МАКС ФЕРСТАПЕН СЛАВЕШЕ ПОБЕДА НА ЛЕГЕНДАРНАТА ТРКА НИЗ ГРАДСКИТЕ УЛИЦИ НА МОНТЕ КАРЛО ВО МОНАКО, НО НЕГОВИОТ ТИМСКИ КОЛЕГА СЕРХИО ПЕРЕЗ ПО МНОГУ ПЕРИПЕТИИ ГО ДОВЕЗЕ БОЛИДОТ НА РЕД БУЛ ДО ПРВОТО МЕСТО И НА ТРКАТА НИЗ УЛИЦИТЕ НА БАКУ.
И двата викенда започнаа со големо изненадува и пол позиција на Шарл Леклер од Ферари, кој во досегашниот дел од сезоната играше споредна улога. Сепак, напредокот на Ферари беше видлив и кај двата болида, со што станува јасно дека наскоро и „гордото коњче“ од Маранело ќе се вмеша во борбата за победи на патеката.
Во Монако, Леклер го оштети болидот по постигнувањето на најбрзото време и не можеше да стартува, па Макс Ферстапен извлече максимум од ситуацијата и де факто се најде на пол-позиција која што ја конвертираше во прва победа на трката за Големата награда на Монако. Негов противник во првиот дел од трката беше Валтери Ботас, но тој имаше малерозно застанување во боксот, по кое се откажа. Победничкиот пиедестал го комплетираа Карлос Саинц од Ферари и Ландо Норис од тимот на Мекларен. Ова е втора победа за Ферсатпен во актуелната сезона.
Актуелниот шампион Луис Хамилтон кој стигна до три победи на претходните четири трки мораше да се задоволи само со седмата позиција, која беше условена и од резултатот во квалификациите, со што Ред Бул во Монте Карло успеа да ја преземе првата позиција не само кај возачите, туку и во табелата кај конструкторите.
– Реков уште од самиот старт, ќе ни биде многу тешко. Ви потенцирав уште првиот ден, тие имаат шампионски болид оваа сезона и ќе биде многу тешко да ги победиме. Сериозен сум околу тоа и навистина го мислам тоа што го велам. Победивме на трки на кои не требаше да победиме и тоа е добро, така беше особено во Бахреин. Има долг пат пред сите, но едно е јасно. Не смееме да си дозволиме уште еден ваков ужасен викенд. Среќен сум што завршив. Секој бод ќе биде важен, но ваков лош викенд не смее да се повтори. Лошо е што и следната трка во Баку се вози на улична патека, ни беше тешко во Монако да ги загрееме гумите, ќе видиме дали ќе се подобриме во Баку, – изјави Хамилтон. Зад водечката тројка завршија Перез, Фетел, Гасли, Хамилтон, Строл, Окон и Џовинаци, со што Италијанецот го освои и првиот поен за Алфа Ромео оваа сезона. Дека среќата сè уште не им го свртела лицето на Мерцедес, се покажа уште пред почетокот на викеднот во Баку. Авионот на Ботас доцнеше над пет часа, па тој официјалната прес конференција ја одработи преку интернет. Сличен викенд имаше и Леклер, кој дојде до нова пол позиција, но не успеа да и се израдува на победата бидејќи непосредно по стартот беше престигнат од Хамилтон.
Во продолжението, возачите на Ред Бул, Макс Ферстапен и Серхио Перез направија предност со побрзите влегувања во боксот, па овој двоец во финишот имаше предност во однос на ривалот од Мерцедес. Серијата инциденти во финишот ја започна Ленс Строл, кој заврши во заштитната ограда поради пукнат пневматик, а истото му се случи и на Ферстапен на пет кругови до крајот, што беше голем шок за тимот на Ред Бул и за Холанѓанецот кој не го криеше разочарувањето на и покрај патеката.
Трката беше прекината на три круга до крајот, а по рестартот Перез тргна лошо, Хамилтон ќе го престигнеше, но поради проблеми со сопирачките, не го фати првиот свијок и прокоцка многу поени, вклучувајќи го и преземањето на водството во генералниот пласман.
Перез ја задржа првата позиција за прва победа како возач на Ред Бул, а трката во Азербејџан донесе многу радост и за Себастијан Фетел кој со второто место првпат се најде на подиумот како возач на Астон Мартин. Победничкиот пиедестал беше комплетиран со Пјер Гасли од Алфа Таури.
Бодови освоија уште и Леклер, Норис, Алонсо, Цунода, Саинц, Рикиардо и Раиконен, додека Хамилтон ја заврши трката на претпоследното 15. место.
Во генералниот поредок, Макс Ферстапен ја задржа малата предност во однос на Луис Хамилтон во генералниот пласман и по трката во Азербејџан, па сега води со 105 бода, а возачот на Мерцедес има101 поен, по што следуваат Перез со 69 и Норис со 66 поени.
Тимскиот шеф на Мерцедес, Тото Волф, призна дека е лут и разочаран затоа што целиот тим потфрлил и останал без важни поени, посебно откако Макс Ферстапен не ја заврши трката.
– Мора да ја вратиме нашата најдобра „игра“ во шампионатот, нашиот болид не беше во Баку цел викенд. Не смееме да правиме грешки, а тоа не беше така последните две трки. Не е само проблемот на Хамилтон кој фрустрира, туку целосните перформанси, не успеавме да ги исполниме очекувањата. Не смееме да продолжиме да губиме поени како овде и во Монако, тоа е неприфатливо за сите во тимот, – изјавил Волф.
Хамилтон во дел од своите интервјуа по трката нагласи дека е многу разочаран што го изневерил тимот, но посочи и дека болидот на Ред Бул е подобар од оној на Мерцедес во овој момент, со што побара реакција од одговорните луѓе во тимот. Сепак, оваа негова изјава изнуди одоговор од страна на возачот на Ред Бул, кој вели дека тој би бил две десетинки побрз од својот ривал за титулата доколку го има болидот на Мерцедес.
– И јас ќе ја дадев истата изјава ако бев на негово место. Ако јас бев во неговиот болид, ќе бев две десетинки побрз од него. Не ми е грижа за неговите изјави, – порача Ферстапен за „Моторспорт“.
ТОП НОВОСТИ
