На светов му тргна со луксузните автомобили и сега тешко дека некогаш ќе се откаже од тие убави нешта. Овој пат светот имаше прилика да го види најновото чудо на четири тркала од Ролс Ројс, моделот „гоуст серија II“. Да појасниме, моделот „гоуст“ е најпопуларниот и може да кажеме дека е најбараниот, затоа што при создавањето на првата генерација од моделот „гоуст“, конструкторите и дизајнерите беа соочени со новонастанатите прилики (и неприлики) во светот. Времињата се изменија, дојдоа некои нови генерации со нови потреби и желби, купувачи со поинаков поглед на светот, поинакви од тие класичните, дотогашните. Новиве сакаат нешто поинаку, на пример секојдневно и повеќе наменско. Ролс Рој беше ставен во дилема, што да прави и како да се доближи до денешните купувачи кои имаат сосема различни толкувања за луксузен автомобил. Името „гоуст“ во Ролс Ројс се појави во 2009 год. Тогаш Ролс Рој понуди нешто посовремено како во одделот за патниците така и во надворешниот дизајн каде господари современата линија, но со задржана традиција.
Моторот со турбо полнач развива 563 КС (или 592 во изведбата „блек беџ“) извадени од 12 цилиндри поставени во V со вкупна работна зафатнина од 6,75 л. Силината се пренесува до сите тркала преку автоматски менувач со осум преноси. На овој мотор расположливиот максимален вртежен момент е достапен веќе од 1.600 вртежи. Овде не се битни забрзувањата, крајната брзина, туку неговото беспрекорно тивко работење. Вибрациите и бучавата се сведени до крајно ниски граници, така што ќе си помислите дека автомобилот користи едра, а не класичен ото мотор. И секако, изолацијата игра голема улога во приказната за удобноста при патувањата, посебно обесените тркала тоа е друга димензија која конструкторите ја развивале цели 10 години и за првпат е вградена во обновената генерација „гоуст“ од 2020 година. Тој систем на обесување тркала за самоносечката шасија е наречен „планар суспенжн“, досега најсовршениот во светот. Со ширина од огромни 2.195 мм, „гоуст серија II“ е вистинска друмска лаѓа, а не автомобил. И сега некој ќе праша за цена. Таа воопшто не е тема на разговор и не треба да биде. Тука говориме за врвна удобност, за врвни благодети, за врвни уживања додека се усогласат желбите на купувачот, а не говориме за трговија.
Секој купувач ако сака може да понуди свои идеи за уредување на внатрешниот простор, односно преку денешните современи електронски уреди за разговор, клиентот може да се договара со дизајнерите додека таа (или тој) е некаде на некоја плажа во Куба.
Дали четвртата генерација од моделот „гоуст“ има полиран алуминиум, дрвени детали, кожени седишта, со барови за вашиот омилен пијалак, со уред за вдишување кислород итн. Тоа е реторско прашање, односно такво нешто не треба ни да прашате. Ова е зона на врвен луксуз, а не конфекциски автомобил.
Така работи Ролс Ројс и да нагласиме, додека во светот владееше рецесија во автомобилската индустрија пред околу две и пол десетлетија, овој производител забележа раст на производството и продажбата дури до 300 – 350 отсто.
ТОП НОВОСТИ
