СТРЕСОТ НА РАБОТА, ОБВРСКИТЕ И МАЛКУТО ВРЕМЕ ШТО СИ ГО ПОСВЕТУВАМЕ НА СЕБЕ И НА НАШИТЕ НАЈБЛИСКИ ДЕЛУВААТ ИСЦРПУВАЧКИ ВРЗ НАС. ЗА СРЕЌА, ПОСТОИ НАЧИН ДА ГИ НАПОЛНИТЕ БАТЕРИИТЕ, ДА ЈА ВРАТИТЕ ХАРМОНИЈАТА И ДА СЕ ОПУШТИТЕ ВО ДРУШТВО НА САКАНАТА ЛИЧНОСТ. ПОЧЕСТЕТЕ СЕ СО ВИКЕНД ВО ЕДЕН ОД МНОГУТЕ СПА ЦЕНТРИ И РЕЛАКСИРАЈТЕ СЕ СО НИВНИТЕ ПОНУДИ. ПРОВЕРЕТЕ, УЖИВАЊЕТО Е ЗАГАРАНТИРАНО, А ПО САМО ЕДЕН ВИКЕНД ЌЕ СЕ ЧУВСТВУВАТЕ КАКО ДЕСЕТ ДЕНА ДА СТЕ НА ОДМОР
Во последнава деценија-две сè повеќе се зборува за ,,убаво живеење’’, идеја која подразбира грижа за сопственото тело и ум, негување на вредности кои влијаат позитивни на нас самите, но и на нашата средина и луѓето околу нас. Денес, се внимава на штетните последици од модерното живеење, се зборува за здрава храна и правилен начин на исхрана, на одржување на физичкото здравје на телото. Веќе не зборуваме за здравјето единствено како отсуство од болести, туку како позитивно, органско чувство кое произлегува од нашата ангажираност да се постигне баланс меѓу умот, духот и телото. За овие факти сигурно била свесна и постарата генерација, но била свесна и човечката цивилизација, бидејќи луѓето од памти век оделе во бањи, се мачкале со кал и користеле разни третмани од познати билкари…
Позитивните енергетски својства на минералните води и на земјата која тие ја наводнувале, квалитетниот планински воздух, ефектите на џакузито им биле познати и на старите Грци и Римјани, Јапонци и на нашите баби и дедовци. Античките народи и Јапонците особено, ги одбирале најубавите места во Европа и поробените земји за нивни велнес дестинации; „нашите“ оделе во Катланово, Негорци, Врњачка Бања или Бања Лука. Бањата и поминувањето време во базени со топла вода е, исто така, поврзано со здравје и терапија, практика која очигледно никогаш не излегла и нема да излезе од мода. Во овој број, решивме да ве орасположиме со понудата за бањи во нашиот регион, но и да ви предочиме некои бањи, или велнес центри надвор од нашето поблиско соседство. Вистинскиот избор направете го вие и поминете убав викенд, а зошто да не и новогодишни или божиќни празници и уживајте во благодет што ви го нуди природата.
ИЗБЕРЕТО ГО НАЈДОБРОТО ЗА ВАС
Порано луксузните хотели не можеа да се замислат без велнес понуда и бања, денес бањите се натпреваруваат со хотелите па во склоп на нивните комплекси додаваат приватни апартмани, јапонски кади, специјални тушеви и сè поегзотични третмани, терапии и фитнес програм кои се под влијание на денешното брзо живеење и невиден потрошувачки порив. Сега терапиите вклучуваат методи од заборавени култури и далечни места но и најнова медицинска технологија, сè со цел да се разликуваат на огромниот пазар на подобро живеење. Во принцип, секаде во светот, па дури и Бугарија или Словенија, можете да добиете шведска масажа и бања вредна колку употребените соли.
ВРЊАЧКА БАЊА КРАЛИЦА НА БАЊСКИОТ ТУРИЗАМ
Доколку сакате да поминете романтичен викенд со вашиот партнер или со вашето семејство на навистина посебен начин и да имате незаборавно искуство, престојот во некој од спа центрите во Врњачка Бања е вистинскиот избор за вас. Покрај тоа што е позната по лековитите извори и здравствениот туризам, Врњачка Бања има што да понуди. Со својата содржина и богата понуда, претставува атрактивен туристички центар за оние кои сакаат забава и нови искуства. Куриозитет на ова место е што тука се наоѓа единствениот топол извор чија температура е исто толку висока колку и температурата на човековото тело, или 36, 5 степени Целзиусови.
