МАЛИОТ ПРИНЦИПАТ НА ФРАНЦУСКАТА РИВИЕРА, КОЈ СЕ ПРОТЕГА НА ПОВРШИНА КОЛКУ ПОЛОВИНА ЦЕНТРАЛ ПАРК НА МЕНХЕТЕН ВО ЊУЈОРК, ВЕЌЕ 150 ГОДИНИ Е ПОПУЛАРНА ДЕСТИНАЦИЈА ЗА ПАТУВАЊЕ НА МОНДЕНИТЕ, ГОЛЕМИТЕ БОНВИВАНИ, МЕЃУ НИВ И УГЛЕДНИТЕ БОГАТНИЦИ МИЛИЈАРДЕРИ ШТО НЕРЕТКО СЕ ОДЛУЧУВААТ ДА СИ КУПАТ И СТАН ВО МОНТЕ КАРЛО, ЕДЕН ОД ШЕСТЕ МОНАЧКИ ДИСТРИКТИ, ПО БАСНОСЛОВНА ЦЕНА
Вдахновението за единственото искуство кое го гарантира посетата на Монако е толку големо што нема крај секако, благодарејќи на убаво разработениот механизам по кој принципатот привлекува голем број туристи, заинтересувајќи ги и најпребирливите. Без оглед на тоа што е многу, необично мал се протега на површина од само 2,08 км² (208 хектари), неговата местоположба е идеална се наоѓа на крајбрежниот појас на копното, покрај морето, а одзади е планината Ејгл (фр. Ажел), која инаку ù припаѓа на Алпите. Од Ница е оддалечен 13 км, безмалку во правец на границата со Италија. Доколку се одлучите за авионски превоз, тоа ви е единствена опција – се разбира, со прекачување бидејќи нема директна линија. Оттаму се патува со воз (20-тина минути, билетот чини околу 4 € во една насока) или со автобус (40-тина мин., картата е близу 1,5 €). Можете да изнајмите и моторно возило, освен ако не се решите да го возите целиот пат до Монако – 1.745 километри. Тур операторите велат дека Моначан(к)ите се мајстори кога е оваа стопанска гранка во прашање, со ненадминлива вештина на гостопримство. Нивна примарна цел секако е задоволувањето на барањата на туристите, вклучувајќи ги и резидентите и останатите. Принципатот брои 38.000 жители горедолу, а повеќе од 200.000 лица угостува секоја година. Бројката можеби и не е толку висока во споредба со други места ширум светот кога се работи за посетеноста, но сепак е задоволителна, особено ако се земе предвид раскошот, луксузот со кој се одликува и сосема неизбежно големата скапотија, т.е. високото ниво на цените за некои работи, производи…, , но не сите.
ПРОГРЕСИВНОСТА РАКА ПОД РАКА СО ДЕКАДЕНТНОСТА
Монако во изминатиот период имаше за цел да ја доведе понудата до совршенство, не само да биде голема туку и квалитетот да не трпи на сметка на квантитетот. Модернизмот ни малку не им пркоси на историските, културните знаменитости, доследноста на својата ДНК е императивна. Пионерските потфати се општопознати напредокот, стремежот кон иднината оди под рака со декадентноста. И сето тоа зачинето со великолепност, надворешен блесок на градежните објекти, архитектурата. Во комбинација на визуалите од милион евра и повеќе, заради рамнотежа со неверојатно големата скапотија, баснословните цени на становите, особено во Монте Карло каде што се и хотелите со 5 ѕвезди (Hôtel de Paris Monte-Carlo, Hôtel Hermitage MonteCarlo, Hôtel Métropole Monte-Carlo, Monte-Carlo Beach) и секако, двете надалеку прочуени казина (Casino Café de Paris и Casino de Monte-Carlo). Придавката „луксузен“ се врзува и со шопингот и со ноќниот живот, па дури и со натпреварувањата, спортските борби. Задолжително и со Monaco Yacht Show на крајот на септември. Годинава ќе се одржи од 25-ти до 28-ми. Локацијата е добропозната Port Hercule. На 33. издание под покровителство на неговото височество, принцот Алберт Втори од Монако, ќе бидат изложени 560 најнови модели на јахти со заедничка особеност раскошот.
