ДУЕЛОТ МЕЃУ НАЈУСПЕШНИТЕ ВОЗАЧИ ВО ИСТОРИЈАТА НА РЕЛИТО СЕБАСТИЈАН ЛОЕБ И СЕБАСТИЈАН ОЖИЕ СЕ ПОКАЖА КАКО ПОВЕЌЕ ОД СООДВЕТЕН СТАРТ ЗА ПЕДЕСЕТТАТА СЕЗОНА ОД СВЕТСКИОТ ШАМПИОНАТ ВО РЕЛИ И ВЛЕГУВАЊЕТО ВО НОВАТА ХИБРИДНА ЕРА
Годинешното издание на релито на Монте Карло ќе има посебно место во историјата на светското рели, бидејќи ја крева завесата над новата и возбудлива ера на Светскиот шампионат каде за првпат ќе се натпреваруваат хибридни автомобили. На планинските превои од Француските Алпи кои се надвиваат над Монте Карло се крева зора над иновативната зелена група Rally 1, во која, кон 1.6 литарскиот турбо бензинец од досегашните автомобили WRC се припојува електричен мотор од 100 kW. На стартот на оваа јубилејна 50-та сезона на Светскиот шампионат во рели ќе згрмат хибридните рели-монструми со моќност од далеку преку 500 КС и ќе ја отворат вратата на новата генерација на ривалство во шампионатот. Покрај можноста за регенерација на енергијата од хибридниот „plug-in” систем, автомобилите ќе користат и сосема ново гориво кое е 100 отсто ослободено од фосили и хидрокарбонати заради што Светскиот шампионат во рели заслужено ќе ја носи својата нова зелена етикета.
Затоа годинешното рели на Монте Карло не е само уште еден традиционален старт на сезоната. Покрај желбата на тесните планински патеки да се видат новите автомобили на дело, со нетрпение се очекуваше и директниот дуел меѓу најуспешните возачи во историјата на релито, Себастијан Лоеб и Себастијан Ожие. Лоеб со девет титули и седум победи на ова славно рели, а Ожие со осум титули и осум победи. Ожие кој лани го освои ова рели и остана во тимот на Toyota би требало да има предност, наспроти Лоеб кој последен пат победи во 2013 година, а годинава прејде во тимот на M-Sport Ford и на Монте Карло доаѓа директно од релито Дакар каде го освои второто место. Тие за првпат ќе се фатат во костец на ова рели како возачи со делумна програма во склоп на своите тимови. Но, поважен е фактот дека и двајцата ќе седнат зад волан на сосема нови автомобили кои не ги познаваат доволно, и двајцата имаат нови совозачи со кои, исто така, не се познаваат доволно добро. Оттука доаѓа изедначеноста на силите, настрана очекувањата на љубителите на релито за голем дуел меѓу нив.
Освен делумната програма која годинава ќе ја вози Ожие, тимот на Toyota Gazoo Racing останува не сменет во поглед на составот на возачи. Во тимот се: Елфин Еванс, Кале Рованпера, Есапека Лапи и Такамото Катсута.
Тимот на Hyundai Motorsport останува без Крег Брин. Неговото место го пополнува Оливие Солберг. Младиот Швеѓанец доаѓа како поддршка на востановената постава: Тиери Нувил, От Танак и Дани Сордо.
Најмногу новини има во тимот на M-Sport Ford World Rally Team. Покрај новиот автомобил Ford Puma нов лидер на тимот е Крег Брин кому грбот ќе му го чуваат младите Гас Гринсмит и Ејдриен Формо кои минатата година со Fiesta покажаа солидни перформанси. Како поддршка на тимот доаѓа Себастијан Лоеб.
Релито на Монте Карло стартуваше од срцето на Монако, поточно од ново реновираниот Плоштад на казината, за првпат после 2006 година. После толку години Монако ќе биде и центарот на релито, и главно место на збиднувањата поврзани со настанот. За првпат после 2013 година во темница се вози и прославениот планински превој Кол де Турини каде илјадната публика наредена крај пат несебично ги бодри модерните гладијатори дури и при пандемија, и при температури кои задираат длабоко во минус.
Стартот на релито се случи како што и доликува на едно големо отворање кога под крилја на ноќта се возеа првите два брзински испити. Под снопови светлина на дополнителните рефлектори поставени на хауба на автомобилите кои ноќта ја претвораат во ден, возачите кои сè уште ја немаа почувствувано мешавината од бензинска и електрична моќност во натпревар се обидуваа да ги контролираат своите автомобили справувајќи се со смрзнатиот асфалт. Директно во костец се фатија двајцата мајстори на Монте Карло, а честа да го добие првиот ден му припадна на Ожие кој победи на двата брзински испити и го поведе релито со 6,7 s пред Лоеб. Двајцата признаа дека биле исклучително внимателни заради мраз на асфалтот, но и заради специфичноста на хибридниот погон кој многу лесно ги прегрева гумите.
