Деновиве се случи светска премиера на концептот „сендрајдер“ направен од Дачија, производител кој сериозно влегува во „Ворлд Рели Рајд Чемпионшип“, а во тоа натпреварување се вози и светски познатото рели Дакар, некогаш познато како Париз – Дакар. Зад Дачија стојат Групацијата Рено под чија капа е Дачија и работилница Продрајв позната во светот по конструирање врвни тркачки и рели возила. Познато ви е кој е Рено, но за сликата да биде поцелосна ќе го спомнеме следново, кога Митсубиши жареше и палеше на релито Дакар и не дозволуваше никој друг да победи, работата околу подготовката на возилото беше во рацете на Продрајв. Колку за информација, Митсубиши е најтрофејна марка на релито Дакар со 12 титули освоени во периодот од 1985 до 2007 год. Во тој период Митсубиши бил најбрз на 150 етапи, а на список од победници на сите времиња второпласиран е Пежо со 78 победи на тие специјални етапи на кои се мери времето.
Дачија не запрела со Продрајв и Рено, туку отишла подалеку, го најмува Насер Ал Атија да вози за тимот, носител на пет титули (2011, 2015, 2019, 2022 и 2023) Дакар. Покрај него ќе вози и годинашната победничка во класата „челинџер“, Кристина Гутиерес Херeро со совозачот Пабло Морено Хуете. Таа е втората дама која победува на ова рели. Прва победничка во релито Дакар е Јута Клајншмит и тоа во генералниот пласман. Тоа се случи пред 23 години, односно во 2001 год. И сето ова се случува во категоријата автомобили.
„Дачија сендрајдер концепт“ е тешка и воедно современа теренска класика. Тубуларна шасија, панели од јаглеродни влакна, вградени само најпотребните уреди според правилникот на ФИА за рели на издржливост, V6 мотор со 3,0 л. работна зафатнина, двоен турбо полнач, 360 КС при 5.000 врт/мин. максимален вртежен момент од 539 Нм при 4.250 врт/мин. секвенцијален менувач со шест степени, погон 4 х 4, седишта од марката Сабелт со ткаенина која не поти (не задржува влага), посебни теренски пневматици од марката „бф гудрич“, должина 4.140 мм х ширина 2.290 мм х висина 1.810 мм и 3.000 мм меѓуоскино растојание, подвозјето е на 350 мм висина од тлото, има подобра аеродинамика од останатите теренски возила во класата итн. Накусо тое е концептот „сендрајдер“ на Дачија подготвен за пустинска авантура од највисок ред. Ова теренско возило ќе ги направи првите пробни километри на есен од 5 до 11 октомври за време на Рели Мароко 2024. Се гледаме догодина во јануари на релито Дакар, тогаш Дачија ќе покаже колку умее да се справи со пустината.
ТОП НОВОСТИ