Убавината на принципатот е восхитувачка, особено во пролет и налето, без исклучок на другите 2 годишни времиња, посебно за време на празниците. Монако е приспособено за сите, буквално. Само да се добронамерници. Фактот дека во Монте Карло е скапо не може да се оспори, заедно со информациите за пристапните цени во останатите 5 дистрикти некои не само што се идентични со тие во Ница на пример туку се и пониски. Безбедноста е на високо ниво, жандармите постојано се присутни на најважните точки, а и камери има секаде. Тоа што паѓа в очи е чистотата исто како и зеленилото, дополнето со цветен колорит. Во него се полага голема љубов и внимание. Како што се зборува, во чест на Грејс Кели. Холивудската актерка се омажила за принцот Рание Трети во 1956-та. Денес на тронот е принцот Алберт Втори кој го наследи татка си веднаш по неговата смрт во 2005 година. Семејството Грималди владее со државата од 13 век.
Доволен ви е само еден ден за да го прошетате целиот принципат, но сепак за впечатокот да биде комплетен, потребно е подолго време. Има што да се види. Монако е поделено на 6 дистрикти. Најпознат е Монте Карло, без сомневање. Place du Casino, Boulevard des Moulins и Saint-Charles Church се неговите амблеми. Објектот во кој се сместени коцкарницата и операта (Salle Garnier) е граден во т.н. бел епок, чијшто атриум е окружен со 28 столбови од оникс. Љубителите на оперските дела можат во исто време да уживаат и во погледот на морето, без исклучок на ентериерот со златни и декорации во црвена боја.
Градската четврт е одлична и за шетање на променадата и за шопинг во One Monte-Carlo каде што се бутиците на светски познатите дизајнери, брендови. Недалеку се наоѓа и Metropole (располага со 80 дуќани и 6 првокласни ресторани), откако ќе ги поминете Jardins des Boulingrins и Jardins de la Petite Afrique, уживајќи во нивната убавина. Преку Avenue des Spélugues ќе стигнете до свијокот на патеката за Формула 1 која се одржува секоја година во мај. Попатно ќе го забележите Buddha-Bar чија ориентална тематика можеби ќе ве заинтригира да го посетите навечер, да испиете по еден „имза“ коктел, да вкусите нешто од фината азиска кујна и потоа да продолжите на забава со резидентниот диџеј. Освен за хазардерите, Монте Карло е рај и за вистинските гурмани. Неколкуте готвачи кои ја стекнале ѕвездата на „Мишелин“ сигурно ќе ве воодушеват со своите јадења, како на пример Yanick Alléno и фашираниот бас со желе од ѓумбир во ресторанот Павилјон на хотелот Ермитаж. Иновациите во коцкањето е тоа што играчите на среќа ги привлекува, освен адреналинот. Во стилот на Џејмс Бонд, водечката мисла на Casino de Monte Carlo на плоштадот именуван по него е „Кој ризикува, тој добива“. Исто како и на Casino Café de Paris чиј избор на слот машини е голем, а се вложува и во блекџек и во неколкуте вида покер и рулет. Можете и да седнете на неговата тераса или внатре во Tout Monaco, да се напиете кафе или пак да пробате нешто од шефот на кујната, Victor Marion.
