УБАВИНИТЕ НА ЦРНОГОРСКИОТ БРЕГ-МЕДИТЕРАНСКИОТ РАЈ НЕМА ДА ВЕ ОСТАВИ РАМНОДУШНИ

ПОСТОИ УБАВИНА ОД КОЈА ЧОВЕКОТ НЕ МОЖЕ НИКОГАШ ДА СЕ ЗАСИТИ ДОВОЛНО. ТАА Е ИСТА, А РАЗЛИЧНА. СЕКОЈПАТ БЛИСКА, А СЕПАК МИСТИЧНА И НЕДОСТИЖНА. РЕЛАКСИРА, ОДМОРА, МАМИ И ЗАВЕДУВА. ЧОВЕКОТ ПОСТОЈАНО ТРАГА ПО ТАКВА НЕДОПРЕНА ПРИРОДНА УБАВИНА. И АКО ИМА СРЕЌА – СЕКОГАШ ПОВТОРНО И УПОРНО Й СЕ ВРАЌА. ПОСЕТЕТЕ ГО ЦРНОГОРСКОТО КРАЈБРЕЖЈЕ И УЖИВАЈТЕ ВО ОВАА УБАВИНА И ВО ЗАДОВОЛСТВАТА ШТО ГИ НУДИ…

Градовите на црногорското крајбрежје сигурно ќе ве пленат со својот шарм, разновидност и медитерански мириси. Секој град е приказна за себе, од Улцињ (порано било пиратско место, а денес е туристички рај), Бар (град полн со историски споменици, со нов модерен центар, пристаниште, марина, хотели), Будва (од Буљарица преку Петровац и Свети Стефан, па до Јаза, ја претставува туристичката метропола на Црна Гора), преку Тиват (прекрасен и мирен град), Котор (кој е под заштита на УНЕСКО како културно и уметничко богатство), па до Херцег Нови (неодолив туристички град полн со зеленило, цвеќиња, скали и прекрасни историски градби). Никаде како на црногорскиот брег нема да видите поубаво зајдисонце, експлозија на бои и емоции, контрасти на планини и море. Туристите се воодушевуваат и од традиционалната кујна. Уживаат во познатата његошка пршута со маслинки и сирење, рибен гулаш, школки во сос од домати, магдонос, лук и кромид, јагне приготвено во млеко, варени домати со сирење и свеж крем, сушено овчо месо, свежа и пушена пастрмка од Скадарско Езеро и разни морски јадења.

Во секој град може да најдете ресторани со локална храна и специјалитети од риба, кафулиња со прекрасни тераси и одлични коктели, хотели со пријателски персонал и незаборавен поглед на море. Познати црногорски десерти се крофни со мед и суви смокви. Треба да се пробаат и локалните вина и пива, чиј добар квалитет й прилега на црногорската кујна. Дел од вината се домашен производ добиен од најубавото грозје.

УЛЦИЊ И БАР

Улцињ, најјужниот град на црногорскиот брег, е целосно ориентиран кон туризам поради природните потенцијали. Големата плажа, најдолгата песочна плажа на Јадранското Море, се протега на 13 км, Ада Бојана – единствен речен остров со прекрасни песочни плажи, Валданос – уникатен залив со стари маслинови дрвја, реставрираниот стар град со многубројни интересни ресторани, кафулиња, галерии и хотели… и многу други атрактивни места го прават Улцињ уникатен и привлечен за голем број туристи. Улцињ е град што мора да го запознаете. Бар е модерен град што постојано се шири. Иако е пристаништен град, воодушевува со чистотата и уредените зелени површини. Во неговата околина има голем број туристички атракции. Стариот Бар, тврдината на Хај Нехај, чии урнатини датираат од 15 век и замокот на кралот Никола се историски и културни споменици на градот. Тука е и дрвото на маслинката старо повеќе од 2.000 години. Скадарското Езеро е еден од најголемите резервати за птици, тука има и голем број манастири и цркви за посетителите што сакаат ваков вид туризам. Уредените плажи и заливи, како Чањ, Добра Вода, ќе ве натераат повторно да дојдете во Бар.

 

БУДВА

Метрополата на црногорскиот туризам располага со голем број прекрасни плажи и прекрасна архитектура. Будва, често опишувана како тивко и пријатно место, е стара околу 2.500 години. Веројатно таа е едно од најстарите населени места на брегот на Јадранското Море. Покрај многуте археолошки докази, многубројните пишани сведоштва укажуваат дека постои од 5 век пр.н.е. Една легенда кажува дека била создадена од Феникиецот Кадм и неговата жена Хармонија кои тука нашле засолниште. Стариот град е најголема атракција во Будва. Тоа е пенинсула со прави улици и стари градби изградени од камени ѕидови и мали цркви, плоштади и куќи. На ова место се слуша ехото од минатото. Остатокот од градот е модерен. Во него може да најдете повеќе ресторани и кафулиња каде што може да уживате во убавата атмосфера. Во текот на летните месеци тука е лоциран градскиот театар каде што се одржуваат голем број локални и странски изведби. Голема вредност на Будва е нејзиното културно и историско наследство со многубројните споменици, ископини, тврдини, манастири, цркви. Црквата Св. Тројство е најголем фаворит, богата со обоени камења и атрактивни артефакти. Св. Јован е најголема црква во градот иатира од 1828 година. Манастирот Подмаине се наоѓа на околу 2 км. Малиот храм на Пресвета Богородица е од 15 век, а црквата Св. Петка е изградена во 1747 година.

