Линк – Ко е многу интересна марка, создадена да прави и претставува возила од премиум класата, односно да биде тука некаде со нив. Инаку, таа е во сопственост на кинескиот гигант Гили заедно со Волво, Лотус, Полстар, Протон, со Смарт и уште неколку производители на автомобили.
Моделот „08“ не е нов, веќе е во продажба во Кина, но производителот истиот ќе го носи и на другите пазари во светот и затоа сега имаме мала „бркотница“. Неговата должина е малку над 4,8 м што го сместува веднаш зад најголемите сув возила. Широк е 1,92 м, а висок 1,7 м додека растојанието меѓу оските изнесува 2,85 м. Погонската единица е хибридна со приклучок и е една од тие што може да измине најмногу километри возејќи само на „струја“ – дури 200 км. Бензинскиот 1,5 л мотор има турбо полнач и со негова помош моторот развива 163 КС. Двата електромотори се наоѓаат над оските, 218 на предната и 212 КС на задната оска. „Линк&ко 08“ располага со огромна силина – 593 КС и од 0 до 100 км/ч забрзува за 4,6 с, време кое е многу блиску до времињата на супер купе автомобилите. Семеен сув, а во него 600 КС, што е многу, многу е. Батеријата е од типот „цатл“ и поддржува брзо полнење, а од 10 до 80 отсто се полни за 33 мин.
„Линк&ко 08“ дели иста платформа со „волво икс ц 40“, само што е малку издолжена и малку проширена. Да не ве чуди иста платформа, а две возила. Тоа правило важи повеќе од еден век наназад, така што тука нема ништо ново, сѐ е веќе видено.
Продажбата е планирана за почетокот од летото, а цената за премиум сув со должина од скоро пет метри ќе биде малку „солена“, односно 50.000 и повеќе. „Линк&ко 08“ или Волво во друга опаковка или е нешто слично на Волво, трето нема.
ТОП НОВОСТИ
