РУСИЈА Е ЗЕМЈА НА СПРОТИВНОСТИ И КРАЈНОСТИ… МИСТИЧНА И ЕДИНСТВЕНА ВО СÈ. СО ВЕКОВИ БИЛА ЗЕМЈА НА ИМПЕРАТОРИ, ПА ДУРИ И ДЕНЕС ПРЕКРАСНИТЕ И РАСКОШНИ ПАЛАТИ НА ПОРАНЕШНИТЕ АРИСТОКРАТИ НИ РАСКАЖУВААТ ЗА НЕЈЗИНАТА БОГАТА И ЧЕСТО БУРНА ИСТОРИЈА. БЛАГОДАРЕНИЕ НА ИСТОРИСКОТО, КУЛТУРНОТО И ПРИРОДНОТО БОГАТСТВО, ЗАПИШАНО ВО СПИСОКОТ НА УНЕСКО, РУСИЈА ИМ НУДИ НА СВОИТЕ ПОСЕТИТЕЛИ МОЖНОСТ ЗА НЕЗАБОРАВНО ИСКУСТВО.
Москва е град сличен на книга со бесконечен број страници – полн со историја и интересни приказни. Ова е град што не смеете да го пропуштите да го посетите. Првпат се споменува во 1147 година, а од петнаесеттиот век станува главен град на руската држава. Москва го имаше тој статус сè до 1712 година, кога главниот град се пресели во Санкт Петербург. Важноста на градот не се намали и Москва стана центар на голем број значајни настани за рускиот народ. Во 20-тите години од минатиот век, Москва стана главен град на Советскиот Сојуз и оттогаш не го изгуби тој статус. Денес тоа е модерна светска метропола, центар на руската држава, култура, економија, спорт. Москва е специфична, преубава, полна со историја. Поинаква од која било друга дестинација во Европа. Атракциите и знаменитостите во Москва што вреди да се видат е тешко да се наведат зашто ги има толку многу, така што едноставно треба да се прошета низ овој огромен град и да се ужива.
Сепак, многубројните културно-историски споменици ја потврдуваат важноста на овој прекрасен град. Црвениот плоштад – срцето на Москва, вообичаено е почетна точка за обиколка на градот. Тука се мавзолејот на Ленин, црквата Свети Василиј и еден од sидовите на тврдината Кремљ. Плоштадот има долга историја и првпат беше споменат во петнаесеттиот век, кога на него беше основан пазар. Црвениот плоштад е една од најинтересните туристички локации во Москва. Во мавзолејот на Ленин се чува телото на славниот советски револуционер Владимир Илич Ленин. Црквата Свети Василиј е подарок на рускиот цар Иван Грозни, изградена е во периодот од 1555 до 1561 година. Оваа прекрасна зграда е еден од симболите на градот Москва, а овде денес се наоѓа музеj.
ФАСЦИНАНТНИОТ МОСКОВСКИ КРЕМЉ
Кремљ се појави како симбол на сталинизмот за време на комунизмот и со текот на времето стана една од заштитените знаци на руската престолнина. Денешна Москва е модерен индустриски и капиталистички град, а Кремљ е центарот на тој модерен град и една од најпосетуваните локации во Европа.
Московскиот Кремљ бил изграден меѓу 12 и 15 век и претставувал центар на моќта на Русија. Почнувајќи од регионалниот владетел, па преку подемот на Русија и Руската Империја, потоа советската ера и денешна Русија, Кремљ беше симбол на силата на рускиот главен град. Секоја епоха донела одредена новина и цел на Кремљ, а за време на постоењето на Советскиот Сојуз, седиштето на советската влада било во Кремљ, денешната влада е на друго место, но тука е канцеларијата на претседателот на Русија и неговата официјална резиденција. Повторно, на вистински начин, симболизирајќи ја таа сила и упориште што е главната цел на Кремљ во руските утврдувања. Кремљ се наоѓа во центарот на Москва на истоимената река, каде што е опкружен со Црвениот плоштад, од една страна, и Александарската градина, од друга страна. Кремљ има четири палати, четири катедрали, Кремаљскиот ѕид и познати кули.
Во 14 век Кремљ станал центар на Руската православна црква и во текот на наредните векови биле изградени три прекрасни цркви. Православните од цел свет доаѓаат да му се восхитуваат на познатиот иконостас во црквата Благовештение, тврдината на Јован Велики со две златни куполи што може да се видат од растојание од 30 км, најголемото црковно ѕвоно познато како Ѕвоно на Кремљ. Покрај сакралните згради, во Кремљ се наоѓа и Палатата на оружјето полна со кралски скапоцености итн.
