ПАТУВАЊАТА ВО ИТАЛИЈА СЕКОГАШ СЕ ЗАНИМЛИВИ, ВО ГОЛЕМА МЕРА И ПОРАДИ МАТЕРИЈАЛНИТЕ ДОБРА ШТО ГИ ПОСЕДУВА – ПРИРОДНИТЕ, ДУХОВНИТЕ БОГАТСТВА. ОСОБЕНО СИЦИЛИЈА, ОСТРОВОТ НА СРЕДОЗЕМНОТО МОРЕ ШТО ВООДУШЕВУВА СО СИТЕ НЕГОВИ УБАВИНИ, ПОГОДЕН ЗА РАЗЛИЧНИ ВИДОВИ ТУРИЗАМ, БЕЗ ИСКЛУЧОК НА ГРАДОТ РАГУЗА ЧИЈА УМЕТНОСТ, ИСТОРИЈА ПРИДОНЕСЕ ДА ГО ВПИШАТ НА ЛИСТАТА ЗА СВЕТСКО КУЛТУРНО НАСЛЕДСТВО НА УНЕСКО ПРЕД ТОЧНО 22 ГОДИНИ
Меѓу причините за посетата на Сицилија се вбројуваат и морските плажи, сонцето, природата, медитеранската клима, специјалитетите на сицилиската кујна, културата и секако, шармот на нејзините градови. Рагуза можеби не излегува директно на море, но близината овозможува често да одите на капење, сончање или само на прошетка. Оддалеченоста е 25 километри, од марината. Се наоѓа во срцето на Вал ди Ното (провинција Ното), во југоисточниот дел на островот каде што природната хармонија е восхитувачка, т.е. нејзината убавина. Дополнета со барокните зданија кои се надвишуваат поради местоположбата на градот. Рагуза всушност е планинска населба чии стрмнини ја прават уште подопадлива, попривлечна за туристите. Близу е устието на реката Ирминио, кое му припаѓа на резерватот меѓу пристаништето и Доналуката, местото со најубавите плажи.
Во двата кварта има дури 18 градби што се заштитени од УНЕСКО, и тоа: 2 катедрали, 8 цркви, 8 палати. Сепак, доколку сакате повеќе да се информирате за културната баштина, задолжително посетете некој од музеите – Археолошкиот, на пример. Сместен е во стариот дел, на првиот кат од Палацо Медитеранео, вклучително и локалитетот Камарина, близу Сколјити, сосе музејот. Па и Каукана, среде Пунта Сека и Марина ди Рагуза. Фактите за истоименото рибарско село од доцниот антички период се изненадувачки
ТУРИ ИНСПИРИРАНИ ОД ДЕТЕКТИВСКАТА ТВ-СЕРИЈА „ИНСПЕКТОРОТ МОНТАЛБАНО“
Вистинскиот процут на градот се врзува со времето по катастрофалниот земјотрес во 1693-та, кога почнал одново да се создава, прави. Архитектурата во стилот на барокот плени со својот раскош. Благодарејќи на големото количество материјални добра што ги поседува, стекнати низ историјата, на еден или на друг начин, Рагуза во 2002-ра ја додадоа на листата за светско културно наследство на УНЕСКО. Не случајно таму се снимени повеќето кадри од детективската ТВ-серија „Инспекторот Монталбано“. Како што се зборува, посетеноста на градот нагло се зголемила веднаш по првите епизоди, а туристичките водичи не пропуштаат ниедна можност да напомнат дека Рагуза се градела сугестивно, затоа изгледа по малку надреално. Се разбира, оттогаш е и поделбата на 2 градски четврти – Рагуза Супериоре и Рагуза Ибла.
Првиот се карактеризира со модернистички стил, но познат е и како градот на мостовите (вкупно 3) чија живописност ù парира на зелената долина по која поминуваат. Можете да прошетате малку по нив, да ги преминете. Од секој, и Понте Векио или Понте деи Капучини од 1843-та (потсетува на римските, поради сводовите) и Понте Нуово (изграден во 1937-ма, води кон Пјаца Либерта) и Понте Џовани XXIII или Понте Сан Вито од 1964-та (поврзува 2 дистрикта Квартиере дел Кармине и Квартиере деи Капучини), се гледаат малите куќи од камен, патеките и потокот, наместа скриен од бујната вегетација. Неизоставно и до каменоломот (Кава ди Санта Доменика). Патем, постојано ќе го чувствувате пријатниот мирис на билките.
Вториот е историски, во него се преплетуваат древноста и начинот (стилот) на живеење во согласност со денешнината. Во светски рамки е познат и по педесетината цркви, уште повеќето палати како најубави егземплари во стилот на барокот во Сицилија. За да се запазат нормите, правилата на структурализмот, многу се внимава на формите и во текот на нивните обновувања. Бидејќи се наоѓа на возвишение, кога ќе стигнете до највисокиот дел, погледот на долината сигурно ќе ве восхити. Доминантна е катедралата Сан Џорџо, која ги надвладува и уличките и малите куќи, не само со големината туку и со изгледот. Се смета за врв на барокот во стариот дел на градот. Последните неколку години е прогласен за најпосетен на островот.
