Безбедност во сообраќајот-СЕ ПОЧИТУВА ЛИ ПЕШАЧКИОТ ПРЕМИН?

ПЕШАЧКИОТ ПРЕМИН МОРА ДА ПРЕТСТАВУВА МЕСТО КАДЕ ШТО СИТЕ ВОЗАЧИ СОВЕСНО И ВНИМАТЕЛНО ЌЕ ЗАСТАНУВААТ, НО ЧЕСТО СЕ СЛУЧУВА ТОКМУ ТУКА ДА СЕ ПРЕДИЗВИКААТ СООБРАЌАЈНИ НЕЗГОДИ ВО КОИ ИМА И ЖРТВИ И ПОВРЕДЕНИ

Познатата „зебра“ е дел од улицата што посебно е обележан со бели широки ленти, место каде што на пешаците им е дозволено да преминуваат на другата страна од улицата. Овој дел е наречен пешачки премин и тука пешаците имаат предност за минување. Но во секојдневјето се случува да не се почитува оваа предност на пешаците на пешачкиот премин. Има возачи што, однесувајќи се дрско и невнимателно, го преминуваат пешачкиот премин дури и кога по него веќе се движат пешаци. За севкупната состојба во сообраќајот придонесува однесувањето на сите учесници во него. Пешаците се најранливата категорија учесници во сообраќајот, а сите други се „посилни“ од нив. Токму поради тоа улицата мора да се преминува внимателно и откако ќе поминат сите автомобили затоа што така е најбезбедно.

 

Имено, пред сè, неопходно е совеста на возачите да се издигне на највисоко ниво, но секако и на пешаците. Ако моторните возила се движат во колона, препорачливо е пешаците да ги пуштат да поминат. Возачите никако не смеат да не ја почитуваат дозволената брзина од 50 км/ч на булеварите. Сите што не го почитуваат пешачкиот премин треба да бидат соодветно казнети, а казните за овој вид прекршоци мора дупло да се зголемат колку што е можно побрзо. За да се воспостави подобра и поефикасна контрола врз пешачките премини, препорачливо е на тие места да се постави систем за постојано набљудување, односно камери.

Во последниов период се случија повеќе трагични настани со жртви и повредени на пешачките премини. Возењето со неприспособени брзини и според со обраќајните правила и условите на патот, како и возењето под дејство на алкохол се најчестите предизвикувачи на сообраќајни незгоди, а да не се заборави и зборувањето на мобилен телефон додека се вози. Возачите што истовремено возат и на каков било начин го користат мобилниот телефон се најопасни учесници во сообраќајот затоа што целото внимание не им е насочено на сообраќајот. Да се надеваме дека сите возачи ќе сфатат дека мора да застанат пред пешачкиот премин за да им дозволат и да им овозможат на пешаците безбедно да ја преминат улицата.

Жарко Атанасоски