ЦРВЕНИОТ ПЛОШТАД
Ова е најпознатиот градски плоштад во Москва. Во него се сместени некои од најпознатите обележја на Москва, исто така, тоа е централно место за средби на московјаните и посетителите на овој волшебен град. Постојат многу причини за тоа, а главна е неговиот централен карактер и положбата од која понатаму се градат сите главни улици во Москва и даваат можност да се обиколи градот. Некогаш ова место, познато по зградите што го опкружуваат, не изгледал така до крајот на 15 век, кога било наредено целосно да се урнат дрвените конструкции подложни на пожари и постепено да се обновуваат!
Црвениот плоштад, долг 700 метри, го краси катедралата Св. Василиј, симболот на Москва и најпозната зграда во цела Русија. Изградена е по наредба на Иван Грозни за да го одбележат заробувањето на Казан во 1552 година. Катедралата Свети Василиј му била доверена на архитектот Иван Барма, попознат како Постник. Според легендата, по завршувањето на катедралата Постник бил ослепен, со цел да се осигури дека нема повторно да планира изградба на слична убавина.
Од левата страна е Спаскаја кула, на чиј врв е главниот часовник во Русија, наречен „Куранти“. Кулата е синоним за прославата на новогодишната ноќ во Москва бидејќи нејзиниот часовник се покажува на секој телевизор во земјата кога неговиот удар означува точно на полноќ. Тука е и Кулата Спаскаја, која е еден од влезовите во Кремљ. Се смета за главен од дваесетте кули и единствен влез што директно гледа накај Црвениот плоштад.
На западната страна на Црвениот плоштад е црвената некропола на ѕидот на Кремљ. Во неа се наоѓаат гробовите на поранешните советски лидери со доминантна необична атракција – мавзолејот на Ленин. Почивалиштето на мумифицираното тело на лидерот е отворен за јавноста и тоа е моќен потсетник дека Ленин, исто како и социјализмот, е мртов, но не е заборавен.
Прекрасната градба на Историскиот музеј, кој се наоѓа на север од Црвениот плоштад, е уште едно од обележјата на Москва Тоа е најголемиот музеј на руската историја, со огромна колекција на артефакти од античко време до денес. Ова уникатно парче од прекрасниот град беше вклучено во Списокот на УНЕСКО за светско културно наследство во 1991 година. Сепак, интересно е да се каже дека светски познатиот плоштад всушност не го носи името „Црвен плоштад“ поради бојата на зградите или тротоарите, туку зборот „црвено“ е буквален превод од руски јазик, бидејќи зборот што значи „убаво“ значи „црвено“ на руски јазик. Овој плоштад Русите го нарекуваат Красни трг.
СЕРГЕЕВ ПОСАД
Ако сакате да ја запознаете националната кутура и традиција на Русија задолжително посетете го Сергиевиот Посад (оддалечен 70 км од Москва), еден од најстарите и најголемите руски манастирски комплекси, центар на руското православие и поранешна резиденција на рускиот патријарх. Тука се наоѓа еден од најстарите и најголемите руски манастири, центарот на руското православие и духовноста и бисер на античката руска уметност и архитектура. Тоа е манастирот Троица на свети Сергиј Лавра, кој се наоѓа на Списокот на светско наследство на УНЕСКО од 1993 година. Манастир го основал Сергије Радоњешки во првата половина на 14 век. Како богат феудален имот, тој играл важна улога во политичкиот и во економскиот живот на Северна Русија, поддржувајќи ја централистичката политика на Големите војводи. Од 14 до 17 век бил најистакнат руски културен центар, каде што се пишувале, препишувале и собирале книги, а се собирале уметници (иконописци, копаничари, златари итн.). Од 11 век во него се наоѓа Московската теолошка академија, а од 1920 година, историскиот и уметничкиот музеј.
Вредно за спомнување е и Манастирот Новодевичи кој, исто така, е вклучен во Списокот на УНЕСКО, и претставувал една од одбранбените структури на Москва од 1524 година. Во 1926 година на местото на манастирот е основан историски-домаќинствен и историски музеј, а во 1980 година тој бил резиденција на митрополитот Крутитски и Коломенски.
ИСТОРИСКИОТ ЦЕНТАР НА САНКТ ПЕТЕРБУРГ
Една од посебните карактеристики на овој величенствен град е неговата способност да ги поттикне имагинацијата и творештвото на човекот. Не случајно го нарекуваат град на музи, поети, сликари, уметници и музичари.
Во „Питер“, како што жителите на Санкт Петерсбург од милост го нарекуваат својот град, секоја куќа има своја приказна. Тука живееле Пушкин, Достоевски, Романов… И рускиот композирот Чајковски го сакал овој град. Во зима неговите опери се изведуваат во театарот Маријански. Музејот Ермитаж има осум илјади слики, дела на Рубенс, Моне, Пикасо и речиси три милиони најубави украсни предмети во светот: Фабержеови јајца, царски кочии, чизни и облека на Петар Велики и различни примери на применетата уметност. Позлатените куполи на Вознесенската црква се воздигнуваат до небото. Ќе ве воодушеви огромната коњичка статуа на основачот на градот Петар Велики, позната како бронзениот коњаник. Од спротивната страна се издигнува импозантната купола опкружена со ѕвониците на Исакиевската соборна црква, најголем религиозен споменик во градот што може да прими четиринаесет илјади верници.
