ЗА ДАНСКА ЧЕСТО СЕ ВЕЛИ ДЕКА Е НАЈСРЕЌНАТА ЗЕМЈА ВО СВЕТОТ. А ТОА СЕ СВЕДУВА НА ЕДНА РАБОТА – ХИГЕ.
Хиге (hygge) се преведува на најразлични начини, од уметност на создавање блискост, преку пријатна душевна удобност, па сè до црпење задоволство од присуството на смирувачки нешта. Еве неколку идеи за хиге во текот на целата година.
ЈАНУАРИ: ФИЛМСКА ВЕЧЕР
Јануари е совршен за опуштање со пријателите и со семејството во некоја лежерна филмска вечер. Секој во друштвото нека донесе грицки за сите; изберете некоја стара филмска класика, нешто што сите веќе сте го гледале, па нема да пречи ако си разговарате додека трае филмот. Забавен додаток на филмската вечер е да измислите најкраток начин да ја раскажете приказната во конкретниот филм. Така, „Господар на прстените“ станува „Една група враќа накит девет часа“, „Форест Гамп“ станува „Девојка-зависничка од дроги со децении искористува едно момче со пречки во развојот“.
ФЕВРУАРИ: ОДМОР СО СКИЈАЊЕ
Доколку сте во можност, организирајте се со пријателите и со семејството во ова време од годината да одите на планина. Да, погледот од планините е воодушевувачки, брзото спуштање по падините крајно возбудливо, а воздухот е неверојатно чист ,но најдобар дел од патувањето со скијање е хиге. Магијата се случува кога со друштвото ќе се вратите во колибата, изморени од падините, валкани, со разбушавени коси, со грди волнени чорапи на нозете, а потоа сите во пријатна тишина се опуштате со кафе. Не заборавајте да спакувате и некое добро вино! Март: тематски месец Ако со семејството патувате некаде на летен одмор, ова би било начин како однапред да си доживеете малку хиге. Ако на летен одмор одите во Шпанија, во март истражувајте ја таа земја од далеку. Под „истражувајте“ се подразбира да гледате шпански филмови, да правите тапас, а ако имате деца, можеби една вечер да се занимавате така што ќе ставате ливчиња „стикери“ на столовите, на масата, врз чиниите на шпански, за да го поднаучите малку јазикот. Ако годинава не одите на одмор, можете да искористите тема од земја во која претходно сте патувале (ѕирнете ги фотоалбумите), или да си изберете дестинација за одмор од соништата. Ако не можете да одите во конкретната земја, донесете ја таа земја дома кај вас.
АПРИЛ: ПЛАНИНАРЕЊЕ И ГОТВЕЊЕ НА ОТВОРЕНО
Април може да биде прекрасен месец за пешачење со планинарење, на логорување, или на возење кану. Што се однесува до времето, може да биде малку свежичко – запомнете да си ги спакувате волнените чорапи (тие се дополнително хигелиге) – но, овој месец е поволен зашто тогаш има помалку комарци. Ако сте градски човек, природно е во првите часови минати во природа да почнете да паничите и да си мислите: Ама, што, по ѓаволите, ќе правиме овде без вај-фај? Но, кога ќе го надминете тоа чувство, пулсот ќе ви се смири и напнатоста ќе ви се намали. Шетањето низ природа е суштинско за хиге зашто содржи бавност, рустикалност и заедништво. Соберете гранки, направете оган, пригответе ја храната и набљудувајте ја додека полека се готви на отворен оган, а потоа, по вечерата, уживајте во чаша виски под ѕвездите, заедно со вашите пријатели. Ако излегувате во природа околу Велигден, не заборавајте да спакувате чоколадни јаца за децата.
МАЈ: ВИКЕНД ВО КОЛИБА
Во мај, денот се продолжува и тогаш е добро време да почнете да ја користите слободната природа. Можеби некој ваш пријател има колиба или можеби заедно евтино ќе најмите колиба; колку е порустикална, толку е похиге. Уште подобро ако има камин. Не заборавајте да спакувате друштвени игри за дождливите попладниња. Можеби некој викенд во мај ќе имате можност првпат таа година да правите скара. Што се однесува до летното хиге, ништо не е како кога стоите околу скарата со пиво во рака.
ЈУНИ: СОК ОД БОЗЕЛ И ЛЕТНА РАМНОДЕНИЦА
Почетокот на јуни е совршено време за берење бозел за сируп или лимонада. Сокот од бозел секогаш мириса на лето, без разлика дали го пиете студен на топол, летен ден или, пак, топол, во зима. И не е само пиењето: кога правите сок од бозел, треба да ги оставите цветовите и лимоните да отстојат во сад 24 часа, па така целата куќа пријатно мириса на летно хиге. Само еден здив и веднаш се враќаме во летата од нашето детство.
ЗА 2,5 ЛИТРИ ЛИМОНАДА ОД БОЗЕЛ
30 грстови бозел
3 големи лимони
1,5 литри вода
50 г лимонова киселина
1,5 кг шеќер
1. Грстовите ставете ги во голем длабок сад, по можност
да собира пет литри течност.
