ТИЕРИ НУВИЛ ПОБЕДИ НА ИСКЛУЧИТЕЛНО НЕПРЕДВИДЛИВОТО РЕЛИ НА ЈАПОНИЈА И НА СВОЈОТ ТИМ МУ ОВОЗМОЖИ ДА СЛАВИ ВО ДОМОТ НА TOYOTA, БЕЗ ОГЛЕД ШТО БОРБАТА ЗА ШАМПИОНСКИТЕ ТИТУЛИ ЗАВРШИ ПРЕД СТАРТОТ НА ОВА ПОСЛЕДНОТО РЕЛИ ОД СЕЗОНАТА
Минаа точно дванаесет години откако последен пат монструмите од Светскиот шампионат во рели со грмотевици од издувот и шкрипење на гумите ја параа тишината која ги обвива шумите послани низ јапонските острови. Релито на Јапонија во 2010 година тивко си замина од календарот на WRC, но сега, дванаесет години подоцна приреди едно извонредно финале исполнето со драма, на една извонредна сезона. Со сосема нов концепт и подлога, и на сосем друг остров, годинешното рели на Јапонија пишува нова историја. За разлика од настаните во минатото кои се одржуваа на северниот јапонски остров Хокаидо и се возеа на чакал, новиот формат на релито на Јапонија се префрла на асфалт и се вози на главниот и најголем остров од јапонскиот архипелаг, Хоншу. Поточно патеките низ кои се распоредени брзинските испити вртат во близина на градот Тојота, додека сервисниот парк е сместен веднаш до централата на најголемиот производител на автомобили на светот Toyota.
Сето ова не е случајност туку плод на настојувањата на претседателот на Toyota, Акио Тојода. Tој е главен поборник за враќањето на Јапонија на светската рели сцена. И би рекле со причина бидејќи ова последно рели од сезоната се покажа во светло на вистински спектакл исполнет со драма и неизвесност буквално до пред самиот крај. Релито стартуваше во четврток навечер и се возеше низ градскиот парк на Тојота каде илјадници фанови можеа да уживаат гледајќи како рели-монструмите сечат низ темницата со дополнителните светла поставени на хауба. Исклучително атрактивен брзински испит кој за жал беше прекинат после стартот на дваесеттиот екипаж заради тешката несреќа на локалниот херој Тошихиро Араи кој порано успешно се натпреваруваше во Светскиот шампионат во рели за сериски модификувани автомобили – PWRC и беше шампион во својата класа во 2005 и 2007 година. Испитот го освои Себастијан Ожие кој од ова рели има нов совозач Винсент Ландаи, додека во рамките на 1,2 секунди беа наредени Крег Брин, От Танак, Тиери Нувил, Кале Рованпера и Елфин Еванс. И секој од нив со исчекување за исходот на првиот вистински ден од релито. Рованпера беше најбрз на првиот испит во петок наутро, тесно следен од Нувил кој заврши само 1,8 сек. зад него. Останатите веќе заостануваа повеќе од 5 секунди. Единствен кој имаше добро време на минување беше Ожие, но дупна гума, ја менуваше и загуби повеќе од две минути со што буквално беше декласиран за постигнување на подобар резултат до крајот на релито. Овој испит имаше несреќен крај и за Дани Сордо. Неговиот автомобил Hyundai i20 N се запали кон средина на испитот. И покрај настојувањата да го изгаснат со помош на другите екипажи кои наидуваа зад него тоа не успеа и автомобилот изгоре до шасија. Среќа Сордо и совозачот Кандидо Карера се извлекоа неповредени. Испитот беше прекинат, а на останатите натпреварувачи им беа дадени преодни времиња.
Заради доцнење беше откажан и вториот испит од денот. Така натпреварувачите беа упатени кон третиот кој, исто така, беше прекинат заради несреќата на Крег Брин. Овој испит требаше да се вози по втор пат како последен од денот, но штетата на безбедносните бариери што при излетувањето ја направи Брин не можеше да се поправи во кус рок и тој беше откажан. Во овој скратен формат на денот победата ја однесе Еванс тесно следен од Нувил и Рованпера распоредени во само 5 сек.. Танак заврши четврти, а домашниот херој Такамото Катсута беше петти.
Мечеви се кршеа од битката меѓу Еванс и Нувил која се водеше во саботата, буквално низ целиот натпреварувачки ден. Возачите се жалеа на исклучително непредвидливите услови и лизгавата подлога која не дозволува опуштање и не простува грешки. Сепак, најупорните истраеја до крај. Еванс и Нувил беа толку брзи што остатокот од конкуренцијата не можеше да ги допре. Кале се повлече уште утрото откако два пати дупна гума и стигна на првиот сервис на бандаж. До крајот на релито му остана само да тестира менувајќи го сетапот и собирајќи податоци за релито в година. На крајот од денот Нувил беше тој кој успеа да победи крадејќи му на Еванс четири секунди. Трет беше Танак. Тој ја наследи третата позиција од Рованпера и заостануваше зад водечката двојка безмалку 40 секунди. Катсута со преку една минута заостанување беше четврти, а Ожие на толку откажувања стигна до петтото место со скоро три минути дефицит.
Неделата осамна во очекување на едно возбудливо финале кое за жал не се случи. Временските услови, потенцијалниот дожд и вистинскиот избор на гуми го пресудија последниот ден од релито. Нувил советуван од својата метеоролошка екипа се одлучи за гуми за дожд со подеднакво распределена мешавина од тврда и мека смеша. Еванс не веруваше дека ќе врне и одбра гуми за суво со пола на пола поделена мешавина од тврда и мека смеша. Се покажа дека Еванс беше во право. Првиот испит од денот му одеше во прилог и тој го декласираше Нувил. Но, веќе на вториот заради недоразбирање со совозачот Велшанецот удри во камен крај патот и дупна гума. Тука застанаа сите негови желби за победа на домашното рели на неговиот тим. Нувил остана сам на врвот. Можеше да се опушти и со контролирано возење да стигне до својата втора победа во сезоната. За волја на вистината предвидениот дожд на Нувил сепак дојде на последните два испити од релито, но за него тоа и без друго беше неважно во оваа ситуација.
Танак го наследи второто место од Еванс за да му ја донесе 1 – 2 победата на тимот на Hyundai кого по своја волја го напушти со завршувањето на ова рели незадоволен од резултатите во изминатите две сезони. Третото место на подиумот го пополни Катсута на голема радоста на своите домашни фанови. Четвртото и петтото ги пополнија Ожие и Еванс кои дополнително ја зацврстија победата на Toyota во шампионатот за производители.
Со релито на Јапонија заврши првата сезона од хибридната ера на Светскиот шампионат во рели. Сезона во која тимовите и екипажите имаа многу за учење, за во следната да влезат со поголемо искуство за подобри резултати.
ТОП НОВОСТИ