Внатрешноста на црквата е украсена со фрески насликани од Рафаил Димитриевиќ. Ентериерот го краси вреден иконостас окован со сребро. Манастирот е центар на црковни и културни случувања, а во минатото бил збирно место на племето Маине. Тоа што ги носи луѓето да ја посетат Будва и нејзината околина е дар на природата, неповторливата убавина на сонцето, морето и низа од бисерни плажи во подножјето на големите планини. Плажата Могрен е заштитен знак на Будва. Оправдано го носи епитетот скапоцен камен на црногорското крајбрежје. Цел ден може да се помине на златниот песок, пиејќи ладно кафе, пливајќи во бистрата вода или нуркајќи кај гребенот. До неа се стигнува преку тесна камена пешачка патека над која се издигнуваат карпи. Името го добила по шпанскиот морепловец Могрини, кој по бродоломот спас нашол тука. Тој изградил црква и му ја посветил на заштитникот св. Антун. Поради природните убавини и спојот на море, песок, карпи и медитеранско зеленило, многу е атрактивна и по летната сезона за шетање и риболов.

Околу Будва има голем број мали села што вреди да се посетат. Се карактеризираат со фантастична архитектура, тесни улички богати со цвеќиња, убави цркви и неверојатен поглед на море. На Будванската ривиера се наоѓаат 35 најпознати плажи на Јадранот (Јаз, Плоче, Трстено, Могрен, Словенска плажа, Бечичи, Милочер, Св. Стефан.

НАЈУБАВИОТ ЈАДРАНСКИ БИСЕР

Малиот рибарски остров, изграден во 15 век како засолниште на османлиските освојувачи, кој се користел како хотелски комплекс во 60-тите години, оправдано претставува најпозната црногорска туристичка атракција на Јадранот и денес е едно од најлуксузните летувалишта во Црна Гора и воопшто на Јадранското Море. Многу познати светски имиња од светот на филмот, музиката, дипломатијата, спортот и културата овде ги минуваат своите летни одмори.

Во Свети Стефан се наоѓаат и три мали цркви: Црквата на Свети Стефан, на Александар Невски и најмалата што е посветена на Преображение. Во непосредна близина на Свети Стефан се наоѓа Милочер, некогашна летна резиденција на кралското семејство Караѓорѓевиќ. Прекрасната плажа и одличната услуга, хотелите и вилите, големиот број ретки растенија гарантираат прекрасен одмор во овој рај. Тука е и Петровац, кој може да се пофали со најубавите плажи на Будванската ривиера, како што се Перазица До, Лучице, Света Недела и Буjaрица. Меѓу културно-историските споменици се мозаиците од третиот век и тврдината Кастело, изградена.

ХЕРЦЕГ НОВИ

Почнувајќи од познатото лековито место Игало, па сè до Мељине се протега прекрасната променада на Херцег Нови, во должина од 7 км, каде што се сместени голем број кафулиња и ресторани. Југословенскиот нобеловец Иво Андриќ го опишува Херцег Нови како град на вечно зеленило, сонце и променада. Со приближно 200 сончеви денови во годината, Херцег Нови е единствено место на Јадранот каде што сонцето најмалку ќе ви недостасува. Стариот град започнува од плоштадот Ѓурковиќ, исполнет со кафулиња и продавници, а преку скалите се пристигнува до главното обележје на градот, Саат Кулата, изградена во 1667 година од султанот Махмуд. Веднаш зад кулата, обиколена од прекрасните медитерански палми се наоѓа импозантната православна црква Св. Арханѓел Михаил изградена во римско-готски и ориентален стил. Тесните улици на стариот град водат до влезот на Морската тврдина, изградена меѓу XIV и XVII век. Повеќето хотели во Херцег Нови поседуваат приватни плажи. Препорачливо е да се посети и лековитата плажа што се наоѓа во Игало.

КОТОР И ТИВАТ

На средина на прекрасниот црногорски залив Бока Которска се наоѓа Котор, градот на трговци и морепловци, познат по карактеристичната средновековна архитектура, како и голем број културни и историски споменици (оправдано е вклучен во светското природно и културно наследство на УНЕСКО). Катедралата Св. Трифун, споменик на римската култура, е еден од најпрепознатливите симболи на градот. Градските ѕидини, кои се протегаат во должина од 4 км, почнале да ги градат венецијанските владетели во 1420 година, а завршени се 400 години подоцна. Трите градски порти водат во стариот град на Котор, најстарата е онаа на југ што е изградена во XIII век.

Главната градска порта, лоцирана на северниот дел, наречена Морска врата, е изградена во XVI век во ренесансен стил. Котор е познат по културните настани и фестивали што привлекуваат голем број посетители. За многумина Тиват е само транзитна точка бидејќи повеќето туристи пристигнуваат на тамошниот аеродром и оттука патуваат кон Херцег нови, Котор или Будва. Меѓутоа, неговата крајбрежна „променада“ со палми нуди единствено релаксирано туристичко доживување. Во средниот век Тиват бил локација каде што богатите староседелци на Котор ги граделе своите летни резиденции. Од Тиват најбрзо се доаѓа до најубавите плажи на Бока Которска: Жањице, Пржно и Лепетане. Долг е списокот на убавини што може да се видат на црногорскиот брег. Сигурно е дека овој медитерански рај нема да ве остави рамнодушни и оттаму ќе понесете прекрасни моменти за сеќавање.

Маргита Поповска