ПРИКАЗНА ЗА СЕБЕ, КОЈА ПРИНЦИПАТОТ ЈА ПИШУВА САМ
Стариот град лесно ќе го препознаете бидејќи е утврден, и тоа на карпа. Од секаде се открива широка глетка на околината. Морето е во прв план, се разбира. Вниманието ќе ви го привлече и Place du Palais, плоштадот на кој точно во 11.55 часот се менува стражата, и секако Палатата на принцот, каде што на 4 август концертираше Симон Трпчески. Дворецот е изграден во 13 век, со седнувањето на Грималди на владетелскиот стол, а поради неговото преуредување во 16 век, ренесансниот стил е доминантен, особено во галеријата. Оттогаш се и фреските. Палатата во 2022-ра беше повторно отворена за јавноста по реставрацијата на артефактите, со цел да се зачува и сеќавањето на историјата. Лево од Place du Palais е видиковецот на чии рабови се поставени неколку топови од минатите времиња, со убав видик на дистриктот Fontvieille. Во правец на градината Сан Мартин, која датира од 1830-тите кога владеел Оноре Петти, ќе наидете на детско игралиште под борјето совршено за малите деца, ако решите да ги земете со себе. А, близу е и катедралата во чија крипта почива брачната двојка (принцезата Грејс и принцот Рание Трети). Пред нејзиниот олтар и се венчале. Главната црква посветена на Пресвета Богородица плени со грандиозната конструкција и еклектичните форми и во романски и во византиски стил, по желба на принцот Чарлс Трети од крајот на 19 век. Оттаму се гледа и судот и Океанографскиот музеј до кај што се стигнува за кусо време. „Храмот на морето“ е бисер на архитектурата во Монако, изграден во 1910-та по налог на принцот Алберт Први. Него го управувал и Жак Кусто, извесно време. Подводниот свет предизвикува силна возбуда, заедно со можноста да ги допрете ајкулите најмалите, се разбира. Потоа можете да се качите на отворениот покрив со ресторан, место за играње и глетка заради која нема да сакате да се симнете.
Fontvieille е најновиот дистрикт. За него се вели дека е со две лица, изграден во полза на богаташите, одземајќи од морето. Замислата е одлична, на едно место се и седиштата на фирмите, компаниите и домовите на нивните основачи, сопственици. Спојот е практичен, пред сè. Има и пристаниште и ресторани и шеталиште, па дури и хелиодром, за Монако да се види и од птичја перспектива.
Значењето на дистриктот La Condamine е иконично, без сомневање. Заштитен знак му се окер покривите на куќите во сопственост на староседелците правите Моначан(к)и. Ќе ги запознаете на пазарот во Place d’Armes, уживајќи во убавата миризба на цвеќињата, во пријатните ароми на овошјето и зеленчукот. Редовно пијат кафе на отворените тремови додека ги читаат дневните весници. Можеби ќе ви кажат нешто за градската четврт, зошто да не и за својата младост искушајте ги. Патеката за Формула 1 поминува и оттаму. Придобивките на морето ќе ги почувствувате во Le Lavrotto, инстант. Одејќи накај него и надалеку прочуениот Grimaldi Forum, не пропуштајте да го посетите и Националниот музеј на Монако во Villa Sauber и јапонската градина, чијашто градба е последна во т.н. бел епок. Таму наводно се пресекло во корист на хазардот, секако. Окружувањето на 7.000 м² е празник за окото, ама и за душата. Незаобиколно и егзотичната градина по која се именува дистриктот на самиот влез во принципатот. Видикот не може да се опише, како и сите други. Таму се вилите „Испахан“, „Палома“ и „Троглодити“, Музејот на предисториската антропологија, објектот „Симона“ и Паркот на принцезата Антоанета. Убавината на Монако е и во изобилството можности, кое го нуди. За сечиј вкус. Луксузот му е другото име маркетиншки. Сепак, принципатот е достапен за секого кога во прашање е неколкудневната посета, патувањето. Располага и со хотели со 2, 3 и 4 ѕвезди. Буквално сите ресторани се извонредни по својот квалитет. Ноќните забави ќе ве држат будни уште долго. Исто и возбудата од играта на среќа, која во кусо време се трансформира во спокојство, благодарејќи на термалните извори, велнес центрите. Доколку не сакате да одите пеш, јавниот превоз функционира беспрекорно. Сеедно, Монако е приказна за себе. Сама ја пишува, за вие да ја раскажувате по пријатели, другари, познајници искусувајќи ја. Притоа ќе ја задржите во паметењето, засекогаш. Со сигурност.
ТОП НОВОСТИ
