ГОЛЕМА ПОБЕДА ЗА ЕЛФИН ЕВАНС НА РЕЛИТО ВО ПОРТУГАЛИЈА, ОТКАКО ГО ФРЛИ ЗАД СЕБЕ РАЗОЧАРУВАЊЕТО НА ПРЕТХОДНОТО РЕЛИ НА ХРВАТСКА КАДЕ ЗАГУБИ ОД СЕБАСТИЈАН ОЖИЕ ЗА ДЕЛОВИ ОД СЕКУНДАТА.
После паузата минатата година заради пандемијата Ковид-19 легендарното рели на Португалија повторно стапи на сцена и како досега низ годините повторно го залужи епитетот за еден од највозбудливите настани во светското рели. Настан кого седумкратниот светски шампион Себастијан Ожие сакаше да го добие по рекорден шести пат пред да се повлече од релито и да го надмине легендарниот Финец Марку Ален со кого сега го дели успехот од пет победи во Потугалија. Ова исконско рели воедно има сентиментална вредност за Ожие бидејќи токму во Португалија пред 11 години тој ја забележа својата прва победа во WRC. Сепак, желбите и реалноста најчесто се разидуваат како што Ожие беше горчливо потсетен на годинешниот настан од тимскиот другар Елфин Еванс.
Велшанинот кому на минатото рели победата му избега за делови од секундата беше решен да го победи Ожие. И успеа. Ја освои четвртата победа во кариерата и му се доближи на Ожие на само два бода во генерален пласман. Но, патот до победата беше трнлив. Посебно во битката со возачите на Hyundai кои покажаа дека нивните i20 WRC се исклучително брзи на чакал. Тоа го увидоа и Ожие, и Еванс. Тие едногласно признаа дека нивните автомобили не се најбрзите на настанот. Доказ се освоениот број брзински испити од 13 спрема 7 за Hyundai. Затоа од својот тим Toyota Gazoo Racing побараа да извлечат подобри перформанси од Yaris WRC за претстојното рели на Сардинија.
Дека сериозно атакува на победа Еванс покажа пред стартот на релито. Беше најбрз за време тестот иако петмина беа наредени во време од една секунда. Обилните дождови пред почетокот на релито оставија доста влага врз чакалот и земјата под него така што и во Португалија изборот на гуми се чинеше пресуден врз исходот. Првиот ден од релито сепак мина во знак на тимот на Hyundai. Дани Сордо, От Танак и Тиери Нувил беа тројката која постави пеколно темпо кое останатите не можеа да го следат. Сордо иако настапи со нов совозач, Борја Розада, успеа да ги смете конкурентите во првиот круг брзинци и остана на врвот сè до претпоследниот брзинец од денот. Тогаш на еден свијок му изгасна моторот и загуби драгоцени секунди препуштајќи му го водството на крајот од денот на тимскиот другар От Танак кој профитираше од несреќата на тимските другари. Нувил, пак, на истиот брзинец излета во ендек, го скрши потпирањето на задното десно тркало по што мораше да се откаже. Еванс не можеше да ја најде вистинската комбинација. Иако најбрз на тестот на релито се мачеше со изборот на гуми и балансот на автомобилот. „Тврдите гуми немаат тракција, а меките пливаат премногу правејќи го автомобилот нестабилен,” се жалеше Еванс. Во текот на денот не можеше подобро од четвртото место, а беше најдобар од останатите. Сепак, проблемите на Сордо и Нувил му дозволија да заврши втор. Сордо беше трет, Катсута четври, а Ожие петти.
Вториот ден од релито повторно течеше во знакот на Hyundai, но не заврши со него. Танак продолжи со пеколното темпо. Доминираше утрото освојувајќи ги сите брзинци и зголемувајќи ја предноста пред Еванс. Сепак, згреши кога го оштети потпирањето на претпоследниот брзинец од денот и беше приморан да се откаже на 4 km од целта. Така предноста ја искористи Еванс и стана лидер на релито на крајот од денот. Интересно е што третопласираниот Сордо сè уште беше многу брз и буквално ја стопи предноста на Еванс. Велшанинот беше шокиран од брзината на Сордо. Буквално не можеше да верува од каде доаѓа брзината на Hyundai. Но, за жал грешките го десеткуваа корејскиот тим на средина од релито. Сепак, релијата и шампионатот не се добиваат само со брзина, туку и со постојаност. Сордо го заврши денот на втората позиција силно притискајќи го Еванс пред стартот на последниот ден. Голема битка се водеше за четвртата, односно за третата позиција по откажувањето на Танак. Главни ривали беа шампионот Ожие и тимскиот другар Такамото Катсута. Ги делеа делови од секунда, но на крајот од денот Ожие беше побрз за само 1,5 секунди. Петти заврши новакот Ејдриен Формо со својата Fiesta WRC. Неговиот налет силно го почувствува тимскиот другар Гас Гринсмит кој сепак има поголемо искуство во тимот на M-Sport Ford.
Еванс беше одлучен да не дозволи изненадувања на последниот ден од релито. Затоа возеше како попарен на првиот брзинец од денот успевајќи да му земе безмалку 10 секунди на Сордо зголемувајќи ја предноста на 20,3 сек. со уште четири останати брзинци до крајот на релито. Еванс го контролираше остатокот од денот без да форсира, но сепак бележеше добри времиња и победи на уште два брзиници за конечна победа и предност од 28,3 секунди пред Сордо. Ожие ја задржа третатат позиција, а Катсута четвртата. Возачите на M-Sport Ford, Гринсмит и Формо кои во текот на целиот настан имаа проблеми со електронската контрола на педалот за гас ги сменија позиициите на крајот од релито. Гринсмит заврши петти, а Формо шести.
На крајот од релито Ожие призна дека немал доволно брзна за подобар резултат. Шампионот заради првата стартна позиција ја имаше таа несреќа да го мете слободниот чакал од патеките мачејќи се за тракција и не успеа да го најде вистинскиот ритам. Така се сруши надежта да стане новиот рекордер со шест освоени победи на релито во Португалија. Затоа, пак, останува на лидерската позиција во шампионатот за возачи и со 79 бода води пред Еванс кој има 77. Трет е Нувил со 57 бодови, четври е Танак со 45 бодови, а петти Рованпера со 41 бод.
Меѓу производителите Toyota го зголеми водството пред Hyundai. Јапонскиот тим има 183 бодови, додека корејскиот 146 бодови. M-Sport Ford има само 64 бода. Следно е релито на Сардинија кое повторно ќе ги стави пред тежок испит екипажите и тимовите од Светскиот шампионат.
ТОП НОВОСТИ
