Крф е најсеверниот остров во Јонското Море, чија природа и магија биле опишувани и величани од многу поети и уметници. Хомер прв ја опишал уникатната убавина на овој остров во неговата „Одисеја“. Грчкото име на островот е Керкира, по нимфата Керкира, ќерка на речниот бог Асопа, во која бил вљубен богот на морето Посејдон. Според грчката митологија,
Посејдон ја киднапирал и ја довел на островот Крф и од нивната љубов се родил Феак, прататкото на Феничаните. Дури и денес островот Крф се нарекува остров на Феничаните. Островот е втор по големина од седумте јонски острови (само Кефалонија е поголем). Има блага клима и голема влажност на воздухот, познат е по смарагдните мали заливи, кристално чистата вода, луксузните хотели, убавите плажи опкружени со зеленило и огромните ридови покриени со маслинови градини. Околу Крф има неколку мали острови: Видо, Лазарето, Пакси, Антипакси и Понтикониси („Остров на глувчето“). Едно од најубавите места на островот е Канони поради незаборавниот поглед што им го нуди на посетителите. Целата „сцена“ се дополнува со „Островот на глувчето“, каде што се наоѓа манастирот „Пантократор“ од XI век. Ова е поглед што секој турист ќе го носи во сеќавањето како една од најубавите глетки на островот Крф. Крф има многу специфична, издолжена форма како полумесечина или на латинската буква f. Долг е околу 60 км, широк од 4 до 30 км, а само 2 км северно е брегот на Албанија. Опкружен е со кристално чисто море со сафирно сина боја. Островот е претежно планински, богат е со иглолисни шуми, лозја и има над четири милиони маслинови дрвја. Поради бујната вегетација уште се нарекува и зелен остров. Внатрешноста на островот најдобро може да се разгледа со автомобил (се препорачува поради многу тесните патишта) или со мотоцикл, што дава неописливо задоволство и уживање во сите нијанси на зелените маслинки. Во автентичните грчки села со ниски куќи и тесни улички, со начинот на живеење на локалното население островот ќе се доживее на вистински начин. Оние кои сакаат да се рекреираат и да го „подигнат“ адреналинот на одмор, зелениот остров, исто така, обезбедуваат безброј можности. Најпопуларните се спортовите на вода и параглајдерство. Тука е и „Акваленд“, еден од најголемите водени паркови во Европа. За да можат сите туристи од кој билодел од островот да го посетат, изграден е на копното, недалеку од градот Крф. И на постарите им дава неверојатно задоволство, но ова е идеално место за деца, кои можат овде да ги доживеат авантурите на пиратите од Карибите. Вљубениците, пак, во планинарството можат да уживаат во освојувањето на високите врвови на островот, вклучувајќи го и Пантократор (највисокиот врв на Крф), каде што можат да уживаат во прекрасната глетка на источниот и на западниот брег на островот.