Самото гратче е симпатично, сместено околу голем парк, а во неговата околина се наоѓаат средновековни згради заштитени од УНЕСКО.
Ако и тоа не е доволно да се посети овој град на термални бањи, тогаш можеби ќе ве привлечат двата манастири од тринаесеттиот и дванаесеттиот век. Природни извори можат да се најдат на пет различни места во познатиот парк, чија топла вода (36 степени) е иделна за масажа, а ладната (17 степени) е доволно енергетизирана и служи за подмладување и закрепнување.
Од седумте минерални извори во Врњачка Бања, четири се користат во медицински третмани. Во гратчето има бројни хотели, најчесто со базени. Рестораните најчесто се наоѓаат покрај некој поток или извор има имаат многу пријатни тераси под парковите дрва. Постојат многу причини зошто Врњачка Бања е идеална дестинација за одмор, без разлика дали патувате сами, во парови или со деца.
БИСЕРОТ НА ЧЕШКА
Во Европа, едно од попознатите дестинации кои постојат благодарение на свесноста за убавиот изглед и здравото тело, е чешкото гратче Карлови Вари, кое се наоѓа 81 км западно од Прага, во покраината Бохемија. На бреговите на реката Тепла, тоа е место во чија убавина уживале европски императори, уметници, писатели, како Гете и Бетовен.
Станува збор за планинско место кое имате впечаток дека намерно е изградено во срцето на густа шума само за да личи на место од бајките. Атмосферата на главното шеталиште е мирна и спокојна и покрај многуте туристи кои итаат да се напијат од лековита та вода. Секоја услуга се прави сталожено и со достоинство па дури имате впечаток дека се враќата назад во времето, кога богатите европејци уживале во чипкасти фасади на хотелите, свежиот воздух и здравиот живот. Името во буквален превод значи ,,бањите на Карло’’ а Карло е кралот на овој регион и Свети Римски Император Карло Четврти, основано во 1370 год. Топлите извори исфрлаат топла минерална вода која служи во различни терапевтски цели, а најголемата температура на водата може да достигне и 73 целзиусови степени. Во Чешката република, најголемиот дел од третманите во бањите мора да бидат препишани од страна на лекар (физикални терапии, или лечење некои посериозни заболувања како артритис), но некои им се достапни на сите и без никаков рецепт, а тоа се минералните бањи и масажи каде може да уфрлите и некоја лековита бања или третман. Тука, посетата во некоја од бањите треба да се резервира ден, два однапред.
Во гратчето има неколку клинички бањи кои имаат точно определен распоред и работат многу дисциплинирано кога станува збор за пациенти и луѓе со болка. Ваквиот вид потрошено викенд време е примамливо за скоро секоја старосна група. А доколку навистина полагате сметка на вашето целокупно, ментално и физичко здравје, на вашата добросостојба и правилно функционирање, тогаш секако ќе успеете да се најдете во можност да си дозволите такво нешто. И соседна Бугарија не заостанува во своите понуди кога станува збор за спа центрите и тоа на неполни 100 километри од Скопје. Ќустендил е прогласен за бањско одморалиште од страна на Бугарското министерство за култура, а самиот град нуди и воздушна бања, пријатни шеталишта, ресторани…
Античкиот град Пауталија кој се наоѓал на местото на овој денешен бугарски град, бил познат по посебните лековити извори и бањскиот потенцијал, па уште од тоа време бил омилено место за наоѓање внатрешен мир само на високите граѓани на римската империја. Некои од хотелите нудат услуги проследени со посебни подготовки на телото и умот. Тие сметаат дека телото мора да биде соодветно спремно пред да се земе третман во сауна бидејќи ефикасноста на процедурата од престојот во загреана просторија зависи од тоа. Пред влегувањето во сауна не треба да се користат продукти кои би довеле до негативна реакција со комбинацијата од продукти која ја нудат таму. Минералната вода во бањите може и да се пие бидејќи е хемиски стабилна и збогатена со минерали. Оваа вода има широка употреба и во различните третмани поврзани со здравствени проблеми.
