Не можеше работата да биде оставена ни ваму ни таму, мораше и тие од серијата „м“ да бидат обновени.
Возило од сув класата долго скоро пет метри во себе да има над 620 КС – како би се чувствувале во таква средина? Како капак на сѐ, сето тоа во „м“ изведба и на крај заковано со „компетишн“. Тоа се нарекува од брзо побрзо. Мотор V8 4,4 литри со двоен турбо компресор и силина од точно 625 КС при 6.000 врт/мин и максимален вртежен момент од 750 Нм достапен во распон од 1.800 до 5.800 врт/мин. Крајната брзина е ограничена на 250 км/ч, но ако тие ви се малку, можете со доплата да го добиете пакетот „м драјвер“ со кој ограничувањето застанува на 290 км/ч. И забрзувањето е во склад со нормите од серијата „м компетишн“, од 0 до 100 км/ч за 3,9 секунди. И се разбира, издувот е „м“, сопирачките се „м“ и обесувањето на тркалата е „м“ (м суспензија). За вака накитено возило не треба да спомнуваме дали има екрани од 15, 18 или 20 инчи. Многу добро е познато што значи „м“ во БМВ, а останатите да ги потсетиме, таа буква значи „моторспорт“, оддел на БМВ во кој се дотеруваат тркачките автомобили, но се „навиткуваат“ и сериските, на пример сега „икс 5“ и „икс 6“.
Денешниов свет кој себе си се нарекува современ, сака да гледа тв како да е дома легнат на тросед и затоа многу му се важни тие два екрани, едниот за автомобилот, а другиот за сѐ останато, но и за гледање тв или играње „кантерстрајк“.
Цената на најагресивните „икс 5“ и „икс 6“ се врти околу 160.000 евра, толку чинат тие 625 КС кои можат да постигнат забрзување од 0 до 100 км/ч за 3,9 секунди, исто како да сте во некое супер купе. За подетални информации јавете се кај увозникот.
ТОП НОВОСТИ
