СКИЈАЧКАТА СЕЗОНА Е ВО ТЕК, НО КАДЕ ДА СЕ ОДИ ОВАА ГОДИНА? СÈ ПОГОЛЕМ БРОЈ ЕНТУЗИЈАСТИ СКИЈАЧИ ОТКРИВААТ ДЕКА ВО НАШИОТ РЕГИОН ИМА ОДЛИЧНИ СКИЈАЧКИ ЦЕНТРИ, КАДЕ ШТО НЕМА ДА СЕ ПОТРОШАТ МНОГУ ПАРИ, ДУРИ И ВО ТЕКОТ НА СЕЗОНАТА. ТАКА СКИЈАЧКИТЕ ЦЕНТРИ НА БАЛКАНОТ СТАНУВААТ СÈ ПОПОПУЛАРНИ МЕЃУ ТУРИСТИТЕ ОД ЦЕЛА ЕВРОПА.
Празниците и зимските одмори веќе поминаа, но допрва доаѓа вистинското време за уживање на планина.
Февруари и март се месеци кога љубителите на зимските спортови го користат секој слободен ден или викенд да го поминат на скијачките терени. Зависниците од зимскиот адреналин се воодушевуваат на долги, беспрекорно уредени падини и патеки. Најдете ја планината чии патеки најмногу ви одговараат и почнете да се подготвувате.
ПОСЕБНА ЗИМСКА ПРИКАЗНА
Високо над Тетово, во самото срце на масивот на Шар Планина на надморска височина од 1.700 метри, е сместен нашиот најстар и најпознат планински туристички центар Попова Шапка. Уште со самото пристигнување Шара како да ве исклучува од секојдневниот свет и ве носи во една посебна зимска приказна.
Попова Шапка е рај за скијачите, еден од најстарите зимско-рекреативни и планински центри во Македонија и на Балканот. Скијачките патеки на Попова Шапка се од прва класа и почнуваат на 1.690 метри надморска височина, поврзани со жичарници и ски-лифтови. Снегот што паѓа овде е доволно стабилен и може да гарантира квалитетно скијање од декември-јануари до крајот на март. Со само 9,6 километри уредени скијачки патеки, Попова Шапка е погодна за почетници и за оние со средно ниво на скијање, но за љубите- лите на скијањето во слободен стил и зависниците од адреналин вистински предизвик е големата површина надвор од обележаните патеки.
УЖИВАЈТЕ ВО СНЕЖНИОТ РАЈ
Копаоник е најубав кога изгрева сонцето и ги осветлува белите патеки. Со околу 200 сончеви денови и 160 дена снежна покривка годишно, тој е идеално место за љубителите на зимски спортови. Повеќе од 55 километри алпски и 18 километри нордиски патеки привлекуваат и почетници и искусни скијачи и „сноубордери“. Поради најсовремената опрема и современата механизација, 24 ски-лифтови и електронски лифтови, одличните патеки и богатата понуда на хотелско и приватно сместување, Копаоник се наоѓа на листата на 10 најдобри ски-центри во Источна Европа.
Системот за вештачки снег покрива 97 отсто од скијачкиот центар, должината на скијачката сезона веќе не зависи од снежните врнежи, па посетителите можат да уживаат во снегот и пет месеци годишно. Стандардите на ФИС ги исполнуваат три патеки за слалом, велеслалом и спуст, па на Копаоник се одржуваат натпревари што се бодираат за балканскиот и за европскиот куп. Во паркот Сноуборд се одржуваат домашни и меѓународни натпревари, а во ски-градинката со подвижна лента и рингишпил полесно се учат првите скијачки чекори. Во детските снежни викенди малите можат да скијаат со големи попусти. Сезонската карта за скијање ви овозможува и три дена бесплатно скијање на Јахорина. Воведена е „поединечна линија“ на жичарниците „Панчиќев врх“ и „Караман гребен“, што им овозможува на соло скијачите полесно и побрзо да минуваат на жичарницата. На популарната „Копа“ може да уживате и во лизгање, санкање, параглајдерство, а доколку сте љубители на ноќното скијање, на патеката Мало Језеро.
Воведена е и автобуска кружна линија од викенд-населбата до центарот на Копаоник, а жичарниците „Бела река 1“ и „Бела река 2“ пре- везуваат туристи од Брзеќе до центарот на Копаоник. Жичарницата „Панчиќев врх“ со четири седишта (2.017 м.н.в.), покрај скијачите и бордерите, ги превезува сите што сакаат да уживаат во панорамскиот поглед на центарот. А кога ќе се изморите, спуштете се до центарот, задолжително застанете до некое од многуте кафулиња, дискотеки, клубови или ресторани во кои забавата трае до раните утрински часови.
БЕЛА УБАВИЦА
Природата била дарежлива кога на Јахорина й подарила многу снег и поволна клима, поради што оваа планинска убавина на југоистокот на Република Српска привлекува многу туристи од странство. Со повеќе од 150 дена снег годишно, но и поради поволните цени, Јахорина е еден од најпопуларните зимски спортско-рекреативни центри на Балканот.
На надморска височина од 1.300 до 1.900 метри, скијачите имаат на располагање осум ски-лифтови, како и 20 километри уредени и добро поврзани алпски патеки, со различна тежина, за почетници, рекреативци и врвни скијачи. Од патеките, две се црни, 14 црвени и четири сини, а има и патеки за крос скијање, како и школа за скијање. Покрај зимските спортови, може да уживате и во санкање, а најхрабрите може да уживаат и во авантура со параглајдерство. На делот од патеката долг 3.290 метри во функција е систем за вештачки снег, а ски-лифтот на патеката Пољице е достапен за љубителите на ноќното скијање.
