Најновиот член на Renault, моделот Symbioz се позиционира како модел што ја пополнува празнината меѓу Captur и Austral, настапувајќи со својот уникатен дизајн, напреден хибриден погон и врвни технолошки иновации.
Иако ја дели CMF-B платформа со моделите Captur и Clio, Symbioz нуди попространа внатрешност, позиционирајќи го точно во средината, помеѓу „малиот“ Captur и поголемиот Austral. Дизајнерските елементи покажуваат визуелна сличност со Captur, особено на предниот дел, но Symbioz носи пософистициран, остар и самоуверен изглед што му додава уникатен идентитет.
Најимпресивен аспект на Symbioz е неговата кабина, која изобилува со напредни мултимедијални опции и целосна интеграција со Google услуги, како и најсовремени безбедносни технологии. Renault вели дека Symbioz е опремен со вкупно 24 системи за активна и пасивна безбедност, што придонесува за чувство на сигурност и доверба.
Во однос на практичноста, кабината на Symbioz е дизајнирана да обезбеди голем број места за складирање, со вкупен капацитет од 24.7 литри, вклучувајќи касета со капацитет од 7 литри пред совозачот. Со поместлива задна клупа, багажниот простор се зголемува од 492 литри до дури 624 литри, правејќи го Symbioz лидер во својот сегмент.
При лансирањето, Symbioz е достапен со еден хибриден погон кој комбинира 1.6-литарски четирицилиндарски бензински мотор, електромотор со 53 коњски сили и дополнителен стартер-генератор со уште 25 коњски сили. Вкупната моќност на овој систем е 145 коњски сили, пренесувани на предните тркала преку автоматски менувач со иновативна конфигурација од четири брзини за бензинскиот и две за електричниот мотор.
ТОП НОВОСТИ
