ОД СТРАСТВЕН ЉУБИТЕЛ НА ТРКИ И БРЗИ АВТОМОБИЛИ ДО УЧЕСТВО НА МАРАТОНСКАТА ТРКА МИЛЕ МИЉА И ИЗЛЕТУВАЊЕ ПО ИЗМИНАТИ ОКОЛУ 1.100 КМ, ДО ПРОИЗВОДСТВО НА ТРАКТОРИ И ВЕДНАШ ПОТОА ПРОШИРУВАЊЕ НА ПРОИЗВОДСТВОТО СО ВРВНИ КУПЕ АВТОМОБИЛИ, ЗА НА КРАЈОТ ДА ОДГЛЕДУВА ВРВНИ ВИНА НЕКАДЕ НА СОНЧЕВИТЕ РИДОВИ ВО УМБРИЈА ВО БЛИЗИНА НА ЕЗЕРОТО ТРАСИМЕНТО
Надалеку познатиот производител на спортски купе автомобили, сместен во малото место Сант Агата Болоњезе, годинава го слави својот 60. роденден. Во 1963 година е формирана работилницата Ламборџини Аутомобили и за само четири месеци во неа бил произведен првиот купе автомобил со името Ламборџини, моделот „350 гт“.
Како почнало сето тоа ? Иако бил роден во земјоделско семејство, младиот Феручо Ламборџини бил голем љубител на механиката. Го интересирало сè што се движело со помош на запчаници, тркала, оски. И наместо да го бара своето место под сонцето во земјоделството, тој решил да учи да стане конструктор. Во годините по Втората светска војна тој од воените возила и камините, ги доработувал и претворал во трактори. Во тоа бил многу вешт и набрзо неговите трактори почнале да ги запоседнуваат нивите во околината. Поттикнат од успешниот почеток решил да прави нови трактори. Работата му одела многу добро, а неговата земја полека се механизирала. Токму поради тој миг со механизирањето на неговата татковина треба да се запомни едно нешто. Многу години пред Феручо Ламборџини да го механизира италијанското земјоделие, еден друг голем човек, Џовани Ањели, основач на компанијата Фиат, овозможил да се моторизира истоштената држава од војната – го приближил автомобилот до премногу голем круг купувачи. Тие две имиња се клучни за индустријализацијата на италијанското општество.
Успехот со земјоделските машини му донеле голем приход на Ф. Ламборџини, така што лесно си ја гаснел постојаната жед (и страст) со некој врвен автомобил: Ланча, Алфа Ромео, Масерати и секако Ферари. Покрај страста кон автомобилите и трките, силен впечаток му оставиле борбите со бикови, посебно й се восхитувал на силината од биковите. Токму поради тоа во 1962 година патувал во Севиља, Андалузија, за да ја посети фармата на бикови на Дон Едуардо Миура (Мјура), по чие име била наречена расата.
Како голем љубител на брзи автомобили Ф. Ламборџини не бил задоволен од својот „ферари 250 гт“, односно открил проблем со работата на спојката и педалот од спојката. Откако дефектот не бил отстранет се пожалил во сервисот. Откако механичарите и вторпат не успеале да го отстранат дефектот, Феручо тропнал на вратата од Енцо Ферари да му каже за проблемот. Енцо го ислушал и му рекол: „Остави ме да правам автомобили, а ти оди кај твоите трактори.“
Овие средби го натерале Ф. Ламборџини да размислува поинаку. Но во сета бура што се случила, има уште една што е клучна за успехот на Ламборџини Аутомобили. Втората бура од незадоволство се случила во редовите на Ферари кога група вработени се побуниле затоа што жената на Енцо Ферари поставувала правила и шефувала во работилницата. Кога врвните конструктори му се пожалиле на Енцо, тој им дал отказ на сите. Тоа било клучно за Феручо Ламборџини бидејќи подоцна неколкумина прифатиле да работат кај него, меѓу нив и Џото Бизарини, главниот конструктор во ферариевиот тркачки оддел и неговата десна рака младиот Џанпаоло Далара.
Со таков тим од виртуози бил конструиран автомобил за само четири месеци, моделот „350 гт“. И потоа во 1964 година на Салонот за автомобили во Женева првпат пред светската јавност бил претставен автомобил со името Ламборџини. Во наредните две години биле направени 120 примероци , а во 1996 година производителот му го подарил на светот вториот модел наречен „400 гт“ со 2+2 седишта во купе и спајдер изведба. Овој автомобил влегол во продажба под името Мјура, а бил наречен по шпанската фарма на бикови во Севиља. Четвртиот примерок од „ламборџини мјура“ Феручо му го подарил на одгледувачот Дон Едуардо Мјура.
