ЕКСТРАВАГАНТНО ВО СЕКОЈ ДЕТАЉ, ROCKET GTS Е ЕКСКЛУЗИВНО ПАРЧЕ НА АВТОМОБИЛСКИ БРИЛИЈАНТ ВО КОЛЕКЦИЈАТА НА BRABUS, ЦЕЛОСНО ИЗРАБОТЕН ОД ГОЛ КАРБОН-ФИБЕР И СПОСОБЕН ДА РУШИ БРЗИНСКИ РЕКОРДИ
Ботроп, малото германско гратче повторно блеска обележано на мапата на автомобилската ексклузива. Прославено заради престижното тјунерско ателје Brabus, во Ботроп, од 1977 година се исполнуваат желбите на екстравагантните автомобилски ентузијасти. Иако Brabus е познат по создавање на фино тјунирани врвни изведби на постоечки модели, не се срами, одвреме-навреме, да замине на екскурзија во создавање на несекојдневни автомобилски форми. Инженерите и дизајнерите на Brabus имаат храброст и дрскост да прифатат предизвик и да одговорат на барањата на индивидуален предлог, создавајќи уникат поставен на основата на актуелен модел.
Токму од оваа дрскост доаѓа новиот скапоцен камен во круната на Brabus наречен Brabus Rocket GTS. Со него уметноста на изработката на каросериски додатоци, но и целосни каросерии Brabus ја поставува на повисоко рамниште. Првпат во својата безмалку педесетгодишна историја Brabus создава караван на основата на кабриолет, целосно изработен од гол карбон-фибер со откриена структура кој е прекриен со проѕирен заштитен слој на лак со висок сјај.
Основата за Brabus Rocket GTS доаѓа од ергелата на Mercedes – AMG, а станува збор за SL 63 S E Performance чии сериски: 612 КС од 4.0 V8 битурбо + 204 КС од електромотор, комбинирани 1.420 Nm, и катапултирачки 2,9 секунди од место до 100 km/h, евидентно не се доволни за ботропјаниве.
ЗЛОКОБНА УБАВИНА
Спектакуларниот караван гранд-турисмо со три врати, плени, но и застрашува со својата појава. Тој е типичен пример на филозофијата на градба во која формата ја следи функцијата и нуди злокобна убавина. Секој панел од каросеријата, секој отвор и секое прекршување не се случајни. Сите тие се внимателно оптимизирани во аеродинамички тунел и имаат, и аеродинамичка, и техничка функција.
Драматичноста на Rocket GTS почнува од застрашувачката муцка со огромни отвори во предниот браник. Тие го насочуваат воздухот кон сопирачките, и кон ладилниците за мотор, интеркулер и хибриден систем. Предниот спојлер го намалува подигањето на предната оска при високи брзини подобрувајќи ја стабилноста и прецизноста на управувањето. Браникот се слева во масивно испакнати предни крила потребни да се вдомат огромни тркала од 21 инч со гуми 275/35 ZR21, но, и во нив да се отворат шкрги за одвод на врелиот воздух од моторот и сопирачките.
Очекувано впечатлив е и продолжениот кров кој се спушта во косо задно стакло и го претвора кабриолетот во караван, со доволно простор во багажникот и 2+2 места за седење во кабината. Кровот завршува во спојлер и стрмно се спушта кон уште поиспакнати задни крила кои вдомуваат уште поголеми тркала од 22 инчи со гуми 335/25 ZR22. Нагласениот раб од задните крила се претопува во спојлер во подножјето на задното стакло. Двата спојлери во комбинација со огромниот дифузор во браникот обезбедуваат високи вредности на негативен потисок на задната оска. Така и при брзини од преку 300 km/h Rocket GTS е залепен за асфалт.
Одзади штрчат четири цевки од спортскиот издув целосно изработен од титаниум. На излезот од браникот цевките се обложени со карбон-фибер во кого се вметнати црвени прстени LED кои го осветлуваат издувот. Благодарение на активна клапна звукот на издувот може да се прилагодува зависно од условите на возење. Од тивок шепот при приод во двор, до моќен татнеж на отворен пат.
