СО ДОЛЖИНА ОД СКОРО 1.000 КМ, ТУРСКАТА РИВИЕРА ПОЗНАТА КАКО „ТИРКИЗНО КРАЈМОРЈЕ“, БЛАГОДАРЕЈЌИ НА ПРИРОДНАТА ХАРМОНИЈА, ПРЕУБАВИТЕ ПЛАНИНСКИ ПРЕДЕЛИ, ПЛАЖИ, МОРЕТО, КЛИМАТА И 50-ТИНАТА ПОВЕЌЕ ИЛИ ПОМАЛКУ НАСЕЛЕНИ МЕСТА ЧИЈА БИТНА КАРАКТЕРИСТИКА Е ХОСПИТАЛИТЕТОТ, ЗАЕДНО СО БРОЈНИТЕ АРХЕОЛОШКИ ЛОКАЛИТЕТИ И ДРУГИ ЗАНИМЛИВОСТИ, СО ДЕЦЕНИИ Е ПРИВЛЕЧНА ЗА МНОГУ ЛЕТУВАЛЦИ ОД СИТЕ СТРАНИ НА СВЕТОТ, ВКЛУЧИТЕЛНО И ГРАЃАНИТЕ НА МАКЕДОНИЈА
Убавината на југозападното приморје во Турција (без оглед на фактот дека државата во 2022-ра и официјално го промени своето име во Туркије, мнозинството и натаму се служи со старото) е толку восхитувачка што поголемиот дел од туристите го посетуваат редовно, буквално секоја година во лето. Нивните препораки се добредојдени за останатите, кои се двоумат каде ќе го поминат годишниот одмор. Изборот навистина е голем, дури 50-тина туристички места ù припаѓаат на турската ривиера со должина од 620 милји (скоро 1.000 километри). Меѓу битните карактеристики на тамошните луѓе се вбројува и топлото гостопримство што е уште една причина за таму да летувате. Во хармонија со природата – планинските области, плажите, морската вода со синозелена, т.е. боја на тиркиз и поволната клима, нема простор за колебање. Овој пат ќе можете лесно да се решите.
ИЗВОНРЕДНА УБАВИНА, ИЗОБИЛСТВО МОЖНОСТИ
„Тиркизното крајморје“ ги опфаќа провинциите Анталија и Му(г) ла во целост и делови на Ајдан (Ајд’н), Измир (јужен) и Мерсин (западен), заедно со повеќе или помалку населените места, како на пример Аланија, Анталија, Белек, Бодрум, Дидим, Калкан, Каш, Кемер, Кушадаси, Мармарис, Сиде, Фетие, Чешме… Атрактивните места во нивната близина, археолошките локалитети и другите занимливости денес се неми сведоци на историските настани, процеси…, без исклучок на митовите, народните преданија за јунаците чии херојски дела се опишани во еповите, за светите луѓе, кралевите… Народните преданија велат дека Марк Антониј од античкиот Рим ја избрал турската ривиера за свадбен подарок на својата сакана, Клеопатра од Египет. Свети Никола, по кого е смислена и приказната за Дедо Мраз, се родил во Патара, близу до градот Демре (во сегашно време). А Херодот, пак, што се смета за татко на историјата е роден во древен Бодрум (некогашен Халикарнас, во 484-та пред новата ера). Од друга страна, се верува дека инспирацијата за т.н. химера, чудовиштето со лавовска глава, козјо тело и со змејовски екстремитети, кое фрла оган од устата, била пронајдена во вулканските кратери на планините блиску до Далјан, западно од Анталија.
Благодарејќи на авионскиот сообраќај, транспортот е олеснет. Летот за Истанбул трае час и половина. Се разбира, можете да одите и со возило (индивидуално, за повеќе лица). Оддалеченоста е 628 км, за што се потребни 9-12 саати. Растојанието меѓу најголемиот град во Турција и приморјето е 595 км (воздушно), односно 769 км по сувоземен пат, кој е и препорачлив. Мнозина се одлучуваат да патуваат со такси, воз или автобус. До ривиерата се стигнува за 9 и пол часа. Цената е од 2.500 до 3.200 лири (4.416-5.652 денари).
Долж Медитеранот (Средоземното Море), турската ривиера се одликува со раскош во поширока смисла извонредна убавина, изобилие. Антиките се забележливи насекаде, во верските и храмовите на културата, за кои може долго да се зборува. Сончевата светлина ги прави уште повеличествени, зраците во голема мера се одговорни за визуелните сензации, без исклучок на месечевата. Наместа се огледуваат во сонливото море, како што населението милува да го опише со еден збор. Велат дека симболиката на тиркизот, синозелената боја со која е обоена големата површина солена вода е повеќезначна, се поврзува со успехот и храброста, генерално. Другото е лична интерпретација. По свое видување на нештата, нивно доживување. Неколку повеќе или помалку населени места кои се наоѓаат покрај брегот со години, децении предничат пред останатите кога е туризмот во прашање, особено во лето. Затоа и сместувачките капацитети се структурирани така што можат да ги задоволат сите желби на гостите, согласно со нивните вкусови. Хотелите им припаѓаат на различни категории, вклучително и апартманите и камповите. Според тур-операторите, условите за кампување на турската ривиера се речиси совршени. Едноставно, таква е природата. Оттаму и неограниченоста на можностите. Освен во шатори, можете да се сместите и во мали, дрвени куќички.
