СÈ УШТЕ СЕ ВО ФАЗА НА ИСПИТУВАЊА, НО НАСКОРО ЌЕ ГИ ВИДИМЕ СЕРТИФИЦИРАНИ И ДОСТАПНИ ЗА СИТЕ ЗАИНТЕРЕСИРАНИ ШТО НЕ ЈА ПОДНЕСУВААТ БУЧАВАТА ОД АВИОНИТЕ СО КЛИПНИ И МЛАЗНИ МОТОРИ. ВЕЛАТ ДЕКА СЕ МНОГУ ПОТИВКИ, ВИБРАЦИИТЕ СЕ СВЕДЕНИ РЕЧИСИ НА НУЛА, ПОЕВТИНИ СЕ ЗА ОДРЖУВАЊЕ, ИМААТ ПОМАЛКУ ДЕЛОВИ, А БРЗИНСКИТЕ ОСОБИНИ СЕ СЛИЧНИ КАКО КАЈ НИВНИТЕ „РОДНИНИ“ ШТО ЧАДАТ
Светот настојува целиот превоз да го пренасочи кон електричната енергија, така што речиси секој ден се појавува голем број превозни средства на кои заедничко им е ваквиот начин на придвижување. Најново од оваа висока технологија е авион, осмосед, две + шест седишта, за кое конструкторите велат дека може да прими двајца пилоти и седум лица во одделот за патници. Конфигурациите ќе зависат од нарачателот, а според производителот „Бај Аероспејс“, купувачите ќе можат да избираат неколку изведби, патничка, карго, полупатничка, полукарго. Нема да биде чудно ако внатрешноста на леталото биде приспособена како летачка брза помош. Леталото „бај аероспејс е-флаер 800“ најмногу ќе се употребува како воздушен такси-превоз, на кратки релации. Кога веќе сме кај растојанијата што може да ги совлада новото летало, да го споменеме и неговиот лет од 926 километри со едно полнење на батериите. Во тие километри не се вклучени и резервните 45 минути лет според правилата за инструментално летање („ифр“ – инструмент флајт рулс). Од приложените бројки може да се забележи изненадувачки големиот радиус на летање приближно тоа би бил лет од Охрид до Торино.
Леталото „е-флаер 800“ има два мотора поставени на крилата, еквивалент на класичните (зборуваме за мотори што во моментов најчесто се користат за овој тип летала, таканаречените „турбопроп“). Фотографиите откриваат летало класика, на него нема нешто револуционерно, но забележителна е исклучителната аеродинамика. Овој дел од конструкцијата, аеродинамиката, се разликува многу во однос на сите досегашни летала. Но сите – и на леталата со клипни мотори и на тие со турбопроп мотори и на тие со млазни мотори – им е потребна аеродинамика. Како леталата на погон со електромотори имаат толку многу потреба од супериорна аеродинамика? И „старите“ летала и новите, електричните, летаат со слични или исти брзини и имаат потреба од врвна аеродинамика. Но не е јасен сегашниов потег на конструкторите аеродинамичари што токму во моментов целосно се насочени кон супер „испеглани“ облици и линии.
Поради компресираната кабина „бај Аероспејс е флаер 800“ може да лета над облаците, односно до максимални сертифицирани (потврдени од соодветната институција за летање) 10.668 метри висина. Неговата нормална крстосувачка брзина е 518,6 км/ч и со максимален товар од 698,5 кг авионот прелетува 926 км. Овие цифри се официјални. Затоа три компании: Џет Ит, Џетклуб и Ренланд Ер Сервис имаат нарачки за ова летало. Според последните извештаи од компанијата, во производните хали сè е подготвено за почеток на производството, единствено се чекаат завршните испитувања и сертификатите, а потоа следува испораката. Велат дека пристигнатите нарачки достигнуваат стотици примероци.
Компанијата „Бај Аероспејс“ не се претставува на авионскиот светски пазар само со ова летало, туку со уште две што треба да ги заменат леталата што служат за тренинг за летање и рекреација – „е флаер 2“ и „е флаер 4“. Првото летало е двосед, а второто четворосед. „Е флаер 2“ е претставен во 2016 година и сè уште е во фаза на испитување. Една година подоцна, во 2017 година, компанијата го претстави четвороседот на аеромитингот што се одржува секоја година во Ошкош.
И ова летало е во фаза на испитување. Покрај супериорна аеродинамика на фуселажот (трупот на леталото) и крилата, двата авиона располагаат со ширина на кабината од 120 сантиметри што е своевиден врв во класата. Колку за потсетување, годинава во септември авиокомпанијата КЛМ нарача 14 примероци од двоседот („е флаер 2“). Станува збор за денови кога овие две летала ќе добијат финален сертификат за летање и продажба. Велат дека трошоците за летање со авионите за тренинг и обука се намалуваат за помалку од 30 отсто. И како што тврдат официјалните извори, наскоро „Бај Аероспејс“ ќе нуди три летала. За почетокот на продажбата и за првите испорачани авиони детално ќе информираме.
ТОП НОВОСТИ
