НОВИТЕ ШЛЕМОВИ НУДАТ ГОЛЕМ БРОЈ БЕЗБЕДНОСНИ ПРИДОБИВКИ, ВКЛУЧИТЕЛНО НАПРЕДНА БАЛИСТИЧКА ЗАШТИТА, ЗГОЛЕМЕНА АПСОРПЦИЈА НА ЕНЕРГИЈА И ПРОШИРЕНА ОБЛАСТ НА ЗАШТИТА ЗА ВОЗАЧИТЕ. ШЛЕМОТ ШТО Е ИЗРАБОТЕН СПОРЕД НОВИОТ СТАНДАРД НА ФИА Е ЗАДОЛЖИТЕЛЕН ЗА ШАМПИОНАТОТ ВО 2019 ГОДИНА.
Следната генерација на ултразаштитни шлемови, изработени според новиот стандард на ФИА за највисоко ниво на шлемовите, го имаа своето деби во претсезонските тестирања на Ф1. Овие нови шлемови нудат голем број безбедносни придобивки, вклучително напредна балистичка заштита, зголемена апсорпција на енергија и проширена област на заштита за возачите. Ова е резултат на повеќе од една деценија истражување за да се создадат најстрогите стандарди за производителите на шлемови за понатамошно зголемување на безбедноста. Во текот на процесот истражувачите на ФИА соработуваа со производителите на шлемови на Ф1, како што се „Stilo“ и „Bell Racing“, кои сега произведуваат шлемови врз основа на новиот поставен стандард.
Овој стандард, наречен ФИА 8860-2018, ги истакнува барањата за изградба и за тестирање што производителите на шлемови мора да ги постигнат за да обезбедат опрема за врвните серии на ФИА. Тестовите, кои мора да ги поминат новите шлемови, вклучуваат 225 g метален диск отпуштен на 250 km/h; тежина од 10 килограми што паѓа од пет метри; воздушна пушка снимена директно на визирот и изложување на оган од 790°C.
Како што често се случува со безбедносните истражувања, овој проект беше воден од специфични несреќи, на пример, на Унгарскиот Гран при каде што беше погоден шлемот на Фелипе Маса. Оваа сезона во Формула 1 е задолжителен стандардот и наскоро ќе биде и за други шампионати.
Адам Бејкер, директор за безбедност на ФИА, рече: – Важно е постојано да се стремиме да ја подобриме безбедноста во сите области на мотоспортот. Шлемовите што беа изработени според претходниот стандард веќе нудат високо ниво на заштита, но ние сега сме на следното ниво со шлемот што ќе се користи уште многу години во мотоспортот.
Промените направени врз основа наjновиот стандард вклучуваат:
• Врвот на отворот на визирот е намален за 10 mm за да се вклучи напредна балистичка заштита што постигнува невидени нивоа на безбедност за време на удар.
• Проширени области за заштита од страните за да понудат компатибилност со најновите еднонасочни потпирачи за глава и затворени системи за заштита на главата на седиштата во автомобилот, во исто време обезбедувајќи дека управувањето со енергијата е токму таму каде што се поставени потпирачите за глава.
• Конструкција на обвивката на шлемот користејќи напредни композитни материјали за да се осигури дека не е само цврста туку и отпорна на кршење и пенетрација.
• Методите на тестирање вклучуваат варијабилни брзини на несреќи за да се пресметаат различните ситуации и опсегот на различни тежини за да се земат предвид повеќето форми на глава.
ФИА-СВЕТСКА АВТОМОБИЛИСТИЧКА ФЕДЕРАЦИЈА (FÉDÉRATION INTERNATIONALE DE L’AUTOMOBILE) Е ВОДЕЧКО ТЕЛО НА СВЕТСКИОТ МОТО-СПОРТ И ФЕДЕРАЦИЈА НА СВЕТСКИ ВОДЕЧКИ АВТОМОТО ОРГАНИЗАЦИИ. ОСНОВАНА ВО 1904 ГОДИНА, ТАА ОБЕДИНУВА 240 НАЦИОНАЛНИ СПОРТСКИ И АВТОМОТО ОРГАНИЗАЦИИ ОД ПОВЕЌЕ ОД 135 ЗЕМЈИ, КОИ ЗАСТАПУВААТ МИЛИОНИ ВОЗАЧИ ВО СВЕТОТ. ВО МОТО-СПОРТОТ ГИ АДМИНИСТРИРА ПРАВИЛАТА И ПРОПИСИТЕ ЗА СИТЕ МЕЃУНАРОДНИ СПОРТОВИ НА ЧЕТИРИ ТРКАЛА, ВКЛУЧИТЕЛНО И СВЕТСКОТО ПРВЕНСТВО ФИА-ФОРМУЛА 1 И СВЕТСКОТО РЕЛИ ФИА.
ТОП НОВОСТИ
