Еве уште едно изненадување од саемот одржан во јапонскиот главен град, „хонда прелуд“. Засега не e познато што ја натера Хонда повторно да го внесе овој модел во своето семејство. На почетокот од овој милениум моделот „прелуд“ беше отстранет од производството и никогаш повторно не е вратен. „Хонда прелуд“ беше мошне популарен модел, посебно меѓу љубителите на автомобилите. Елегантно купе со тенок профил со специфичен преден облик, со чиста и едноставна линија која ретко каде ја сретнуваме, силуета веднаш препознатлива за случајните минувачи. Накусо кажано, мало, а широко купе, односно плочка на асфалтот. Таа „плочка“ исчезна од лицето на планетава некаде пред две децении и дури сега повторно се појавува како концепт. Да, изложената „хонда прелуд“ е концепт, но според дизајнот, изгледот, сигурно е финален производ и наскоро треба да го видиме ова популарно име во продажните места.
Некогаш „прелуд“ беше сопственик на снажен бензински мотор со четири цилиндри во линија, со многу коњски сили, но без турбо полнач, а со многу висок број вртежи, црвеното поле на бројачот ја покриваше бројката 8.000. Некогаш било така, но овој пат погонската единица ќе биде електромотор. Тоа значи навиките се менуваат во служба на екологијата, за почиста животна средина, помалку загадување од бучава и 0 (нула) издувни гасови. Засега нема никаква најава за тоа кога Хонда ќе приреди првично претставување на „прелуд“ пред светската јавност.
ТОП НОВОСТИ