Покрај скијањето, може да пробате и некој екстремен спорт, „сноубординг“, возење со санки или едноставно да се олабавите. Посебно искуство е ноќното скијање и бордањето, но и одличната храна, на многубројните скари покрај патеката се нудат автохтони гастрономски специјалитети од овој крај.Прифатливите цени на ски-билетите и на сместувањето, одличната гастрономска понуда, гостопримството на домаќините и добриот ноќен живот се само дел од причините зошто вреди да се посети оваа бела планинска убавина.
БИСЕРОТ НА СОНЧЕВАТА СТРАНА НА АЛПИТЕ
Доколку сакате екстремни зимски спортови, тогаш зимскиот центар Крањска Гора во Словенија е идеално место бидејќи во текот на зимата се организираат возбудливи ски-натпревари во слалом, велеслалом, спуст, како и во скијачки скокови, кои се најинтересни за скијачите. Се наоѓа во близина на границата со Австрија и Италија, а блиску е до Националниот парк Триглав на југ. Импозантните шумски врвови на Јулијанските Алпи што се протегаат од Мојстрана до Ратеча и скијачките терени ги привлекуваат и алпинистите и скијачите.
Од 20 километри извонредно уредени патеки, три се сини, пет црвени и четири црни, а има околу 40 километри пространи патеки за крос-кантри скијање и нордиско пешачење со адреналин. Покрај ноќно скијање, се организира и скијање за авантуристи, надвор од патеката, од сртот на Јулијанските Алпи. Ски-лифтовите се многу достапни бидејќи се блиску до меѓународните патишта, а поради нивната висина (најниската точка е 813 м до 1.215 м), временските услови се поволни, а снежната покривка е богата. Почетниците и рекреативците може да уживаат и во патеките на Гозд Мартуљек, а патеките на Поткорен се многу понапорни. Исто така, ски-скокалницата на Планица е една од најпопуларните и најголемите во светот.
Во подножјето на ски-центарот има кафулиња, ресторани и тераси, како и десетина хотели. Ски-центарот Рогла се наоѓа во североисточниот дел, на надморска височина од 1.050 м до 1.517 м. На вкупно 90 ха има скијачки патеки, уредени ски-патеки и сместувачки капацитети. Од термалните бањи Зреча е оддалечен 17 километри. Популарен меѓу туристите бидејќи има голем број спортски и други содржини, како и меѓу спортистите што тука се подготвуваат за натпревари. Најпопуларен е меѓу почетниците и скијачите со средно ниво, а има одлични услови и за оние малку поискусните скијачи. Тука има 13 скијачки патеки, две се зелени (2 км), четири сини (6 км), шест црвени (8 км) и три црни (4 км). Има и 13 ски-лифтови, два се лифтови за столови, 9 ски-лифтови и три бебешки ски-лифтови. Сите патеки се опремени со топови за вештачки снег. Ноќно скијање е можно и од четврток до недела на осветлените патеки на Кошута и Јаса. Во ски-центарот Рогла особено се популарни патеките за ски крос-кантри. Сноубордерите имаат на располагање 5 километри долг снежен парк наречен „Fun Park Rogla“ – најголема област за сноубординг во овој дел од Европа. На Рогла има и многу добра интерспортска школа за скијање, достапна за возрасни и за деца. Овде може да се најми многу квалитетна ски-опрема. Има и градинка на снег со целодневен престој.
УЖИВАЈТЕ ВО СНЕГОТ ДО МАЈ
Поради пристапните цени, гостопримството и добро опремените хотели, Бугарија е вистински рај за љубителите на зимски спортови, но и за оние што уживаат во снегот. Тамошните скијач- ки центри оправдано се сметаат за ексклузивни скијачки центри во Источна Европа. Најпознатите скијачки центри Банско и Боровец во југозападниот дел на земјава се протегаат на планините Пирин и Рила.
Најмладиот бугарски скијачки центар Банско, 160 километри јужно од Софија, исто така, е национален парк со повеќе од 60 врвови над 2.700 м надморска височина. Комбинацијата на живописните пејзажи на Националниот парк Пирин и луксузот, новите хотели, модерниот систем на патеки и ски-лифтови, го претворија малото гратче Банско во најпрестижен ски-центар во Источна Европа. Поради суровата клима, сезоната на оваа планина трае шест месеци.
Боровец е најстар и најпопуларен ски-центар во Бугарија, каде што скијачката сезона трае од ноември до мај бидејќи се наоѓа на северозападните падини на планината Рила и има систем за правење снег. Околу 40 километри уредени патеки одговараат за сите категории скијачи и имаат услови за ноќно скијање. Од основата (1.300 м.н.в.) до патеката на врвот (2.750 м.н.в.) има гондола (кабини за шест скијачи) и ски-лифтови. Покрај зимските спортови, може да се ужива во баровите, кафулињата и клубовите што се отворени цел ден и ноќ. Во традиционалните таверни можете да ги пробате специјалитетите од бугарската кујна и познатото црвено вино.
Скијањето е можност да научите нешто ново, да запознаете нови пријатели, да истражувате нови места и да уживате во снегот со блиските. Ако сè уште не го вкусивте ова задоволство, сега е време за тоа. Никогаш не е доцна да се стекнат нови вештини и искуства. Се чини дека скијањето сè уште й се спротивставува на здравствената криза бидејќи, како што велат експертите, на најмалку две илјади метри надморска височина нема страв од нов грип.
ТОП НОВОСТИ