БИСЕРИТЕ НА КРФ
Копненото „крстарење“ на островот треба да започне од градот Крф, чие старо градско јадро е вклучено во листата на светско културно наследство на УНЕСКО. Во прекрасната архитектура на овој град, најдобро се гледа историјата на островот. За разлика од другите делови на Грција, на Крф никогаш не владееле Турците. По Византија, владееле Венецијанците, потоа Французите и Англичаните, кои му дале независност во 1864 година и му дозволиле да се приклучат на Грција. Главниот град на островот, Крф е еден од најубавите градови во Грција, преполн со зеленило, убави плоштади, тесни улички, добро зачувани знаменитости од претходните освојувачи. Градот има две тврдини, стара и нова, што се наоѓаат во централниот дел на градот. Една од најпопуларните улици е „Листон“, со многубројни фенери што даваaт посебна атмосфера во текот на вечерните прошетки. За посетата на главниот град на Крф е потребно најмалку еден ден. Ја нема онаа сино-бела архитектура карактеристична за Грците. Според архитектурата повеќе потсетува на италијански отколку на грчки град, поради долгото владеење на Венецијанците (четири века). Тесните поплочени улички, високите тераси, тврдини… го прават градот единствен и незаборавен. Североисточно од главниот град Крф има област со масивни и импозантни планини во кои се кријат многу убави села со куќи изградени од камен. Тука мирот и спокојството доминираат со животот на селаните што постојано ја чуваат и се грижат за својата култура и традиција. Најголемиот град на север е Касиопеја, особено харизматичен и поради остатоците на некогашната античка тврдина на пристаништето. Ова е тивко место со безброј хотели, ресторани, продавници и сè што е потребно за удобен престој на туристите. Мирното и тивко крајбрежје на Касиопи е особено познато по бројни мали пештери и бели, песочни плажи и, се разбира, тиркизното море.Најдобро е да го посетите овој дел од брегот со чамец (можете да го изнајмите). Ако сакате панорамски поглед, качете се на остатоците од стариот византиски замок, кој се наоѓа на ридот зад селото. Вреди да се види и овој замок и погледот кој е незаборавен. Тука е и Ипсос, познато летувалиште со голема плажа, привлечно и поради можноста за спортување на вода. Од врвот на планината Пантократор (960 м надморска височина) може да се види целиот остров. Исто така, тука се наоѓа и еден манастир што го посетуваат свештениците од цел Крф за време на прославата што се одржува на почетокот на август. Да се биде на Крф, а да не се посети Палеокастрица би било голем пропуст. На западниот брег, на 25 километри северозападно од градот Крф, се наоѓа ова фантастично крајбрежје со бројни мали, заоблени заливи со прекрасни плажи, песочни и шљунковити и кристално чисто море. Овој дел од Крф е многу популарен за дневни патувања. На ридовите над брегот има уште една атракција која вреди да се посети – манастир од 13 век со прекрасна градина, црква и мал музеј. На само 26 километри западно од градот Крф и на два километри јужно од Пелекас е сместена за многубројните туристи најубавата плажа на Крф, Глифада. Овој прекрасен златен песочен појас е полн со лежалки и чадори, а зад неа ридови покриени со борови дрвја и маслинки. Исто така, овде се наоѓаат и неколку големи хотели и вили со апартмани, а туристите уживаат во таверните, кафулињата и водените спортови Северозападниот дел од островот го краси селото Сидари што несомнено е туристички центар на оваа страна на Крф. Познато е по заливите и карпите извајани од ветрот, како и „Каналот на љубовта“ („Canal d’Amour“). Се верува дека оној што ќе го преплива каналот со својата сакана засекогаш останува во љубов со неа. Јужниот дел на Крф е порамен од остатокот од островот, со исклучок на централниот дел, а во последниве години интензивно се развива. Најголем град на јужниот брег е Лефкими, познат по виното и по лозовите насади, како и по каналот што минува низ градот. Селото Агиос Георгиос (Свети Георгиј) се издвојува со харизмата и гостопримството на жителите. Има преубава песочна плажа долга 3 км и се протега на север до морското езеро Корисон. На прв поглед Агиос Георгиос не остава многу силен впечаток, но по неколку дена ќе сакате да останете многу подолго од предвидениот одмор. Убаво место полно со таверни, ресторани, пицерии, вили и хотели. Тука се препорачува крстосување по Сината лагуна и островите Паксос и Антипаксос, а во близина може да се плива во кристалните води и да се ужива во најсветлите бои. Островот Крф, кој зрачи со магијата на грчките митови, несебично им ги покажува на туристите своите маслинови градини, лозја, ридови и долини, мирни села, сино море и небо. А исклучително љубезните жители на Крф се гордеат со својата традиција, фолклорот, културата, а особено со главниот град Крф што им остава најсилен впечаток на посетителите на овој зелен остров на Феничаните.
ТОП НОВОСТИ