ЗАЛЕЗ ШТО ГО ВОСХИТУВАЛ И АПОЛОН
Во близина на гратчињата Калкан и Каш во крајниот југозападен дел на провинцијата Анталија се наоѓа и Капуташ, плажата која ја има на сите постери кога се работи за рекламирање на оваа регија каде што туризмот е главната стопанска гранка со која се занимава месното население. И покрај тоа што е окружена со карпест терен во облик на латиничната буква V, содржи доста песок, и тоа ситен. Горе мине патот на чија банкина посетителите ги паркираат своите автомобили за веднаш да се спуштат по скалите. Живописноста е резултат и на самата локација, идеална за фотографирање. Во непосредна близина нема хотелски комплекси, освен бутик-хотелчиња.
Островот Кекова му припаѓа на истоимениот регион за кој се вели дека е премногу богат, има големи материјални блага. Заливите се приказна за себе, нешто посебно. Во просторната дистанца помеѓу него и самиот брег од 500 метри се наоѓаат и неколку историските знаменитости, како на пример Симена од каде што се гледа целиот северен дел на островот чии траги од цивилизацијата сведочат за општествениот развој и материјалната култура во минатото, некои од нив потопени во вода на длабочина од 4-5 м, а земјотресите ги разурнале и каменоломите чиј камен се користел за градење саркофази.
Древните легенди во голема мера се поврзани со градот Сиде. Пристанишниот кеј и натаму привлекува голем број туристи од сите страни на светот, датира уште од времето на античка Памфилија. Во Римското Царство бил седиште на епископијата, воедно и културен центар. Податоците говорат дека градот за првпат е населен во 7 век пр. н.е., Сиде всушност е најстарото големо населено место на полуостровот. Неговото име значи калинка. Различни се видувањата на градот, вклучувајќи ги и доживувањата на истиот. Многумина го врзуваат со храмовите во Атина, со Аполон. Како било, театарот е најголем на целото подрачје, а дел од самите колонади, сводови сè уште се во добра состојба. И поврзаноста со Александар Македонски воопшто не е случајна. Преданијата се пренесуваат од колено на колено, за да не се заборават. Но, летното време е совршено за уживање во сончевата топлина, додека се излежувате на жешкиот песок или пак се капете во (по)студените води на Медитеранот. И за испивање по една чаша освежителен пијалак со поглед на залезот, каде што и богот на сонцето, поезијата, музиката покровителот на уметноста, симболот на младешката убавина, безрезервно му се препуштал, и за прошетка по уличките со стари куќи, но и за шопинг во чаршијата.
Нема сомневање, Аланија е особено дарежлива кога се можностите во прашање, од секој аспект. Лулката на цивилизацијата, како што ја нарекуваат нејзините жители, денес е меркез, собиралиште на едриличарите отсекаде, учесници на регатите.
Заедно со нуркачите. Црвената кула и замокот побудуваат голем интерес, но не треба да се заобиколат ни пештерите Дамлаташ и Дим. Тоа што ја прави Аланија привлечна за младите луѓе секако е и ноќната забава, додека со Белек се врзува голфот. Гратчето важи за омилена дестинација меѓу играчите во текот на целата година. Тениски, фудбалски игралишта има на претек, и во склоп на затскриените одморалишта, неретко обраснати со дрвја на кои живеат бувови, и одвоени од нив. Без исклучок на спа-центрите. Плажите дури имаат и постојан епитет свилени, поради мекоста на песокот.
МОРСКИ БАС ЗА ВЕЧЕРА, СО БЕЛО ВИНО
Во подножјето на планината Тахтали се наоѓа малото населено место Кемер. Ужива големи симпатии кај странските туристи. Благодарение на системот „ол инклузив“, луксузните хотели се доста посетени, но не помалку ни бутик хотелчињата за кои секогаш се бара место повеќе, особено од страна на љубовните и брачните парови без деца. Романтичната природа, околината сигурно ќе ви се вреже во сеќавањето, заедно со авантурите, необичните доживувања како патувањето со брод, на пример. Генерално, атрактивноста на турската ривиера значително произлегува и од хармонијата на светото тројство морето, песокот и сонцето. Во комбинација на културните, историските знаменитости, нејзината убавина просто е неодолива. Се разбира, голем е влогот и на севкупната организираност случувањата, настаните, активностите. Анталија има сè што е потребно за туризам со придавката „врвен“, особено кога се работи за Перге, главниот град на античка Памфилија. Од неговата организираност не учи само Анадолија туку и цела Турција. Меѓународниот фестивал на операта и балетот се одржува во театарот Аспендос чија состојба е непроменета 2.000 година, изграден од Марк Аврелиј. Полниот капацитет му е 20.000 места за кои се чека во ред. И артефактите и остатоците од агората, бањите…, вклучително и зачуваниот строеж на коловозот, се дел од приказната за метрополата каде што се наоѓаат и портите за влез во минатото, да не се заборави. А тамошните луѓе, пак, заедно со професионалните готвачи се грижат за старите јадења да не губат од својот интензитет, надградувајќи ги повремено. Маслиновото масло им дава посебен шмек на морските риби, плодови. Свежиот зеленчук, овошје секогаш е присутно на трпезата. За вечера сигурно ќе ви препорачаат бас. Вообичаено се пече со лимон и сол, а како додаток се служи мезе. И бело вино од ендемските видови грозје.
ТОП НОВОСТИ