2. Под млаз топла вода, добро измијте ги лимоните и
исечкајте ги на тркалца, што потоа ќе ги додадете кон
бозелот во садот.
3. Зовријте ја водата и додадете лимонова киселина
и шеќер.
4. Истурете ја зовриената вода во садот во кој се наоѓаат
бозелот и тркалцата лимон.
5. Покријте го садот со капак и оставете ја лимонадата
да отстои три дена.
6. Процедете ја течноста и сипете ја во шишиња.
Чувајте во ладилник.
Вечерта спроти свети Јован Крстител се паѓа на 23 јуни и е вечер кога Данците ја прославуваат летната рамнодневица. Во Данска, сонцето во јуни заоѓа речиси во 23 часот, а ноќта никогаш не останува целосно без светлина. Додека сонцето заоѓа, има едно горчливо-слатко сознание дека, почнувајќи од следниот ден, полека почнуваат да потонуваат кон темнината, бидејќи деновите ќе стануваат пократки. Ова е совршена вечер за пикник. Организирајте се со пријателите и со семејството и направте логорски оган. (Огновите обично се палат релативно доцна поради светлината, па доколку во меѓувреме треба да ги занимавате децата, ова е одлична вечер за трка со јајце на лажица в рака.)
ЈУЛИ: ЛЕТЕН ПИКНИК
Во јули, Данците навистина сакаат да излезат надвор и да уживаат во природата. Времето е топло, а вечерите се уште долги. Ова е совршено време од годината за пикник покрај море, на ливада или во парк. Изберете што сакате, но секако излезете од градот. Поканете го семејството, пријателите, соседите или вашите нови, штотуку доселени соседи. Вечерите каде што секој носи по нешто за сите да јадат обично се похигелиг, зашто се порамноправни. Нивната суштина е да се сподели храната, но и одговорностите и работните задачи.
АВГУСТ: МЕТЕОРСКИ ДОЖД ПЕРСЕИДИ
Понесети си ќебиња за ноќ под ѕвездите. Светлите ноќи во овој дел од годината можеби не се најдобро време за гледање во ѕвездите, но метеорскиот дожд Персеиди се јавува во средината од август и обично најјасно се гледа некаде од 11 до 13 август. Североисточно на небото побарајте го соѕвездието Персеј, на чијшто исток е Андромеда, а на север Касиопеја. Ако имате деца, ова е одлична можност да понесете и книга со бајки од старогрчката митологија и да им читате додека чекаат да почне паѓањето ѕвезди. Жителите на јужната хемисфера можат да го гледаат метеорскиот дожд ЕТА Аквариди. Обично, врвот го достигнува од крајот на април до средината на мај.
СЕПТЕМВРИ: БЕРЕЊЕ ПЕЧУРКИ
Печурките се јавуваат главно наесен, но можат да се најдат и од крајот на летото. Нема подобар вкус од храната што самите сте ја одгледале, уловиле или набрале, има и висок фактор хиге. Повикајте го семејството и пријателите на излет за берба в шума.
ПРЕДУПРЕДУВАЊЕ: Јадењето погрешни видови печурки може да биде смртоносно и затоа најдете искусен берач на печурки што ќе го замолите да дојде со вас. Во многубројни локални заедници се организираат групни излети за берење печурки.
ОКТОМВРИ: КОСТЕНИ
Време за костени. Ако имате деца, земете ги во берба на костени и правете фигурички на животни од нив. За возрасните, купете костени што се јадат, со нож издлабете крст на шилестата страна и печете ги во рерна 200 Целзиусови степени околу 30 минути, додека лушпата не се отвори и додека внатрешноста не им омекне. Излупете ја тврдата надворешна лушпа и додадете малку путер и сол. Ако само сакате малку хиге време сами со себеси, земете неколку мандарини, печени костени и „Подвижна гозба“ од Хемингвеј (дејството на оваа книга се случува во Париз, во дваесеттите години на 20 век, кога Хемингвеј бил сиромашен писател).
НОЕМВРИ: ГОТВАРСКИ НАТПРЕВАР ВО ПРАВЕЊЕ СУПИ
Зимата наближува. Време е да ги извадите старите рецепти и да пронајдете нови. Поканете ги на гости семејството и пријателите, па направете готварски натпревар во правење супи. Секој од гостите со себе носи состојки за по една порција супа. Еден по еден приготвувајте мали порции различни супи, доволно за да проба секој. На пример, можете да приготвите супа од тиква и од ѓумбир, што навистина добро оди со малку павлака. Ако како домаќин/ка сакате да приготвите нешто дополнително, испечете домашен леб. Миризбата на свежо печен леб дефинитивно е хиге.
ДЕКЕМВРИ: ГЛОГ И КРОФНИЧКИ
Декември е годишно време на хиге. Потрошувачката на свеќи и на слатки расте, а растат и килограмите на вагата. Ова е најубавото време за глог (варено вино – рецептот можете да го најдете на интернет). Почнете особено порано: натопете го сувото грозје во порто и поканете ги на гости пријателите и семејството на ручек или вечера со глог и со крофнички (рецептот е, исто така, на интернет).
ТОП НОВОСТИ