ВИНОВНИК ЗА МОЌНИОТ ТАТНЕЖ
Сериозно навиен 4.5 литарскиот V8 битурбо е виновен за моќниот татнеж на Rocket GTS. Потекло води од 4.0 литарскиот V8 битурбо на Mercedes-AMG, но покрај зголемување на зафатнината преработен е целосно за да ги задоволи потребите на Brabus. Проширен е дијаметарот на цилиндрите на 84 mm, и зголемен е одот на коленестото вратило на 100 mm. Тоа е изработено на CNC машина од полно парче метал, термички е обработено и внимателно балансирано. Клиповите се ковани и полесни. Турбо полначите имаат поголема комора, посилни тркалачки лежишта и создаваат притисок од 1,4 бари.
Моторот Brabus премиерно го претстави во Rocket 900 “One Of Ten” за кого веќе стана збор во овие редови. Во него турка масивни 900 КС и 1.250 Nm. Но, подоцна за во Rocket 1000 “1 OF 25”, за кого исто така стана збор во овие редови, во Brabus му ја намалија моќноста на 796 КС. Целта беше, со додавање на дополнителни 204 КС од електричен мотор, моќноста да застане рамно на 1.000 КС. Вртежниот момент, пак, од 1820 Nm електронски е ограничен на 1.620 Nm за да се сочуваат: менувачот SPEEDSHIFT MCT9 со можност за рачно менување на степените, погонот на четири тркала 4MATIC+, и на задна оска поставен спортскиот диференцијал со ограничено пролизгување.
Сета оваа техника во целост ја наследува и Rocket GTS, но во значително полесно пакување. За разлика од колосот Rocket 1000 тежок 2.380 kg, Rocket GTS на вага покажува 1.900 kg и затоа има за нијанса подобри перформанси. Катапултирањето од место до 100 km/h се случува во 2,6 секунди, за до 200 km/h му требаат 9,5 секунди и за до 300 km/h му требаат 23,6 секунди. Максималната брзина е ограничен на 317 km/h, а причината за оваа интервенција е да се сочуваат гумите.
ДУХ НА ГРАНД-ТУРИСМО
Brabus Rocket GTS не е создаден да биде тркач, иако според техниката и бесните перформанси овој епитет е дел од неговиот геном. Тој е создаден во дух на врвен гранд-турисмо автомобил кој ќе биде корисен како на долг пат, така и секојдневно во град. Затоа поткрепени од една ваква идеја инженерите го удостоиле со воздушно потпирање наречено SportXtra. Потпирањето е способно меко да пегла нерамнини кога е избран модусот Комфор, и да биде спремно за трка спуштајќи го автомобилот за 20 mm во модусот Спорт.
СОВРШЕНСТВО ВО СЕКОЈ ДЕТАЉ
Вака гласи мотото на Brabus кое не се однесува само на техничката брилијантност туку и на посветеноста при изработка на внатрешноста. Благородното уредување типично за ателјето од Ботроп се повторува и во Rocket GTS, претворајќи ја кабината во едно совршено изработено ремек-дело. Затоа на седиштата е сошиен амблемот Brabus Masterpiece со изгравиран потпис на мајсторот задолжен за изработката. Идните сопственици на Rocket GTS можат да бираат широка палета од бои, материјали и дезени за поставување на кабината.
За да се совпадне со нијансите на голиот карбон-фибер на каросеријата врвните мајстори на Brabus за во кабината одбрале исклучително мека кожа во темно сива боја. Со неа се преслечени централниот дел од седиштата, панелите на вратите, делови од арматурата, централниот гребен и воланот. Таванот, столбовите, горниот дел од арматурата и од панелите на вратите се преслечени со Алкантара. Овој фин материјал го има на страниците, на задниот дел од седиштата, и на потпирачите за глава. Детали од гол карбон-фибер пак има на централниот гребен и на воланот.
Начинот на уредување на претставениот Rocket GTS е само пример, а на идните сопственици кои ќе го нарачаат ова ремек-дело на автомобилска брилијантност Brabus е подготвен да им ги исполни и најспецифичните барања. Секако за соодветен надоместок. Планот на Brabus е да го произведува Rocket GTS исклучиво по нарачка и во ограничена серија, според личните желби на клиентот. Цената права ситница. Почнува од 794.758,40 европски банкноти без давачки.
ТОП НОВОСТИ
