ПО ПОБЕДАТА ВО ФИНСКА, ЕЛФИН ЕВАНС СЕ ВРАТИ ВО ТРКАТА ЗА ТИТУЛА НАМАЛУВАЈЌИ ЈА РАЗЛИКАТА ВО ГЕНЕРАЛЕН ПЛАСМАН НА 25 БОДА ВО ОДНОС НА ВОДЕЧКИОТ РОВАНПЕРА КОЈ ЈА РАЗОЧАРА ДОМАШНАТА ПУБЛИКА ПОСЛЕ СТРАШНОТО ИЗЛЕТУВАЊЕ
С о четири исклучително тешки настани до крајот на сезоната нè очекува жешка есен. Релито на Естонија и релито на Финска, кои како и лани се возеа едно по друго, со вовед во завршницата на сезоната која треба да ни приреди вистинска драма. Само 25 бода ги делат водечкиот Кале Рованпера и неговиот тимски другар Елфин Еванс додека јуришаат за освојување на титулата. Победата на релито на Финска беше од големо значење за Еванс. Тој последен пат ја вкуси победата токму во Финска во 2012 година кога титулата му побегна за влакно. Минатата година беше катастрофална за Еванс, бидејќи не победи на ниту едно рели и заврши четврти во шампионатот. Затоа, пак, годинава е на добар пат повторно да се бори за освојување на титулата.
| WRC2 – МИКЕЛСЕН Е СÈ ПОБЛИСКУ
Норвежанецот Андреас Микелсен со победата на релито на Естонија ги зголеми шансите за освојување на шампионската титула во WRC2. Четвртото место во Финска само ги потврди аспирациите на Микелсен. Тој се надева дека во преостанатите четири настани од шампионатот ќе успее да ја задржи предноста, и да го повтори успехот од 2021 година кога стана светски шампион во WRC2. Неговиот најлут ривал Јохан Росел од Франција не возеше ниту во Естонија, ниту во Финска и му дозволи да се одвои во генерален пласман. Сами Пајари е третиот возач во тесната борба за титула. Пајари во Естонија стигна до второ место, но затоа, после целосна доминација однесе блескава победа на релито на Финска. |
РЕЛИ НА ЕСТОНИЈА
Кале Рованпера со нетрпение го чекаше стартот на релито на Естонија. Актуелниот светскиот шампион и водечки во шампионатот се готвеше да ја наниже третата по ред победа на ова рели. Тој на ова рели кое го смета за свој дом, славеше во 2012 и во 2022 година, а победите ги доби со голема предност покажувајќи неприкосновеност. Единствената опасност требаше да дојде од От Танак кој во нов тим и со нов автомобил сакаше да ги оправда симпатиите на домашната публика. Меѓутоа за Танак релито почна наопаку. Иако беше најдобар на тренингот, моторот на неговата Ford Puma Rally1 откажа послушност. Тимот одлучи да го замени. Но, според техничките правила на FIA замена на мотор меѓу тренинг и прва временска контрола условува казна од 5 минути. Затоа, иако го отвори релито во четврток навечер со најдобро време на брзинскиот испит Танак заврши на 48 позиција, додека релито го поведе Елфин Еванс, пред Есапека Лапи и Кале Рованпера.
Сепак, петочното утро беше резервирано за вистинскиот старт на релито и почеток на тридневната епопеја низ супер брзите земјени патеки на Естонија. Танак со нов мотор во неговата Puma блескаше и победи на пет од вкупно седум испити предвидени за најдолгиот ден од релито. Да не беше казната ќе го водеше релито со солидна предност. Водечки во утринскиот дел од етапата беше Нувил, а Кале кој стартуваше прв се жалеше на недостаток од тракција. Меѓутоа до крајот од денот Рованпера беше човекот кој ги освои преостанатите два испити и го поведе релито со 3 секунди предност пред Нувил. Трет заврши Лапи кој успеа да ги надмине проблемите со хибридниот погон и да го добие Еванс на претпоследниот испит завршувајќи со 2,7 секунди предност. Еванс заврши четврти, Тему Сунинен, кој за првпат се најде во Hyundai i20N Rally1 беше петти, а Лубет шести.
Саботата покажа зошто Рованпера го смета релито на Естонија за свој дом. Ужива да се бори со брзите патеки, признавајќи дека му се најомилени во шампионатот. Можеби затоа и ја освои својата прва WRC победа токму на ова рели и стана најмладиот победник во историјата на светскиот шампионат. Победи на сите брзински испити од денот и успеа да го зголеми водството во однос на Нувил на 34,9 секунди. Белгиецот призна дека не може да најде вистински одговор за налетот на Кале и заклучи дека е подобро да ја задржи постоечката позиција отколку да загуби сè во обид да го стигне. Не се смени ниту поредокот во остатокот од првата петорка. Лапи остана на третата позиција и успеа да ја зголеми предноста пред Еванс на 7,3 секунди. Сунинен возеше осамен на петата позиција без можност да го загрози Еванс ниту, пак, да биде загрозен од шесто пласираниот Лубет. Танак кој блескаше ден претходно, имаше добри времиња, но беше далеку од водечката двојка. Сепак, успеа да дотурка до осмата позиција далеку зад седмо пласираниот Катсута.