По Москва, Санкт Петербург е најголем економски, научен и културен центар на Русија. Има неколку универзитети (најстариот е основан во 1724 година, реорганизиран во 1819 година), многу научноистражувачки институти, повеќе од 80 театри (познатиот Маријански театар), голем број библиотеки (Руска национална библиотека, Универзитетска библиотека итн.); од 250 музеи во и околу градот, се издвојуваат Ермитаж, Рускиот музеј, Музејот на Руската академија на уметностите, музеите на А. С. Пушкин и Ф. М. Достоевски, Поморскиот музеј; Филхармонијата… Санкт Петербург е основан од Петар Велики во 1703 година, со цел да биде негов прозорец кон Европа, односно да обезбеди руско присуство на Балтикот. За време на Големата северна војна Петар Велики ја освоил шведската тврдина на реката Нева. Неколку недели подоцна, на островот Зајаци, 5 км од вливот на реката во Финскиот Залив, тој ја започнал изградбата на тврдината Петар и Павле, која станала првата зграда од тули на новиот град. Тогаш градот бил официјално именуван според неговиот покровител апостол Свети Петар, но многумина веруваат дека неговиот основач го именувал градот според него. Многу архитекти, инженери и градители од цела Европа биле поканети да го исцедат мочуриштето и да изградат еден од најмодерните градови во тоа време. Петар Велики го ценел изгледот на Париз, особено на Версај, така што многу згради биле изградени според парискиот модел. За разлика од Москва, архитектурата на центарот на градот, која се состои претежно од барокни и неокласични згради од 18 и 19 век, е во голема мера зачувана, иако голем број згради се урнати за време на Втората светска војна. Покрај тврдината Петар и Павле, тука се и Катедралата на Свети Изак од 1770 година.
Поради културните и архитектонските знаменитости, тој е значаен туристички центар со околу од 3 милиони странски и повеќе од 1.000.000 домашни туристи годишно. Архитектонските споменици (впишани на Списокот на светско наследство на УНЕСКО во 1990 година) претежно биле изградени во западноевропски стилови во 18 и 19 век; покрај десниот брег на Нева се наоѓаат најпознатите тврдината Петар и Павле (сега музеј) со истоимената катедрала и палата Меншиков, зградата Дванаесет курсеви (сега Универзитет), по должината на левиот брег на Нева – Зимскиот замок, Летниот замок, Мермерниот замок, Адмиралитетот и Академијата на уметностите на островот Васиjeевски. Во делот на градот јужно од Нева, околу главната градска авенија се наоѓа Невски Проспект со палати (Строганова, Анишкова), палатите Тауриде, Јусупов и Воронцов, црквите Св. Исак, Свети Никола, Казан, комплексите на манастирот Александар Невски и манастирот Смолни. Позначајни се историските споменици и статуата на Петар Велики (бронзен коњаник) на плоштадот Декабрист и крстосувачот Аурора. Санкт Петербург е важен сообраќаен центар и главното руско балтичко пристаниште.
Една од посебностите на Санкт Петербург се и мистериозните бели ноќи, сивиот превез што ги обвиткува контурите на дворците во облак и на градот на Нева загадочен и мистичен карактер, поради што понекогаш остава впечаток дека му дава е престолнина на облаци, сништа, исчезнати сенки. Петербург е единствена метропола во која тој феномен се јавува секое лето. Феноменот на белите ноќи, всушност, е време кога сонцето „стои“ на хоризонтот и ја одржува светлината во градот иако ноќта одамна почнала.
Белите ноќи обично траат од 11 јуни до 2 јули и градoт се претвора во место на славење, романтика и на поезија…
КИЖИ ПОГОСТ
Уникатниот архитектонски комплекс на дрвена архитектура од 18-19 век бил вклучен во Списокот на светско наследство на УНЕСКО во 1990 година и се состои од две дрвени цркви и камбанарија во Карелија. Кижи е олицетворение на руската архитектура. Во него се наоѓа Државниот историски и архитектонски музеј Кижи со разновидни предмети од дрвена религиозна архитектура, вклучително и ветерницата со осум крила од 1929 година и Преображенската црква, изградена без ниеден клинец. Две години подоцна во 1992 година во Списокот на УНЕСКО се внесени и Архитектонските комплекси на Велики Новгород и неговата околина. Меѓу културните објекти, вклучени се и важни православни градби, како што се манастирите Знаменски, Антониев, Јуријев, Зверин, како и црквата на Рождеството Христово, Спасителот на Нередита, Кремљ и пустината Новгород.
