СВЕТСКО ПРВЕНСТВО ВО АВИОНСКИ ТРКИ – МУРОЈА ВО ГОЛЕМ СТИЛ НАНИЖА ДВА ТРИУМФА

ИАКО КАЛЕНДАРОТ НА АВИОНСКИТЕ АКРОБАТСКИ ТРКИ РЕДОВНО БРОИ ОСУМ ТРКИ ВО СЕЗОНАТА, ОРГАНИЗАТОРИТЕ ОВАА ГОДИНА СЕ ОДЛУЧИЈА ДА ПОДВЛЕЧАТ ЛИНИЈА И ДА СЕ СКОНЦЕНТРИРААТ НА ОНИЕ НАСТАНИ КОИ ИМААТ ТРАДИЦИЈА ВО ПРВЕНСТВОТО, ПРИТОА ОТКАЖУВАЈЌИ ГО ФИНАЛЕТО НА СЕЗОНАТА ВО САУДИСКА АРАБИЈА.

Околу 80.000 гледачи се собраа на втората трка од Светското првенство која се одржа во Казан, Русија, при што сите ја забележаа доминацијата на јапонскиот пилот Јошихиде „Јоши“ Муроја, кој со втората победа во исто толку настапи во 2019 година се најде на врвот во генералниот пласман. Веднаш зад него заврши Австралијанецот Мат Хол, кој сега се зацврсти како еден од фаворитите оваа сезона, додека најголемиот ривал на Муроја, актуелниот светски шампион Мартин Шонка од Чешката република, останува во игра, овој пат како трет на подиумот.

Повремениот дожд и ветер со променлива брзина создадоа проблематични и предизвикувачки услови за трката со реден број 92 од Светското првенство кое е познато како „Red Bull Air Race“. Сепак, во финишот, сонцето излезе за последните возења од финалната четворка, а најсилно блесна за шампионот од 2017, Јошихиде Муроја. Откако во директен дуел го порази најбрзиот во квалификациите, Мика Бражо, од Франција, во втората рунда на осуммината најбрзи пилоти по првите дуели (7 победници од 14 пилоти и еден најдобар од поразените), Муроја леташе како прв во финалната четворка, и притоа оствари време од 1:03:496. Следен леташе Шонка, кој постигна само 1:04:238, а Франсоа Ле Вот од Франција, за кого ова беше прв настап во најдобрите четворица од 2016 година, заработи казна. Се зависеше од Хол, трикратен второпласиран пилот на ова светско првенство.

Летот на Хол не беше разочарувачки, неговото прво време беше едвај зад Муроја, а потоа во еден момент тој се лизна на повеќе од половина секунда зад него, но Австралијанецот некако успеа да се врати во игра и ја оставипубликата без здив завршувајќи го својот лет на само 0.185 секунди зад победникот Муроја.

Овде имавме многу добро чувство од почеток. Денеска ветрот се смени, па беше навистина тешко да се најде вистинската патека, но мојот тактичар Бен ми помогна. Тимот работи многу добро. Сите работат вредно и јас можам да се опуштам, за да летам како робот. Авионот е навистина брз и јас само си ја вршам работата. Денеска бевме многу близу со времињата, а и со поени сме сè уште близу на табелата, па не можам да се опуштам за следната трка. Секако дека ќе се борам за победа на езерото Балатон, изјави пресреќниот јапонски пилот по свечената церемонија на пиедесталот.

Муроја се зачлени во многу ексклузивен клуб: само уште еден друг пилот има победено на првите две трки во светското првенство, а тоа е трикратниот освојувач на титулата Пол Боном од Велика Британија. Со календар од само четири потврдени трки во 2019 година, натпреварот во Казан практично ја означува средина на сезоната. Пласманот на светското првенство пред втората половина на сезоната е следен: Муроја има запишано 53 поени, што претставува девет поени предност пред второпласираниот Шонка. Со 36 поени, Хол скокна на третото место на табелата. Со 25    поени за победникот, и поените кои се достапни за првите тројца во квалификациите, лидерите ќе треба да се борат со останатите четиринаесетмина од пилотската „глутница“, како и меѓу себе на премиерниот настап на езерото Балатон, во Унгарија, за само четири недели.

Шампионот од 2016 година Матијас Долдерер од Германија не се тркаше во Казан откако неговиот тркачки авион беше оштетен од удар во воздушен столб и не можеше да биде поправен до денот на трката.

Следува претпоследната битка за Светското првенство на Red Bull Air Race во градот на ресорти, Замарди, на бреговите од езерото Балатон, во Унгарија, на 13-14 јули 2019 година.

Резултати Мастер класа 2018

Табела (по 7 трки)

Александар Табаковски