ПО ЧЕТИРИЕСЕТДНЕВНА ПАУЗА ОД ЕВРОПСКИТЕ ТРКИ НА СВЕТСКОТО ПРВЕНСТВО ВО ФОРМУЛА Е, НАТПРЕВАРУВАЊАТА ПРОДОЛЖИЈА СО ДВА ГРАН ПРИ ВИКЕНДА КОИ ИМАА ПО ДВЕ ТРКИ, ВО МЕКСИКО И СОЕДИНЕТИТЕ АМЕРИКАНСКИ ДРЖАВИ
Досегашниот автодром „Ерманос Родригез“ кој освен за Формула 1, беше домаќин на мексиканското гран при и во Формула Е, бидејќи е преуреден да биде камп и болница за Ковид 19, овој пат му ја довери својата организациска улога на автодромот во градот Пуебла именуван според Мигуел Е. Абед. Во историјата на овој автодром било организирано светското првенство за туринг возила во период од 2005 до 2009 година. Организаторите направиле извесни промени на патеката во свиоците 3 и 6, со што се дистанцирале од старата рута и се прилагодиле на барањата што ги имаат електричните болиди. Мексико Сити е познат по својата голема надморска височина, но сега одиме уште повисоко, на големо вулканско плато, и тоа се чувствува. Сите тука секојдневно ќе може да се соочат со реткиот воздух и недостатокот од кислород, што предизвикува замор. Патеката е интересна, а асфалтот е познат по тоа дека има ниско ниво на контакт со пневматиците, изјави поранешниот возач Тијаго Монтеиро, кој сега му е менаџер на Антонио Феликс да Коста. Мислам дека најголем предизвик за возачот ќе биде тоа што мора да дише мудро, како и да се справува со заморот бидејќи ќе му биде потребна „чиста глава“. Од своја страна, дел од возачите изразија негодување што ќе возат на оваа патека обратно од движењето на стрелките од часовникот, а која што заедно со автодромот „Рикардо Тормо“ во Валенсија претставува перманентна тркачка патека во текот на целата година.
Поранешниот шампион Лукас ди Граси на стартот го престигна Александар Симс за шестото место, а во продолжението, исто така, ги доби дуелите со Мич Еванс од Јагуар и Максимилијан Гинтер од БМВ. Бразилецот беше следен од тимскиот колега Рене Раст во болидот на Ауди и пред финишот двајцата успеаја да го минат Едоардо Мортара со Вентури. По трката уследи дисквалификација на победникот Верлајн, а заедно со него и неговиот тимски колега од Порше, Андре Лотерер, затоа што нивната екипа не соработувала со снабдувачите на пневматици Мишелин и не ги верификувала пневматиците што биле употребени во трката. За жал, мала административна грешка нè чинеше дисквалификација на двата болида. Тоа е технички прекршок и не се однесува на мамење во трката. Правилата се правила, но за нас ова е премногу остро. Гумите се истите какви што ги користевме во квалификациите, изјави Амиел Линдисеј, прв човек на тимот Порше. Заедно со нив беа елиминирани и двата возачи на Нисан, Оливер Роуланд и Себастијан Буеми, според истите параметри по кои беа елиминирани и првите двајца. Со поддршка на основачот на ова првенство, Алехандро Агаг, Порше вложи приговор за дисквалификацијата, но на крајот сепак ја повлече и призна грешката.
Јас ги сакам трките, особено ваквите вистински трки. Видов дека во трката доминираа Порше и Паскал и направија фантастично шоу. Не бев среќен кога разбрав дека тие не се победници. Мора да ги научиме лекциите, мора да учиме цело време. Ние сме тие што треба да им се извинат на гледачите, бидејќи тие едноставно не разбираат што се случува. Треба да ја научиме оваа едноставна лекција. Некој треба да ги провери гумите пред да започне трката и тоа е тоа. Вчера после трката бев навистина лут и ми доаѓаше да убијам некого! За среќа, не го направив тоа, изјави Агаг во пресрет на втората трка во Мексико.
