ХИПЕРБРЗИОТ ОТ ТАНАК ГО ОСВОИ ГОДИНЕШНОТО РЕЛИ НА ФИНСКА И СО СВОЈАТА ТРЕТА ПОБЕДА ОД ПОСЛЕДНИТЕ ЧЕТИРИ РЕЛИЈА ГО ЗАЦВРСТИ ВОДСТВОТО ВО ГЕНЕРАЛЕН ПЛАСМАН СО ЗДРАВИ 22 БОДА ПРЕД АКТУЕЛНИОТ ШАМПИОН СЕБАСТИЈАН ОЖИЕ.
Убедливата победа на От Танак на релито во Финска докажа дека Естонецот е создаден од шампионски ков. После летната пауза во Светскиот шампионат во рели, релито на Финска е настанот со кого се отвора втората половина од сезоната и влезот во завршницата. Токму тука на мазните песокливи патеки кои вијугаат околу шумите и езерата на Финска и обилуваат со слепи свијоци и големи скокови, Танак покажа дека лошата среќа на релито на Сардинија кога скршеното управување на само неколку километри до целта го чинеше победа е испратена во заборав. Бодрен од толпа фанови од Естонија, кои за да го поддржат својот сонародник го препловија Балтичкото море, Танак ја надмина неповолната положба на првата стартна позиција. Иако мораше да го мете слободниот песок на патеките овозможувајќи им на останатите да дојдат до поцврсто тло и подобра тракција за подобри перформанси, сепак на крајот од релито на голема радост на своите поддржувачи стигна до значајна победа за преостанатиот дел од сезоната.
Брзиот и бесен петок како прв натпреварувачки ден од релито му дозволи на Јари-Мати Латвала да слави на крајот од денот. Но, разликата во однос на најблиските конкуренти се мереше со делови од секунда. Подобрата стартна позиција му овозможи на Латвала да стекне предност пред тимските другари Крис Миик и Танак, но разликата од неполни две секунди беше незначајна. Во оваа битка на триото на Toyota се вмеша и Есапека Лапи. Победникот во Финска од 2017 година зад волан на Citroen C3 WRC конечно доби можност да ги покаже своето возачко умеење. После измените на предниот диференцијал кои толку долго се чекаа во Citroen, Лапи призна дека конечно вози автомобил кому може да му верува за да форсира. И оваа доверба го стави рамо, до рамо во битката за победа на за него домашното рели.
Во поглед на тесно водената борба ниту вториот ден од релито, сабота, не се разликуваше. Барем не на почеток на денот. Екипажите на Toyota продолжија да го контролираат настанот. Но, сè до молскавично брзиот трет испит од денот, или 14-ти брзинец на настанот Какаристо. На исто место и Латвала, и Миик удрија во камен. Латвала загуби многу време со дупната гума, додека Миик мораше да се откаже и повторно да стартува во недела. По овој неочекуван настан Танак мина во водство, а Лапи заврши втор. И покрај дупнатата гума Латвала успеа да го заврши денот на третата позиција. Голема борба се водеше и за четврто место меѓу Ожие, и пулените на Hyundai, Андреас Микелсен и Крег Брин. Микелсен е тој кој во оваа битка го победи Ожие и заврши четврти, Ожие беше петти, а Брин шести.
Танак во стил на голем мајстор ја задржа стекнатата предност на последниот ден од релито. Не форсираше, но беше доволно брз за да ја контролира ситуацијата од врвот. Лесно стигна до крајот на последниот брзинец и се закити со победа. Воедно победи и на специјалниот телевизиски брзинец и на своето конто впиша и дополнителни 5 бода, доволно за убедливо водство во генерален пласман. Второто место му припадна на Лапи, додека Латвала го пополни третото место. Микелсен остана четври, Ожие петти. Крег Брин, пак, покажа висока џентлменска свест. Намерно успори за да му дозволи на тимскиот другар и претендент за титула Тиери Нувил да заврши шести, и со тоа да освои повеќе бодови. На пет релија од крајот на сезоната Танак е во водство во Светскиот шампионат за возачи. Има вкупно 180 бодови, или 22 повеќе од второпласираниот Ожие со 158 бодови и третопласираниот Нувил со 155 бодови. Кај производителите води Hyundai со 262 бода, пред Toyota со 238 и Citroen со 198 бодови. Ford e на последно место со 158 бодови.
ТОП НОВОСТИ
