МЕТАФОРИЧНОТО ЗНАЧЕЊЕ НА ВОЛНЕНАТА ИЛИ ПАМУЧНАТА (СВИЛЕНАТА ПОВЕЌЕ Е НАМЕНЕТА ЗА ЖЕНИТЕ) ТКАЕНИНА СЕ СОСТОИ ВО НЕЈЗИНАТА ТОПЛИНА, МЕКОСТ… КАДИФЕНИОТ ГЛАС, А САКОТО – НЕПРИКОСНОВЕНО ЗА ЕСЕНСКИТЕ, ЗИМСКИТЕ ДЕНОВИ, ВЕЧЕРИ ШТО ЌЕ ГИ ПАМЕТИТЕ. ОСВЕН ШТО СЕ ОДЛИКУВА СО ЕЛЕГАНЦИЈА, НЕГОВОТО ДРУГО ИМЕ Е РАФИНИРАНОСТА. СЕ РАЗБИРА, ВИСТИНСКАТА – ГОСПОДСКАТА
Минатата година, во ова време, актерот Даниел Крег на светската премиера на филмот „No Time to Die“ („Нема време за умирање“ или „Не е време за умирање“) во Лондон го привлече вниманието на јавноста со кадифеното сако во розова боја и едновремено го најави трендот во модата за есен, зима. Очигледно дека и годинава е важечки, доколку се раководиме од понудите на креаторите и нивните модни куќи, познати во светски рамки. Кога е формалноста во прашање, црното кадифено сако не може да се надмине, по него и темносиното и сивото. Ни малку не изостанува ни белото ни зеленото (смарагдното) ни кафеавото ни пурпурното… Тие се идеални и за дење и за ноќе. Правила нема, само исклучоци од нив. Доказ е британскиот глумец кој му контрираше на стереотипот дека розовата е боја на жената и нè увери дека самодовербата е особено важна, исто како и самосвеста, вклучувајќи го и држењето, ставот и манирите, начинот на однесување.
ПАРЧЕ ОБЛЕКА ШТО И ПРКОСИ НА СТАНДАРДИЗАЦИЈАТА
Кадифеното сако беше на лондонската модна куќа „Anderson & Sheppard“, која од 1906-та шие по мера. Со црните чевли (лакирани „оксфорд“), панталони, лептир-машна и белата кошула, џебно шамиче и часовникот на раката („Omega“ е неизоставен аксесоар, моден додаток на Џејмс Бонд), изгледаше одлично, првокласно и секако – господски. Беше и пример во стилски поглед, како треба да изгледа свечената облека што ќе й пркоси на стандардизацијата. Стилистите го препорачуваат не само за свечености туку и за дневни комбинации. Разликата е во реверите кои се поголеми, често и сатенски. Обично се носи со бела кошула, црни панталони, лептир-машна и секако, појас или елек. Може и поедноставно, со вратоврска. Обувките се битни за комплетирање на имиџот, давајќи им предимство на лакираните „оксфорд“ чевли. Другите се прашање на избор, во смисла на боите, дезените бидејќи последните неколку години се голем хит. Ги воведе Том Форд за кои се изјасни во прилог на индивидуализмот, естетизмот и впечатливоста, неизбежно. Како своевидна декаденција. Неговата топлина и мекост, благодарејќи на текстурата и кројот, без оглед на модерноста, класичноста – влијае на чувството, да биде пријатно и секако, на привлечноста, но не тенденциозно. Изборот е сепак врзан со природата на човекот, неговиот карактер, нарав, темперамент.