Немаше големи возбудувања ниту на последниот ден од релито. Рованпера повторно ги освои сите испити од денот и заедно со оние од саботата запиша 13 победи на брзински испити едно по друго, со што го надмина рекордот на Лоеб од 2005 година кога на релито на Франција победи едно по друго на 12 брзински испити. Заедно со двата испити од првиот ден Рованпера освои вкупно 15 испити од релито, а останатите 6 му припаднаа на Танак. Така Кале стигна до својата трета по ред победа во Естонија. Нувил продолжи да заостанува не наоѓајќи вистински одговор за брзината на Кале и го заврши релито втор со заостанување од 52,7 секунди. Лапи го потполни последното место од пиедесталот, додека Еванс го задржа четвртото место. На своите позиции без промени останаа Сунинен, Лубет, Катсута и Танак.
РЕЛИ НА ФИНСКА
После вртоглавите перформанси и блескавата победа на релито на Естонија се очекуваше Кале Рованпера истото да го повтори и на релито на Финска, кое стартуваше десетина дена подоцна. Но, за жал таму исходот беше сосем поразличен. Во потера по својата прва победа на домашното рели Рованпера беше најбрз за време на тестирањето, иако само делови од секунда го делеа од неговиот тимски другар Елфин Еванс кој славеше во Финска во 2021 година. Релито стартуваше во четврток со специјалниот брзински испит кој се возеше низ улиците на градот домаќин Иваскила преплавени од публика. Танак беше човекот кој го поведе релито и постави солидно темпо со надеж дека ќе се освети за пехот што му се случи во Естонија. Трикратниот победник на ова рели, Танак, со нетрпение ја очекуваше и четвртата победа. Затоа тргна силно оставајќи ги зад себе Нувил, Рованпера, Лапи и Еванс.
Танак, охрабрен од успехот на првиот брзински испит и поттикнат од желбата за одбрана на минатогодишната победа на ова рели стартуваше во полн налет. Но, во петок наутро, како и во Естонија, за него релито заврши прерано. На вториот испит од денот после лошо слетување Танак го оштети картерот. Моторот откажа и тој мораше да се повлече од релито. Лош ден за тимот на M-Sport Ford бидејќи и Лубет се откажа откако излета и го оштети задникот на неговата Puma. Екипажите на Ford не беа единствените кои се откажаа. Набрзо по нив излета и Лапи удирајќи во дрво. Среќа заедно со совозачот Јане Ферм излегоа неповредени. Рованпера ја искористи приликата и рано го поведе релито, но лошата среќа го стигна и него. На осмиот испит од денот излета и тешко го оштети возилото по што мораше да се откаже. Тука заврши надежта на Кале за прва победа на домашното рели. Водството го презеде неговиот тимски другар Елфин Еванс и го заврши денот на лидерската позиција со 6,9 секунди предност пред второ пласираниот Нувил. Третото место му припадна на Катсута за кого Финска е вториот дом, а Тему Сунинен вистинското изненадување во тимот на Hyundai заврши четврти. Шефот на тимот на Toyota и поранешен возач Јари-Мати Латвала кој одлучи да стартува а ова рели заокружувајќи го 210 старт во кариерата во WRC го заврши денот на петтото место.
Големите оштетувања на возилата не дозволија Танак, Лапи и Рованпера да стартуваат повторно во сабота наутро. Само Лубет имаше доволно среќа да продолжи. Денот мина во знак на Еванс. Велшанецот победи на сите испити освен на последниот кого му го препушти на Катсута. Блескавото возење на Еванс, какво што одамна не се случило, му помогна на Велшанецот да ја зацврсти лидерската позиција. Тој ја зголеми предноста во однос на Нувил на 32,1 секунди и остави доволно простор за посмирен пристап на последниот ден од релито. Немаше измени ниту подолу во поредокот. Катсута го задржа третото место, Сунинен четвртото, а Латвала не успеа да стигне подалеку од петтото.
Со четири брзински испити во недела, последниот ден од релито, настаните за Еванс не требаа да бидат сложени. Победи на три испити вклучувајќи го и последниот кој се бодува дополнително, така ја зголеми предноста во однос на Нувил на 39,1 секунди и се закити со втората победа на ова рели. Нувил не можеше да го најде вистинскиот одговор за брзината на Еванс и мораше да се задоволи со второто место. Катсута го задржа третото, а Сунинен четвртото место. И покрај напорите Латвала не стигна подалеку од петтото место заостанувајќи повеќе од 4 минути зад водечкиот. Со победата во Финска, Еванс се врати во трката за титула. Разликата во генерален пласман меѓу водечкиот Рованпера и него по релито на Естонија изнесуваше 55 бода, но по Финска таа се намали на 25 бода со четири исклучително тешки настани до крајот на сезоната. Рованпера сè уште е лидер во генерален пласман. Има 170 бода, додека со своите 145 бодови Еванс е блиску. На третото место е Нувил со 134 бодови, додека Танак сè уште стои долу на четвртата позиција со 104 бодови. Добрите резултати на екипажите на Toyota на последните две релија и помогнаа на марката драстично да ја зголеми разликата во однос на тимот на Hyundai. Сега Toyota има 378 бодови, додека Hyundai стигна до 311 бодови. Тимот на M-Sport Ford, пак, со своите 205 бодови е далеку назад.
ТОП НОВОСТИ