Оливер Роуланд, кој го имаше најбрзото време во слободните тренинзи пред првата трка, конечно во втората успеа да стигне до пол позицијата, оставајќи ги зад себе Верлајн од Порше и Мортара и Верње кои задоцнуваа по нешто повеќе од 3 десетинки. Но во трката ситуацијата беше поинаква. Додека првите двајца уште рано ги истрошија своите адути, Едоардо Мортара имаше стратегија да се воздржи во првиот дел од трката, а потоа кон крајот да ги нападне Роуланд и Верлајн, да ги престигне и да ги задржи зад себе. На крајот Роуланд поради своја грешка го загуби и третото место и беше престигнат од Ник Касиди во болидот на Вирџин, но потоа уследи уште една правна драма. Верлајн доби временска казна по крајот на трката заради некоректно користење на дел од енергијата што му била на располагање и со таквиот расплет се најде на четвртото место, односно тоа ги промовираше Касиди и Роуланд на второто и третото место. Со ваквиот расплет во резултатите по двете трки во Мексико, првите тројца на табелата останаа непроменети и водството и натаму беше во рацете на Сем Бирд пред Антонио Феликс да Коста и Робин Фријнс. Мортара се доближи на четвртата позиција во генералниот пласман бидејќи и двата дена беше на подиумот.
Следуваа двете трки од гран при викендот на Њујорк, во коишто за разлика од Мексико, се беше решено на патеката. Во првата трка пол позицијата ја освои Ник Касиди од тимот на Вирџин со минимална предност пред Жан Ерик Верње од Течита и Алекс Лин од Махиндра. Касиди водеше во поголемиот дел од трката, но по извозени триесет од триесет и осум круга, дуелот со Верње резултираше со судир, по што двајцата беа престигнати од Максимилијан Гинтер. По трката, Касиди откри дека тој направил грешка и потрошил премногу енергија во првиот дел и дека имало голема веројатност да остане без енергија пред крајот на трката, поради што не бил фокусиран на победа во трката.
Ми делуваше како да играм шах без кралица. Тој секако ќе ме стигнеше по извесно време. Сепак, малку сум разочаран дека неговиот напад заврши со судир. На крајот сепак го почитувам него, бидејќи тој е двократен шампион и денеска требаше да победи, но самиот згреши, изјави Ник Касиди. Среќен сум што сум разочаран со второто место. Ова покажува дека денот не беше лош кога имаш добра стартна позиција. Престигнувањето тука не беше лесно, а јас имав повеќе енергија и кога видов дека тој станува бавен морав да нападнам. Нашите болиди се допреа и јас не можев да го ротирам мојот. Поради тоа загубив едно место, но како што кажав, добро е да се биде тажен кога си втор, изјави Жан Ерик Верње.
Втората трка низ улиците на Њујорк во квалификациите ги исфрли возачите на Јагуар како главни фаворити, при што Сем Бирд со време од 1:08.572 беше за 9 стотинки побрз од тимскиот колега Мич Еванс, додека само една илјадитинка зад него беше Ник Касиди. На овој начин Бирд си овозможи комфорна трка во којашто стигна до својата единаесетта победа во кариерата и на тој начин го престигна Робин Фријнс од Мерцедес во борбата за првото место на табелата. Бирд во првата трка имаше судар со Роуланд поради што освои само три поени, но со победата во втората покажа дека тимот на Јагуар бил добро подготвен за овој гран при викенд. Во борбата за второто место, Ник Касиди успеа да го испровоцира Еванс да му даде простор за престигнување, по што тие двајца продолжија да се борат за втората позиција. Но пред самиот финиш, кога сите очекуваа еден-два победа на Јагуар, Еванс отиде прешироко во свиокот број шест и ја оштети задната суспензија на болидот, по што беше престигнат од Касиди и Антонио Феликс да Коста, кои со тоа се најдоа на второто и третото место од подиумот. Во генералниот пласман, Бирд сега има 81 поен, додека Фријнс и Да Коста имаат по 76, поради што од позадина своја шанса во финишот на сезоната гледаат и Едоардо Мортара со 72, Ник Касиди со 70 и Жан Ерик Верње со 68 поени. До крајот на сезоната има уште четири трки, на 24 и 25 јули низ улиците на Лондон и на 14 и 15 август на аеродромот Темпелхоф во Берлин.
ТОП НОВОСТИ
