Безбедност во сообраќај-ПОДГОТВЕТЕ ГИ АВТОМОБИЛИТЕ, ДОАЃА ЗИМАТА

СЕГА Е НАЈДОБРО ВРЕМЕ ДА ГО ПОДГОТВИТЕ ВОЗИЛОТО ЗА ЗИМАТА. НАВРЕМЕ ПОГРИЖЕТЕ СЕ ЗА АВТОМОБИЛОТ ЗА ДА НЕ ЧЕКАТЕ ПРЕД МЕХАНИЧАРСКИТЕ РАБОТИЛНИЦИ

Есента настапи и се очекува пад на температурите. Тоа значи дека е време автомобилот да се подготви за зимската сезона. Прво што треба да направите е темелно да го исчистите возилото. Откако ќе завршите со чистењето, на ред е проверка на течноста за ладење во моторот, течноста за миење на ветробранското стакло и течноста за сопирачките глицерин. При проверката на „антифризот“, ако е паднат на минимум или под минимум, не дотурајте дестилирана вода затоа што така го разредувате и наместо, на пример, да држи до -20 Целзиусови степени, температурата на мрзнење на разредената течност ќе „падне“ на -10. Ако претерате со разредување на антифризот, во студените зимски денови може да пукне блокот од моторот и ќе биде потребен ремонт или купување нов. Затоа дотурете чист антифриз каков што веќе има во моторот.

Внимавајте и на течноста наменета за миење на ветробранското стакло. Не дотурајте вода, туку користете соодветна течност. Кога температурите се под нула, течноста може да замрзне и мразот да оштети дел од каналите или прскалките. Не тргнувајте никаде без зимска опрема. Комплетирајте ја и уживајте во возењето. Најдобро е во вакви временски услови да научите како се ставаат синџирите за снег. Зимските пневматици се најдобро решение за зима. Ако немате, ви препорачуваме навреме да ги обезбедите. Цели тимови работат на создавање посебни пневматици што ќе придонесат возењето во зима да биде што побезбедно. „Работната температура“ на зимските пневматици е под +7 Целзиусови степени, а на летните е над +7 Целзиусови степени.

Зимските пневматици ја докажуваат својата способност на ниски температури, а над +8 Целзиусови степени смесата од која се направени ги губи способностите. Препорачливо е да набавите и метличка за чистење снег од автомобилот. Не заборавајте стаклата да бидат секогаш беспрекорно чисти, како и метличките од бришачите. На вашето возило му се потребни темелна проверка во сервис, зимски пневматици, опрема и секако кутија за „прва помош“ за безбедно да учествувате во сообраќајот.

Зимата со себе носи свои убавини, на пример, греена ракија и црвеното вино, но не пијте ако треба да возите.

Жарко Атанасоски