НОВ ДЕН, НОВИ ПРЕДИЗВИЦИ
Првиот, полн натпреварувачки ден, донесе и нов рекорд: Најстариот возач којшто водел на рели од Светскиот шампионат. Рекордот му припаѓа на Себастијан Лоеб кој доминираше победувајќи на четири од вкупно шест брзински испити. Лоеб призна дека возел на лимит низ првите три утрински брзинци бидејќи се чувствувал удобно зад волан на хибридната Ford Puma. Иако вообичаено претпазлив кога седнува зад волан на нов автомобил Лоеб бил изненаден дека веднаш фатил ритам и знаел дека може да притиска. Лутиот ривал Ожие, пак, пренесе спротивна слика најмногу заради изборот на гуми кои го натерале на внимателен пристап кон возењето. После четвртиот брзински испит од денот Ожие беше трет и заостануваше 15,9 s зад Лоеб и 1,4 s зад Еванс. Сепак победата на последниот брзинец од денот му го донесе второто место со 9,9 s зад Лоеб. Еванс го заврши денот на третото место, Нувил беше четврти, Танак петти, а Брин шести. Трагичар на денот беше Формо кој на првиот брзински испит удри во карпа и одлета во бездна на другата страна од патот. Заради ултра цврстиот заштитен кафез на новите автомобили Формо и совозачот Кориa се извлекоа неповредени.
Борбата меѓу Лоеб и Ожие продолжи и во текот на третиот ден од релито, а како победник од жестокиот дуел излезе Ожие. Беше најбрз на два од три брзински испити во утринската сесија создавајќи предност од 5,4 s пред Лоеб. Итрината при изборот на гуми му помогна да триумфира и во попладневната сесија. Како и повеќето возачи Ожие избра микс од две меки гуми и две гуми за снег, но во последен момент, откако го забележа изборот на Лоеб, се одлучи само за меки гуми. Тоа му помогна да го зголеми водството на 21,1 s до крајот од денот. Лоеб не се снајде најдобро за разлика од претходниот ден. Призна дека сакал да го измами Ожие со изборот на гуми во последен момент, но дека трикот не успеал. Третото место му припадна на Брин, откако ривалите пред него беа десеткувани. Еванс излета и изгуби многу време додека го извлечат, Танак удри во снежен брег и го оштети ладилникот, а Нувил имаше проблеми со сопирачките. Рованпера после многу измени конечно најде соодветен сетап и победи на двата последни брзинци од денот искачувајќи се на четвртата позиција. Гринсмит заради проблеми со моторот и дупната гума заврши петти, а Нувил шести.
Вистинска драма на последниот ден од релито во кој преостанаа четири брзински испити. После вториот брзинец од денот Ожие ја зголеми предноста пред Лоеб на 24,6 s и подзабави за да ја контролира ситуацијата на преостанатите два испити. Но, на претпоследниот испит Ожие дупна гума и куцајќи на три тркала не успеа да ја сочува предноста. Загуби 9,5 s во однос на Лоеб и падна на второ место. На последниот брзински испит Лоеб ја сочува ладнокрвноста, дури успеа да добие секунда и победи со 10,5 s предност пред Ожие. Брин ја задржа третата позиција, Рованпера четвртата, Гринсмит петата, а Нувил шестата.
Со успехот 47 годишниот Себастијан Лоеб стана најстариот возач кој победил на рели од Светскиот шампионат, воедно е најстариот возач кој победил на релито на Монте Карло. Годинешната победа е негова осма на ова рели со што го изедначи рекордот на Себастијан Ожие. И со неа потврди дека е најуспешниот возач во историјата на релито кој го освојува подиумот низ три различни декади. Голем успех и за совозачот Изабел Гелмиш, 50 годишната учителка, која се закитува со победа на својот прв настап во врвот на релито. Воедно Гелмиш е и прва жена која победила на рели од Светскиот шампионат од 1997 година наваму.
Во насока на очекувањата, дуелот меѓу најуспешните возачи во историјата на релито се покажа како повеќе од соодветен старт за педесеттата сезона од Светскиот шампионат во рели кој влегува во нова хибридна ера со која се обезбедува светла иднина на оваа крајно возбудлива гранка на мотоспортот.
ТОП НОВОСТИ
