Соборувањето рекорди во автомобилската индустрија е вечна тема. Производителите сакаат да се докажуваат пред светската јавност дека токму тие се најдобрите, во аеродинамиката, во крајната брзина, во заштеда на гориво, притоа изминувајќи најмногу километри и што уште не.
Годинава Рено слави 100 години од својот прв поставен рекорд и со цел истиот да се прослави, главните одлучиле да им дадат одврзани раце на конструкторите и дизајнерите да направат возило на електричен погон со кое ќе поставуваат рекорди во изминати километри со едно полнење на батеријата. Кога зборуваме за одврзани раце, тогаш вработените „збеснуваат“ и од таа раскалашеност произлегува концептот „филанте“.
„Рено филанте рекорд 2025“ е всушност лабораторија на тркала која ќе донесе многу податоци за обработка. Тој процес на испитување можеби е долг, макотрпен и по малку досаден, но е премногу важен за иднината на електричните возила. Овој прототип е тежок само 1.000 кг од кои дури 600 кг отпаѓаат на батеријата. Едноседот е долг 5,12 м, широк 1,17 и висок само 1,19 м. Сопирачките и управувањето не се со класична конструкција, туку командата од возачот се пренесува по електронски пат. Според изгледот сѐ е посветено на аеродинамиката, но производителот не ја нагласува и не дава никакви информации за неа. Првите рекорди ги очекуваме за некој месец, а Рено сигурно нема да испушти, а да не ги соопшти.
ТОП НОВОСТИ
