ОЧЕКУВАЊАТА ЗА АПСОЛУТНА ПРЕВЛАСТ НА ШАМПИОНОТ СЕБАСТИЈАН ОЖИЕ НА ПОЧЕТОКОТ ОД СЕЗОНАТА НЕ СЕ ИСПОЛНИЈА. ИАКО ПОБЕДИ НА МОНТЕ КАРЛО СО СВОЈОТ СТАРО-НОВ ТИМ CITROEN, ОТ ТАНАК Е ТОЈ ШТО БЛЕСНА ПОСЛЕ ДВЕТЕ СПЕЦИЈАЛИСТИЧКИ РЕЛИЈА.
Шест победи една по друго со три различни автомобили забележува Себастијан Ожие откако го освои релито на Монте Карло со кое традиционално се отвора сезоната во Светскиот шампионат во рели.Всушност Ожие бележи вкупно седум победи со четири различни производители на ова традиционално рели, но шест од нив се последователни. Враќајќи се во таборот на својот старо-нов тим Citroen, Ожие славеше на своето омилено рели кое го смета за домашно бидејќи градот Гап каде е роден, е домаќин на релито.Со него Citroen дојде до својата јубилејна 100-та победа во светскиот шампионат. Меѓутоа победата ниту од далеку не беше надмоќна. Напротив. На крајот само 2,2 сек. го делеа од второпласираниот Тиери Нувил зад волан на Hyundai i20 WRC. Оваа епска битка меѓу Ожие и Нувил го забележа најтесниот финиш во историјата на релито на Монте Карло. На стартот на последниот брзински испит Нувил заостануваше зад Ожие само 0,4 сек., а кон средина на брзинецот дури и беше во водство. Сепак, до крај Французинот успеа да се извлече и да победи за влакно и покрај проблемите со сензорот за гас кој остануваше заглавен туркајќи го
автомобилот и при сопирање.Третопласираниот От Танак имаше подеднакво сериозен настап. Естониецот стигна до подиум и покрај тоа што загуби 2 мин. и 30 сек. на почетокот од релито заради скршено тркало, а патем во дуел го доби и повратникот во Светскиот шампионат легендата Себастијан Лоеб.
На вториот специјалистички настан на почетокот од сезоната, релито на Шведска, От Танак продолжи од каде што заврши во Монте Карло. Брилиираше во текот на целиот снежен настан и победи. Танак немаше потреба да форсира контролирајќи ја ситуацијата од врвот. Велеше дека во секој момент може да биде побрз доколку тоа е потребно, но се чини дека ниту еден од конкурентите не му беше рамен на ова рели. Тој стана четвртиот нескандинавец кој победил на ова рели, а заедно со победата го превзеде и водството во генерален пласман. Всушност на релито во Шведска битката се водеше за второ и трето место меѓу Есапека Лапи од Citroen, Тиери Нувил и Андреас Микелсен од Hyundai и Елфин Еванс од Ford. На крај Лапи и Нувил се качија на подиумот, додека Микелсен и Еванс завршија четври и петти. Победникот од Монте Карло откако излета од патека и заглави во снег мораше да се откаже. После повторниот старт релито го заврши на единаесетата позиција.
На релито во Шведска возачот на Toyota, Јари-Мати Латвала го забележа својот 197-ми настап во Сетскиот шампионат и стана возач со најмногу одвозени релија во историјата на шампионатот. Латвала го надмина досегашниот рекордер по број на одвозени релија легендарниот Карлос Сајнц. Интересно Латвала постави нов рекорд токму на релито на кое во 2008 година се закити со титулата најмлад возач кој победил на едно светско рели на 22 години и 313 дена.
Победата во Шведска и третото место на Монте Карло го промовираа Танак во лидер на шампионатот. Освојувајќи 47 бодови тој има 7 повеќе пред Нувил кој со 40 бода е втор и 16 повеќе од Ожие кој со 31 бод е трет. Меѓу производителите води Toyota со 58 бода пред Hyundai со 57, Citroen со 47 и Ford со 30 бодови. После специјалистичките релија со кои беше отворена сезоната во светското рели вистински одмер на силите се очекува на релијата на Мексико и на Корзика.
ТОП НОВОСТИ