Турите во организација на локалните водичи се инспирирани од детективската ТВ-серија, обично се посетуваат локациите, градбите кои можат да се видат во 37-те епизоди, меѓу нив и Пјаца Дуомо (срцето на Ибла, со гореспоменатата катедрала и скалите, но и со куќите на благородниците, каде што Палацо Ареци е највпечатлива) и Пјаца Пола со неговиот Чирколо ди Конверзационе. Исто така и црквата Санта Марија дел Џесу од 1636-та, со четирикатниот конак. Буквално секоја обиколка тргнува од Пјаца Сан Џовани со цел прво да се види катедралата Сан Џовани Батиста, која датира од периодот меѓу 17 и 18 век. Нејзината фасада е одличен пример за декоративен раскош, поделена на 5 дела со релјефни столбови, скулптури. Веднаш до неа е најголемата зграда од крајот на 18 век (Палацо Весковиле), а подолу по Корзо Италија се наоѓа Палацо Бертини чија предна страна ја красат 3 барокни лика, на благородник, просјак и трговец. Широка глетка на барконите зданија и Рагуза воопшто се открива од терасата на Џардино Иблео, градината богата со растенија кои се среќаваат само во тоа подрачје.
Архитектурата дефинитивно е главното обележје на стариот град, вклучително и обработките на варовиот камен – колонадите, спиралните столбови…, заедно со гротескните маски на фасадите и балконите во Палацо Ѕако (седиштето на Музео дел Темпо Контадино) и Палацо Козентини. Во таа смисла, бесценето богатство е и црквата Сан Џузепе, но и христијанскиот храм посветен на чистилиштето.
Туристичките водичи со задоволство ќе ве одведат и во Сан Паоло, најстариот дел на Рагуза Ибла со цел да го доживеете маалото на ист начин со неговите жители од дамнина. Ќе се чувствувате инаку, како времето да запрело во минатите векови, шетајќи се низ лавиринтот од улички, скали, мали куќи. Таму е апостолската парохија, има и неколку гробници. Во близина се наоѓа и каналот. На другата страна е импозантната црква Санта Марија деле Скале, но и Сан Бартоломео и Кармине.
ПИВО ЗА ПОТПОЛНО СЕТИЛНО УЖИВАЊЕ, СО СКАЧА
Со доаѓањето на пролетта, градот живнува. И неговите жители стануваат повесели. Расположението навистина е добро. Културни настани, случувања има во изобилство. За сечиј вкус. Ангажираноста е повеќе од мерак, не ја доживуваат како работна обврска. Со своето присуство им даваат душа. Свеста, но и чувствата неретко ги претставуваат во форма на мурали, графити. Дел од нив се направени за време на т.н. ѕиден фестивал, кога надворешните ѕидови служат како подлоги за уметнички слики, претворајќи ја Рагуза во музеј на отворено.
Љубителите на театарските претстави можат да уживаат во изведбите на драмските, сценските дела во замокот Донафугата, креативниот простор Казамата, Театро Перакио, Дуемила… Следниот месец ќе биде исто така богат со настани како и минатиот. Акцентот секако ќе се стави на маскарадата (4 и 5 мај) и празникот посветен на Сан Џорџо (од 24-ти до 26-ти). Всушност, верските празници се слават наголемо, особено кога е патронат – Сан Џовани (од 27 до 29 август). Црковната процесија на која се носи статуата на светецот, изработена од варов камен, минува низ улиците на градот, проследена со музика. Во исто време има и парада на запрежни коли. Тогаш Рагуза се трансформира во голем панаѓур. Исто е и во текот на Бироко. Штандовите секогаш се преполни со гости, да пробаат некое од пивата на домашните производители, над 100 и да каснат нешто, некој специјалитет на сицилиската кујна. Годинава ќе се одржи на пристаништето, од 16 до 18 август.
Напладне, особено во средите, независно од сезоната, Контрада Селваџо ги збира хедонистите, кулинарите пред сè, да се снабдат со прехранбени продукти за наредните денови, да ги споделат искуствата со испробувањата нови рецепти, без оглед на тоа што повеќето се држат до старите, веќе докажани. Пазарот нуди и други производи, но сепак готвењето храна е главна тема на разговор меѓу пазарџиите, и купците и продавачите. Никако не пропуштаат да си поприкажат за деликатесното сирење (правола) што се прави од млекото на кравата модикана, која е автохтона раса од Рагуза, но и за т.н. скача, јадење што најмногу се купува на улица. За со пиво. Или за со вино. Сепак, често се приготвува и дома, на различни начини. Можат да се користат и лазањи.
Навечер младите се собираат на Пјаца Сан Џовани, седат на терасата и скалите пред катедралата, пијат обично пиво и разговараат. Ноќниот живот на островот генерално е надвор се разбира, освен кога студи. Во тој случај се префрла внатре, во угостителските дуќани, т.е. локалите. Подоцна се упатуваат кон Марина ди Рагуза и таму остануваат до изутрина. Атмосферата ја опишуваат како весела, опуштена. Доброто расположение всушност е гаранција за убав помин, а таму, покрај море, на плажа, и едното и другото го има на претек. Поинаку и не може да биде. Забрзаниот ритам на срцето е во правопропорционален однос со оној на танцот, музиката. Последните неколку години и Рагуза и Сицилија воопшто сè повеќе ги привлекува и младите луѓе, кога во прашање е туризмот, како нивна омилена крајна дестинација.
ТОП НОВОСТИ
