Во Калифорнија, на брегот од Пацификот, во малото место Сан Хозе сместена е работилница именувана како Драко. Таму се произведуваат ретки ѕверки на четири тркала како на пример електричната купе лимузина „гте“, а и најновото возило за забава наречено „драгон“ или преведено на македонски „змеј“. На прв поглед тамошниот производител не направил ништо посебно, но откако внимателно ќе го прочитате официјалното известување од производителот, дури тогаш ќе сватите со каков „проблем“ си имате работа. „Драко драгон“ е купе сув со две врати од тие како кај Ламборџини (гулабови крила), со должина од 5,05 м, ширина 2,02 м и висина 1,6 м. Иако во голема мера се употребени јаглеродните влакна (карбон фибер на англиски) сепак неговата тежина изнесува 2,2 тони, но затоа четирите погонски електромотори на секое тркало по еден, поседуваат преголеми 2.000 КС, небаре ова е „римац невера“. Уште малку му фалат, уште 200 КС, за соодносот тежина : силина да биде 1 : 1. Сега е 2000 КС на 2200 кг. И да, овој сув е најбрзиот на планетава и ќе се продава по цена од 290.000 долари. Од 0 до 96 км/ч забрзува за 1,9 секунди, а до 100 км/ч сигурно ќе му бидат потребни 2,2 или 2,3 сек. Крајната брзина е поголема од 322 км/ч, како да ќе полетува.
Внатрешноста е удобна за четири возрасни лица и преполнета со разновиден луксуз. За возачот и совозачот има дигитална плоча со инструменти и екран од 17,2 инчи заедно со уште многу други уреди слични на спомнатите, а за патниците одзади има уште два екрани од по 11 инчи.
На почетокот од производството кое треба да започне наредната година ќе бидат произведени 99 примероци, а од 2026 одговорните планираат годишно производство од 5.000 примероци. Еве прилика Мате Римац повторно да докаже дека прави најбрзи автомобили во нашава галаксија – нема досега направено сув возило и затоа крајно време е да најави негово доаѓање.
ТОП НОВОСТИ