ПРВОТО СУПЕР КУПЕ ВО СВЕТОТ
Ако моделот „250 гт“ бил само предупредување за другите спортски купе автомобили, моделот „мјура“ бил прво супер купе во светот. Ламборџини ќе биде запомнат и по тоа што е прв производител што лансирал спортско купе со средишно сместен мотор. Конструктори на „мјура“ се: Џото Бизарини и Паоло Станцани. Велат дека „мјура“ со најмногу коњски сили, изведбата „п 400 св“, која имала 385 КС, постигнувала крајна брзина од скоро 300 км/ч. „Ламборџини мјура“ е прв автомобил со кој производителот направил силен удар на светско ниво, а на Ферари не му било сеедно кога се појавила на изложбата во Женева во 1966 година. Наедно светот го смета овој модел за најубав и најраскошен што досега излегол од некоја работилница. Феручо Ламборџини бил многу горд на својот успех со спортските автомобили бидејќи и тој бил „инфициран“ со нив уште од најрани години.
Ламборџини продолжил со претставување нови модели – „еспада“, „ислеро“, „харама“, „урако“ и сите носат имиња на прославени бикови од познатата корида. Секако дека моделите по „мјура“ предизвикувале интерес кај потенцијалните купувачи, но вистинскиот бум се случил кога Ламборџини одлучил да претстави нов модел, некаде во првата половина од 70-тите години од минатиот век. Дизајнот му би доверен на дизајнерското студио Бертоне на чело со Нучо (Џузепе), син на основачот Џовани Бертоне.
Тогаш во првите редови во студиото бил младиот и талентиран дизајнер Марчело Гандини, кому му била доверена работата да го осмисли дизајнот на најновиот ламборџиниев модел. Џузепе Нучо Бертоне ја надгледувал работата, а од тоа произлегол моделот „каунтач“ („кунтач“, „кантач“).
Овој збор потекнувал од наречјето во областа Пиедмонт каде што локалните жители го употребувале кога ќе видат нешто зачудувачки спектакуларно, нешто што предизвикува восхит.
Следувало големото претставување на купето пред светската јавност и тоа во Женева во 1971 година. Сите очекувале автомобил во купе облик со префинет дизајн и со нешта што се некој вид заштитен знак за ваквите автомобили, но Ламборџини приредил нешто дотогаш невидено. Неколку секунди владеела тишина, а потоа се слушнале воздишки од воодушевување и по некој аплауз. Остри линии, агресивен преден дел, но и профил и уште поаглест и поостар заден дел. Целиот автомобил како да е геометриска фигура со тешко пресметлива математичка површина. Збунетост предизвикале вратите, односно начинот на нивното отворање – нагоре и нанапред под некој агол. Автомобилот повеќе им личел на сосема непознат предмет , како да е направен од вонземјани. Повеќето новинари во своите статии го споредувале и заменувале „каунтач“ со нешто од вселената, но никако со обичните автомобили. Ниту еден друг автомобил не предизвикал толку големо чудење и восхит кај јавноста. По „каунтач“ биле приредени уште милион светски премиери, но никогаш повторно јавноста не била толку многу изненадена.
Со „каунтач“ Ламборџини станал сопственик на најбрзиот сериски произведен автомобил, како што навеле статистичарите. И во годините потоа Ламборџини произведувал автомобили со иста титула кога е во прашање брзината.
Неколку месеци пред појавувањето на моделот „каунтач“ империјата на Феручо Ламборџини е малку разнишана Два поголеми договора за испорака на околу 250 – 300 трактори пропаднале, а во исто време се појавила и првата нафтена и воопшто светска криза по Втората светска војна. Заинтересираноста за луксузните автомобили нагло опаднала, а цената на нафтата на светскиот пазар постојано растела. Дошле тешки времиња за Феручо Ламборџини и неговите фабрики. Прво била продадена фабриката за производство на автомобили, а потоа и таа за трактори. Феручо Ламборџини никогаш повеќе нема да биде производител на автомобили, а неговото дело на четири тркала доживеало уште три продажби пред да го купи групацијата Фолксваген, односно Ауди, кој е дел од таа групација.
Тоа се случило во 1998 година. Во тоа време фабриката во Сант Агата Болоњезе го произведувала моделот „диабло“. Откако Ламборџини преминал во сопственост на Ауди, „диабло“ се произведувал уште две години, а потоа бил заменет со моделот „мурсиелаго“ што целосно е конструиран под надзор на Ауди.
