Хјундаи е еден од производителите кои забрзано вршат испитувања со погонот кој како гориво го користи водородот. Најновото од оваа марка е концептот „н вижн 74“ кој води потекло од „хјундаи пони концепт“ за првпат прикажан во 1974 година, а дизајниран од Џорџето Џуџаро. Тука не завршува приказната за најновиот концепт, туку се провлекува сѐ до 2015 кога беше претставен концептот „хјундаи н 2025 вижн гран туризмо“. Со овој концепт Хјундаи ја лансираше линијата „н“ како врв во понудата. Воедно преку концептот со погон на водород го претстави планот за развој на технологијата со горивните ќелии. Тие два концепти беа пресудни за развој на најновиов преку кој Хјундаи покажува во кој правец оди со развојот. Водородниот погон многумина го сметаат за најдобриот во денешно време.
Концептот „н вижн 74“ е класика од купе со должина од безмалку пет метри (4.952 мм), два метри ширина (1.995 мм) и 1.331 мм висина, додека растојанието меѓу оските изнесува 2.905 мм. Класично купе со димензии на лимузина, така накусо го опишуваме концептот „н вижн 74“ според обликот и големината. Возилото има хибриден погон, покрај водородниот има и класичен батериски. Можно е да експериментираат со овие два погони, како на пример надополнување на батеријата преку горивните ќелии.
Купето изгледа застрашувачки и агресивно со неговите остри линии, така што би било штета доколку остане само како концепт. „Н вижн 74“ е готов производ, само се чека на одговорните да дадат зелено светло за сериско производство. Хјундаи е на потег, светската јавност го одобрува и посакува концептот „н вижн 74“.
ТОП НОВОСТИ
