РАЧНА ИЗРАБОТКА ВО САМО НЕКОЛКУ ДЕСЕТИЦИ ПРИМЕРОЦИ, НАЈСОВРЕМЕНА ТЕХНОЛОГИЈА, СКАПИ И КВАЛИТЕТНИ МАТЕРИЈАЛИ, ДИЗАЈН СО НАГЛАСЕНА НАУЧНА ФАНТАСТИКА И КУПУВАЧИТЕ СЕ ПОДГОТВЕНИ ДА ПЛАТАТ МАЛИ БОГАТСТВА ЗА ЕГЗОТИЧНИ НАПРАВИ И СЕКАКО ВРВЕН ЕКСКЛУЗИВИТЕТ.
Современите направи со нивната напредна технологија наоѓаат примена буквално насекаде. Кога се во прашање моторните возила, кај нив високата технологија влезе некако нееднакво. Додека во автомобилите влезот на високата технологија е секојдневна, во мотоциклите се вградуваше многу споро и некако оскудно. Зошто е тоа така, тоа си знаат тие што ги произведуваат. Ако во автомобилите системите за стабилност, за против блокирање на сопирачките и дигиталните инструменти почнаа да се вградуваат некаде на крајот од ’80 години од минатиот век, мотоциклите во тоа време можеа само да сонуваат за такво нешто. Денес нештата се изменија така што и мотоциклите ги имаат речиси сите современи направи што ги поседуваат нивните роднини на четири тркала.
Е сега ако некој ви рече дека е направен безбеден мотоцикл, односно пред сè крајно стабилен, ќе го погледнете со недоверба и нема да му замерите на неговата фантазија. Но не е до неговата фантазија туку до умеењето на Хонда, а потоа и брилијантниот конструктор и дизајнер Игор Чак. На основа од Хондиниот модел „цбр 1000 рр“ претходно спомнатиот дизајнер го конструира најбезбедниот мотоцикл наречен „чак молот“. Уште на излезот од матичната фабрика мотоциклот е беспрекорно избалансиран до крајни граници, а на сето тоа Игор Чак ги додава сите безбедносни системи кои денес се познати. Сопирачките сами реагираат постепено ако мотоциклот се доближи до друго возило пред него на 30 метри, а истовремено се пали и соодветно поле на дигиталната табла со инструменти. Во крајните надворешни агли од ретровизорите се активира светлосна сигнализација ако се појави возило во таканаречената „слепа точка“, а рачките почнуваат да вибрираат ако предната и задната камера регистрираат потенцијална опасност. Покрај камерите има и сензори, но и радарски системи кои ја пратат состојбата на патот 500 метри пред и позади мотоциклот. За оваа супер играчка на Русинот Игор Чак именувана како „ ќе треба да платите 75.000 швајцарски франци, а фирмата која го продава мотоциклот се наоѓа во Сент Петерсбург.
Тие 75.000 франци не се нешто посебно во споредба со 280.000 швајцарски франци кои треба да ги издвоите за „фелине уан“, мотоцикл направен од најнови и најскапи материјали што се познати во светот. Швајцарскиот дизајнер Јакуба Гале го конструира својот мотоцикл спорeд сопствено убедување, а тоа убедување ќе го чини секој сопственик мало богатство – види ја горнаведената сума. Три цилиндри со зафатнина од 801 ccm и 170 КС не изгледаат толку моќно но кога ќе се спомне неговата сува тежина од само 155 кг, е тогаш мислењата се менуваат за 180 степени. Сопственикот Јакуба Гале вели дека во период од десетина години возел повеќе мотоцикли, најдобрите кои денес можат да се купат. Незадоволен од некои нивни својства решава да направи мотоцикл, но со сите добри особини од тие десетина што ги имал возено. Покрај тоа вели дека ултра современиот дизајн мора да биде пропратен и со врвни материјали како авионскиот метал (легура на основа од алуминиум), карбон фибер и титаниум. Неговата табла со инструменти не се наоѓа само на нам познатото место, туку на други делови од мотоциклот има дигитални мини монитори (на резервоарот, на врвовите од вулушката и тн) на кои се добиваат најразлични информации, нешто слично како мотоциклот од филмот „малцински извештај“. Практично сето тоа може да се подеси според желбите на возачот, што сака да види на тие мали лед екрани. Неговите технички особини и способности не се во прв план затоа што секој супер мотоцикл што е во производство ги поседува сите нив. Сепак се поставува каде се „губи“ осетот при формирање толку висока цена – 280.000 ш. франци? Таа цена помножена со само 50 примероци ни одблиску не ги задоволува барањата на клиентите, но затоа ексклузивноста е врвна.
Од земјата на чоколадото, банките и златото одиме во гости кај Лотус кој наместо спортски купе автомобил претставува мотоцикл, толку нетипично за него, инаку најпознат во светот по своите лесни спортски автомобили и по трките во формула 1. Сепак тој мотоцикл не е направен од Лотус и неговите конструктори иако го носи името на Лотус, туку од германската работилница „Кодева“ која го има правено мотоциклот со дозвола од Лотусовата работилница.
Неговиот современ, но истовремено и ретро дизајн многу потсетува на тркачки автомобили со името Лотус, така што може да кажеме со сигурност дека дизајнерот и конструкторот Колин Колес многу добро знаел што прави. Затоа дизајнот на мотоциклот со име „лотус ц 01“ е повеќе од успешен – типичен Лотусовски, токму таков каков што треба да биде. Работната зафатнина на погонската единица изнесува 1,2 литри и развива 200 КС. Неговата тежина од 181 кг е поставена на пневматици со димензии 120/70 зр 19 и 190/55 зр 17. Ограниченото производство гарантира строга ексклузивност, но и ексклузивна цена – 140.000 швајцарски франци. Концепти, ендемични метало карбонски машини на две тркала и сето тоа запакувано со превисока цена. Колку е цената оправдана или не, не сме тука за тоа да расправаме, туку да претставиме. Пред сè спомнативе марки мотоцикли се своевидна егзотика правена според нови проекти, нови конструкции, нови мерења и подесувања и сè тоа се прави само за неколку примероци. На ова се додаваат ултра лесните и прескапи материјали, за на крај да се додадат зачините: ексклузивност, луксуз и престиж. И сега кој сака ваква „турлитава“, ќе си ја плати, но затоа ќе биде еден од ретките во светот со таков мотоцикл и тоа е тоа. Ете како се наплатува ултра модерниот дизајн, скапите материјали и квалитетни материјали и ограниченото производство, но и рачната изработка која без пардон треба и мора високо да се вреднува.
ТОП НОВОСТИ