Приказната продолжува со моделот „авентадор“, врвен спортски автомобил, со брзински способности доведени до перфекција. Годинава кога Ламборџини слави 60. роденден, од конструкторското одделение излезе моделот „ревуелто“ првиот хибриден модел и наедно наследник на легендарниот „авентадор“ Покрај оваа класика од купе модели, Ламборџини во своите редови од 1986 до 1993 година го имаше првиот „сув“, моделот „лм 002“. Во ова теренско возило беше вградуван моторот од моделот „каунтач“, атмосферскиот 5,2-литарски V12 со 450 кс. Денес замена за овој легендарен СУВ е моделот „урус“ правен врз основа од „фолксваген туарег“. Тука Ламборџини го губи својот идентитет. На основа од „фолксваген туарег“ направени се: „ауди ку 8“, „порше каен“, „шкода кодиак“, додека „сеат тарако“ е правен на платформата „м ку б – а2“ многу слична на таа од „фолксваген туарег“.
Групацијата Фолксваген (ВАГ) во гамата на Ламборџини внесе помал и поевтин модел, „гаљардо“. За овој модел Ламборџини разви две погонски единици со по 10 цилиндри во V, со работна зафатнина од 5,0 и 5,2 л. Овој модел користи повеќе делови од Ауди, дури и во кабината има елементи од Ауди. Поради ова многумина сопственици и љубители на автомобили му забележуваат на Ламборџини, но за изненадување е тоа што „гаљардо“ е најпродаван модел на сите времиња со над 14.500 примероци.
Сите автомбили со името Ламборџини со разлутениот бик на носот имаат нешто заедничко и нераскинливо. Тоа се појавува со моделот „каунтач“ и сè уште трае иако оттогаш поминале повеќе од пет децении. Духот на Марчело Гандини сè уште живее во сите модели на Ламборџини откако тој влезе во „каунтач“. Острината на дизајнот, агресивноста сè уште е присутна и тоа стана втор заштитен знак на марката Ламборџини. Погледнете го моделот „хуракан“ или најновиот „ревуелто“, во нив живее дизајнот на „каунтач“, дизајнот создаден од мајсторот Марчело Гандини.
Првиот автомобил, моделот „350 гт“, каунтач“, концептот „есток“ претставен во 2008 година, потоа „лм 002“ „силует“, се имиња што не се поврзани со коридата, биковите и имињата на биковите.
Моделот „мјура“ (1966 – 1969) го добил името по фармата во Севиља, односно одгледуваната раса „мјура“. Ислеро (1968 – 1969) бик од расата мјура кој го убил тореадорот Манолете во 1947 год. Еспада (1968 – 1978) е мачот што се збива во грбот од биковите, а истиот збор е синоним за борба со бикови. Харама (1970 – 1976) е историски познат регион во Шпанија по борбите со бикови. Урако (1973 – 1979) е име на една од петте најстари раси на бикови. Јалпа (1981 – 1988) е раса на бикови за борба во арена. Диабло (19902001) е име на еден од најзлогласите бикови во историјата на коридата. Тој бик се борел против тореадорот Ел Чикоро во 1869 год. Мурсиелаго (2001 – 2010) легендарен бик што издржал убоди од 28 мача. Тореадорот Ел Лагартихо изненаден од издржливоста и храброста на бикот, му го поштедил животот, не го забил мечот. Тоа се случило во 1879. Гаљардо (2003 – 2013) е име на една од петте најстари раси на бикови за борба. Ревентон (2008 – 2010, 20 примероци) е бик што успеал да го победи надалеку познатиот тореадор Феликс Гузман во 1943 год. Авентадор (2011 – 2023) најпознат бик на крајот од минатиот век, последната битка ја имал во 1993 година.
Бикот водел премногу остра битка, ужасна и за тореадорот заедно со пикадорите. Бил одгледан од синовите на еден од најпознатите одгледувачи на бикови, Дон Селестино Куадри Видес. Хуракан (2014 – ) име на еден од најсилните и најборбените бикови во 1879 година. На 1 август 1880 година коридата во Барселона била преполна со публика, а некаде во ходниците се слушал топотот на биковите копита што само што не влегол во „рингот“.
Тој бик бил толку силен што најмалку осум пати искокнувал надвор од местото за борба – откако ќе се залетал накај тореадорот не успевал да застане и да се заврти, туку излетувал надвор од кругот определен за борба и повторно се враќал. Поради тоа бил наречен „ривуелто“. Тоа е приказата за автомобилите Ламборџини и за основачот Феручо, за Марчело Гандини и секако првите конструктори Бизарини, Далара и Станцани. Заштитниот знак е разлутен бик. И Феручо бил роден во хороскопскиот знак бик. Дали трае приказната помеѓу Ламборџини и Ферари? Да, таа сè уште е недоречена.
ТОП НОВОСТИ