БАЈКАЛСКО ЕЗЕРО
Бајкалското Езеро, единствен природен споменик на Источен Сибир, е запишан во Списокот на светско наследство на УНЕСКО во 1996 година.
Езерото е најдлабоко во светот и содржи 19% од светските резерви на слатководни води. Кога се гледа од височина, езерото личи на полумесечина, зафаќа површина од над три милиони хектари и се храни од повеќе од 300 реки и потоци. Максималната длабочина на езерото е 1.642 метри. Акумулација на најголемото езеро во Русија – скоро 19% од светската свежа вода. Водата во Бајкалското Езеро е толку чиста што некои карпи на дното се видливи дури и на длабочина од 40 метри. Чистотата на водата е обезбедена од Епишура – уникатен воден езерски рак што консумира органска материја. Бајкалското Езеро е дом на околу 2.600 животни воопшто, од кои повеќе од половина се ендемични. Најпозната од нив е бајкалската фока, единствен вид на слатководна фока во светот. Посебен феномен и вистинска атракција на Бајкалското Езеро е мразот. На крајот на зимата во заливите неговата дебелина достигнува два метра. Замрзнува на различни делови од површината на различни начини: покриен е со мрежа од пукнатини, потоа е распукан со меурчиња, изгледа како огледало, па како замрзнато стакло.
УНИКАТНИОТ СПОМЕНИК „ЛЕНА СТОЛБОВИ“ И ВУЛКАНИТЕ НА КАМЧАТКА
Во Русија има прекрасно место за кое не знаат многу луѓе. Тоа е природниот резерват Лена столбови, комплекс од вертикално издолжени карпи, кои се протегаат со километри по должината на бреговите на реката Лена во Јакутија. Овие геолошки формации се воведуваат во системот на посебно заштитени природни територии како национален природен парк.
Во 2012 година се обележани како светско културно наследство на УНЕСКО, во кои се откриени непроценливи наоди од кембрискиот период. Паркот се наоѓа во центарот на Република Саха (Јакутија) во близина на брегот на реката Лена, а зафаќа 1,27 милиони хектари.
Вулканите на Камчатка се сметаат за дел од огнениот вулкански прстен на планетата и се заштитени од УНЕСКО од 1996 година. 30 активни и три стотини угасени вулкани со својата магнетска сила го привлекуваат погледот на секој посетител. Околните пејзажи се особено импресивни.
ОСТРОВИТЕ ВРАНГЕЛ И ХЕРАЛД
На север на Русија, каде што морето Чукчи се среќава со Арктичкиот Океан, се наоѓаат мрачните планински острови Врангел (7,6 илјади км²) и Хералд (11 км²). Во суровата околина каде што напорниот живот изгледа невозможен, се наоѓаат стотици растителни видови – повеќе отколку на кој било друг арктички остров. Меѓу црните камења, моржовите се сместиле на најголемата ракавица на Арктикот, а илјадници птици направиле гнезда. Сивите китови пливаат во водите за време на нивните миграции. Островот Врагнел се нарекува и „остров на поларни мечки“.
Куронска плунка е познатото песочно место, сместено меѓу Балтичко Море и Курониската лагуна, се протега на 98 км со максимална ширина од 3,8 км. Ова природното обележје беше вклучено во Списокот на светско наследство на УНЕСКО во 2000 година и е интересно поради уникатниот антропоген пејзаж претставен со разни релјефи – од пустини до мочурлива тундра. Шумата Коми која е, исто така, под заштита на УНЕСКО од 1995 година се карактеризира со разновидна флора и фауна, а многу растителни видови, за жал, се пред истребување.
Локалитетите на светското наследство што се наоѓаат на посебна листа на УНЕСКО се од голем интерес за целото население на планетата. Овие природни и културни места овозможуваат да се зачуваат карактеристични значајни делови на природата, како споменици што го демонстрираат нејзиното богатство. Од друга страна се можностите на човечкиот ум кој со помош на рацете создал дела што го одземаат здивот. Списокот на УНЕСКО е богатството на светот за кој треба да се грижиме да го зачуваме затоа што тоа треба да биде дел од животот и на идните генерации.
Во изминатава година нашето списание „Клуб Мобилити“ на своите страници ви претстави голем дел од нив. Ако веќе бевме ограничени во можноста со свои очи да ги видиме, се надеваме дека успеавме со збор и слика да ви доловиме дел од тоа. Ќе продолжиме таму каде што застанавме и идната година, така што веќе од првиот број во Новата 2021 година очекувајте прекрасно изненадување со нова дестинација…
ТОП НОВОСТИ
