакт и оштетување на предното крило на болидот на Касиди, па тој мораше во боксот, а со тоа и да се прости од надежите за шампионската титула.

Во рестартот, Еванс го презема водството, но на четири круга пред крајот следеше нов прекин поради судирот на Саша Фенестраз и Сете Камара. При рестартот, второпласираниот Рене Раст поради оштетување на болидот мораше да побара помош од механичарите и падна на опашката од колоната, па Еванс во финишот без многу притисок стигна до победата, но Џејк Денис со пробивање на второто место воедно ја обезбеди шампионската круна.

Ја имав победата во раце, бев во водство и сè беше многу добро. Се откажав од водството во трката за да му помогнам на тимот. Можеби требаше да бидам малку себичен. На последниве две трки го имавме целиот потенцијал да ја освоиме титулата. Не сакам да го омаловажам успехот на Џејк, но се чувствувам како некој силно да ме удрил под појасот, разочарано констатираше Ник Касиди.

Мислам дека никој не очекуваше ваква трка, со повеќе појавувања на возилото за безбедност, црвени знамиња и судири насекаде по патеката. Јас тоа го доживеав како некој да ме гаѓаше од сите страни. Имав чувство како целата трка да оди погрешно од повеќе причини и ми беше тешко да ги контролирам своите емоции. Додека возев мислам дека немавме особени проблеми, но при прекинот, освен што му се развикав на мојот инженер, мислев дека сите на патеката се свртеле против мене.

Но успеавме да ја сочуваме присебноста и да ја свртиме приказната во наша корист. Иако Ник подоцна се откажа од трката, преку радио врската ми кажаа дека за да ја освојам титулата во оваа трка, морам да бидам на третото место, што ме изненади бидејќи мислев дека ми се доволни само шест поени во однос на Еванс. Во тој момент бев петти, и мојата реакција беше „леле, пак морам да направам чудо“. На два круга пред крајот почнав да добивам пораки да не преземам ризици и да не правам глупости, а кога конечно ја поминав целната линија, почувствував големо олеснување, какво што никогаш порано не сум почувствувал во својот живот, да се биде светски шампион е нешто за што сите сонуваме, рече новокрунисаниот првак Џејк Денис.

Еванс уште еднаш ја покажа одличната форма и го предводеше Јагуар при постигнувањето на најбрзите времиња на тренинзите за втората трка, возејќи 1:10.152, односно нецела десетинка побрзо од тимскиот колега Сем Бирд. Сепак во реприза на квалификациските дуели од првата трка, Касиди успеа да постави време од 1:10.092, кое што беше само една стотинка подобро од она на Еванс, и да го обезбеди најдоброто стартно место за себе.

Слично како и првата трка низ улиците на Лондон, и во втората имаше многу прекини и излегувања на возилото за безбедност, овој пат поради поројните дождови. Стартот од првото место се покажа како клучен момент бидејќи Касиди успеа да ги одбие сите напади на Еванс и да финишира како победник, со што му помогна на својот тим и да ја освои шампионската титула во дуелот со Јагуар. Новопечениот шампион Џејк Денис го комплетираше победничкиот подиум, но со задоцнување од шеснаесет секунди.

Не знам зошто, но бев мошне комфорен, имавме добра брзина и можевме да си поигруваме со трката, што на вакво високо ниво е нереално чувство и такви шанси не се случуваат често, изјави Касиди по триумфот со кој ја запечати тимската титула на сателитскиот тим на Јагуар.

Сепак, од следната година, тој ќе биде дел од фабричкиот тим, односно тимски колега со Мич Еванс, што е најава за големо ривалство идната сезона. Мич Еванс е во тимот од 2016 година и оттогаш освои 10 победи, при што две сезони по ред до последниот викенд беше во игра за титулата, додека Касиди оваа сезона четири пати славеше и на крај беше вице-шампион.

Александар Табаковски