СЛЕДЕТЕ ГИ ПРАВИЛАТА НА ЗДРАВО ЖИВЕЕЊЕ
Словенија ќе ве воодушевува со својата обемна велнес понуда, која вклучува вкупно 15 природни бањи. Без разлика дали сте во Панонската низина, во карстниот регион на Алпите или во Средоземното Море, насекаде има термални минерални извори. Во лекувалиштето Рогашка Слатина извира дури и минерална вода, која по својот состав е најбогата со магнезиум во целиот свет. Повеќето бањи се наоѓаат на североистокот на земјата недалеку од Марибор и во близина на Австрија. Без разлика кој од велнес центрите ќе изберете ќе наидете на одлична атмосфера која опушта, a гостопримството, традиционалната и иновативна понуда, и велнес третманите се гаранција дека сигурно ќе се вратите освежени, подмладени и добро одморени.
Во овие центри сè потклекнува на концептот на здрав животен стил. Одговорните сметаат дека велнес е филозофија на живеење која го зајакнува телото и умот на различни начини. Зачувувањето на здравјето и добросостојбата, и чувството на задоволство со себе и во себе е подеднакво важно како и самиот стандард или квалитет на живот. Почитта кон нашето тело, релаксирањето и ослободувањето од стресот и зајакнувањето на физичката рамнотежа се сметаат за правила во здравото живеење. Свесноста за сопствените витални способности и добрата кондиција се цели кои се остваруваат по престојот во овој хотел.
И Унгарија е позната по бројните термални извори, велат ги има повеќе од илјада. Особено во западниот дел на земјата, во Панонија, постои традиција на благосостојба која се развива со векови. Овој дел од Унгарија е познат и како „регион кој дава сила“. Во „унгарската улица на бањи“ има места со термални бањи како што се Бад Бук, Бад Хевиз или Бад Сарвар, од чии извори извира вода со температура од 43 степени Целзиусови, а во некој и до 83 степени.
И Македонија не заостанува зад Европа во бројните минерални и термоминерални извори кои постојат во земјава, лоцирани во пејзажните и живописни шумски предели, отсекогаш биле свртувалиште на голем број случајни минувачи, но и на оние кои барале спас во лековитата моќ на водата. Околу нив не случајно отсекогаш се граделе лекувалишта, бањски објекти и спортски терени, сè со цел да се привлечат што поголем број посетители.
Во Македонија има околу 64 извори со различна температура на водата која се движи меѓу 20 до 72 степени целзиусови. Тие се богати со сулфур, фосфор, арсен, јод, бром и други елементи, кои имаат лековити терапевтски својства. Во земјава постојат осум бањи: Бања Банско-Струмица, Бања Кежовица-Штип, Бања Негорци-Гевгелија, Бања Бања-Кочани, Проевска бања-Куманово, Бања Бањиште-Дебар, Бања Косоврасти -Дебар и Катлановска Бања-Скопје. Во нивна непосредна близина или во рамките на комплексот се наоѓаат хотели, мотели и други сместувачки капацитети.
Бања Банско претставува римска бања, која е термоминерално лекувалиште од античко време. Овој објект е оддалечен околу 12 километри источно од Струмица, во подножјето на планината Беласица . Откриен е во 1978 година, при копањето на темелите на хотелот „Цар Самоил“. На површина од 1.000 м2 се откриени десет простории. Малите ниски простории се наоѓаат на источната страна, а на западната страна се наоѓаат повисоките простории. Ѕидовите се зачувани во височина од 2 метра до 6,70 метри.
Термата (бања) имала простории за соблекување, сауна, базени со топла, ладна и млака вода итн. Бањата ги користела термоминералните води од изворот „Парило“, што се наоѓа 50 метри јужно од бањата. Термата најверојатно потекнува од III век, од времето на римскиот император Каракала (211- 217), кој подигал и обновувал терми низ империјата.
Бања Банско има забележителен капацитет како основа за развој на спа и бањскиот туризам. Водата на Банско спаѓа во групата на сулфурни, алкални и азотни води кои во себе содржат ретки минерали . Таа доаѓа од големи длабочини и нема атмосферски влијанија. Обилноста и температурата на водата не се менува што има посебно значење за нејзиното искористување. Викенд патувањата стануваат сè попопуларни кај нас, а многуте ресорт хотели подготвуваат специјални пакети со две и три ноќевања. Дали тоа ќе биде пристојна бања во нашата најнепосредна близина, или, пак, некоја „екстраваганција“, за што и да се одлучите, тоа го правите за вас самите. Прочистено, ревитализирано тело полно со енергија се постигнува со спокоен, балансиран ум, а токму тоа е целта на ваквите престои.
ТОП НОВОСТИ
