СЕБАСТИЈАН ОЖИЕ МОЖЕБИ НЕ ПОБЕДИ НА ПОСЛЕДНИОТ НАСТАН ОД СЕЗОНАТА РЕЛИТО НА АВСТРАЛИЈА, НО ЗАТОА СМИРЕНОТО ВОЗЕЊЕ И ПРЕСМЕТЛИВИОТ НАСТАП МУ ПОМОГНАА ДА ЈА ЗГРАБИ ШЕСТАТА ПО РЕД ТИТУЛА ВО СВЕТСКИОТ ШАМПИОНАТ ВО РЕЛИ.
За возбудата да биде поголема годинава за шампионската титула се одлучуваше безмалку до последниот брзински испит. Релито на Австралија беше последен настан од сезоната и ја доживеа тежината на бремето да биде одлучувачко. За нештата да се усложнат лизгавиот чакал кој бега под тркалата ја ограничува тракцијата. Тркалата се борат да пробијат до цврста подлога, а возачите да ја сочуваат контролата. Затоа инцидентите се многубројни, а со нив и откажувањата. Овие услови ги десеткуваат екипажите, а годинава од нив најмногу придобивки извлече Себастијан Ожие. Заврши петти, но затоа се закити со шестата по ред возачка титула во Светскиот шампионат во рели.
Себастијан Ожие и Тиери Нувил стартуваа со подеднакви шанси за успех, но нервите на Французинот се покажаа поиздржливи од оние на Белгиецот. На почеток и двајцата се мачеа со лизгавата подлога. Како водечки во шампионатот стартуваа први и играа улога на метла за останатите екипажи. Затоа нивните времиња не беа за пофалба. Ожие првиот ден од релито го заврши седми, а Нувил кој дупна гума и се изврте на шикана беше десетти. Лидер на релито по првиот ден беше Мадс Остберг, а зад него се наредија Крег Брин, исто така, со Citroen и Јари-Мати Латвала со Toyota.
От Танак, третиот кандидат за титула, ја искористи предноста од добрата стартна позиција и од петто место по првиот ден, стигна до лидерска позиција на крајот од вториот ден од релито. Водеше жестока борба со тимскиот другар Латвала и се избори за победа. Добриот пласман на Танак и Латвала значеше голем успех за целиот тим кој стигна на дофат до титулата. Трет во денот беше Хајден Падон, вториот возач на Hyundai, додека Остберг падна на петтото место. Како да ги сменија местата со Танак од претходниот ден. Ожие и Нувил повторно се мачеа со тракцијата. Ожие заврши шести, а Нувил осми.
Одлучувачки беше последниот ден од релито. Ден кога чувањето на нервите и прибраноста ја направи разликата во трката за титула. Ожие го направи токму тоа. Големото искуство и предноста во однос на Нувил и Танак, иако минорна, му дозволија да стигне до нова титула пред следната година да го напушти тимот на Ford и замине во Citroen. Нувил и Танак премногу ја посакуваа титулата и токму желбата за успех ги направи брзоплети. Танак изгуби контрола на претпоследниот брзинец и заврши забивајќи се во дрво, додека Нувил еден брзинец претходно удри во брег и го откина задното тркало на својот i20 WRC. Тука заврши нивната надеж за шампионска титула.
Латвала победи на релито, втор беше Падон, а трет Остберг. Ожие заврши петти освојувајќи 10 бода, но победи на последниот телевизиски брзинец кој му донесе уште 5 бода. Така сезоната ја заврши со вкупно 219 бода. Нувил остана на 201, а Танак на 181 бод.
Рели легендата Томи Макинен како шеф на тимот на Toyota беше пресреќен откако неговите возачи му ја донесоа титулата меѓу производителите. Според него титулата дошла една сезона порано од предвидувањата, но брзиот развој на автомобилот ветува дека истото може да се очекува и следната сезона. Меѓу производителите Hyundai заврши на второ место, Ford е трет, а Citroen четврти. Следната сезона 2019 стартува на 24 јануари во Монте Карло.
ТОП НОВОСТИ