СОВРШЕНО И ЗА ПОЛЕЖЕРЕН ИЗГЛЕД
По извесно време, односно пауза од педесетина години, врз популарноста на кадифените сакоа влијаеле холивудските актери, филмските ѕвезди, како на пример Шон Конери во седмиот филм за тајниот агент 007 – „Diamonds Are Forever“ („Дијамантите се вечни“). Ништо не е случајно, ни облеката на Даниел Крег на минатогодишната светска премиера на дваесет и петтиот филм за Џејмс Бонд. Се разбира, во исто време и лондонската модна куќа „Anderson & Sheppard“, која веќе сто и шеснаесет години се концентрира на кадифето, меѓу другото, ја обелодени целата работа, вклучително и составот. Во прашање е висококвалитетна ткаенина (15 унции), производство на текстилната фабрика од Брисел – „Scabal“. Триесет и четири метри, колку што се набавиле, биле искористени за шиење по мера, за кратко време. Цената е пропорционална на квалитетот, најниската е нешто повеќе од 4.000 долари. Таму се облекувал и Фред Астер и Гај де Ротшилд и принцот Џарлс кој неодамна беше крунисан за крал на Обединетото Кралство по смртта на кралицата Елизабета. Имено, толкави се, дури и повисоки, цените на кадифените сакоа чии етикети се потпишани од Том Форд. Нему и приватно му се омилени. Секоја година лансира нови, а комбинациите се повеќе од атрактивни, со ролки, кошули во различни бои, со чевли (мокасини) од кадифе. Всушност, Американецот им ја припиша лежерноста и покрај тоа што првенствено е наменета за свечености, вечерни излегувања и слично, а формалноста на белата кошула и џебното шамиче, во отсуство на лептир-машна, вратоврска се претвора во неофицијална, идеална за на работа, во канцеларија. Но и на кафе, преку ден.
СЕДУМ ВЕКА КЛАСИКА СО МОДЕРНА ПРИМЕСА
И стилистите и креаторите се согласни дека кадифеното сако е незаобиколно кога се работи за трендот во модата за есен, зима. И обврзно (метафорично) парче облека на мажите кои внимаваат на себе, на својот изглед. Нормално, тенденцијата не ги заобиколува ни жените (за нив, свиленото кадифе е совршено). Како дел од гардеробата, кадифеното сако е класика со модерна примеса. Всушност, присуството на модернистичкиот стил е особено важно за имиџот кој мора да се надградува, но секако, да се зачува и типичноста својствена за нив. Кадифеното сако не мора да биде наменето исклучиво за свечености. Напротив, доколку се носи поинаку, неговиот дијапазон е поширок – во разни пригоди. Освен што изгледа луксузно, за кадифето се врзува и елеганцијата, отменоста, префинетоста. Така е веќе седум века, од четиринаесеттиот – како што пишува во архивските записи, а научниците велат дека се произведувало и порано, главно во Источна Азија, пред нејзиното приклучување на патот на свилата. Логично, првично било свилено. Во ренесансата го носеле аристократите, но и подоцна. Исто било и во средината на деветнаесеттиот век. Привилегија да носат кадифе имале богатите, како фракови. Со текот на времето се намалувала цената и станало достапно за секого. Денес технологијата ја диктира, согласно квалитетот, составот. Кадифеното сако е инспирација за креаторите од чија цена се завртува во главата. За среќа, може да варира. Инаку, кадифето во 1920-те се користело за шиење наметки во оперските куќи, за пејачите. Но, интересот за креациите на Шпанецот Маријано Фортуни, кои наликувале на вреќи, се префрлил и на улиците, меѓу обичните луѓе. Побарувачката била претерана, неумерена.
УБАВИНАТА НА КАДИФЕТО, ИСТО КАКО И ЖЕНСКАТА
Кога се жените во прашање, нема дилема – кадифето може да се носи во различни форми, дезени, бои… Без оглед на привлечноста на фустанот, исто така, и сакото е примамливо, интересно за комбинирање. Постојат безброј можности, како и кај мажите, дури и повеќе. Свиленото е раскошно, луксузно и секако, наменето за свечености, пред сè. Другите (волненото и памучното) се неформални, а чувството е исто – пријатно, заради мекоста и топлината. Совршени за есенските, зимските денови, вечери. И покрај тоа што на повидок е криза, не треба да се обесхрабруваме. Дали денот, вечерта ќе биде убав/а или не, зависи од нас, често и од надворешниот изглед, гардеробата…
ТОП НОВОСТИ
