Toyota Yaris 1.5 Hybrid Chic BiTon- Во вистинска насока

ЦЕЛОСНО НОВИОТ YARIS НАСТАПУВА СО МОДЕРЕН И ВПЕЧАТЛИВ ЕКСТЕРИЕР, МАКСИМАЛНО ПРЕЦИЗНО СКРОЕН ЕНТЕРИЕР И, СЕКАКО, ХИБРИДЕН ПОГОН СО ЗАБАВЕН КАРАКТЕР ШТО МУ ДАВА ГОЛЕМА ПРЕДНОСТ ВО ОДНОС НА КОНКУРЕНТИТЕ.

Првата генерација на Toyota Yaris дебитираше во 1999 година со задача да го замени моделот Starlet. Новиот концепт имаше модерен дизајн, стилски ентериер, исклучителна практичност и забавна природа. Квалитетите што ги поседуваше му ја донесоа и наградата за Автомобил на годината за 2000 година во Европа. Во следните две децении пристигнуваа нови изведби, втората генерација на моделот додаде зрелост, а во третата првпат е воведен хибриден погон.

Но како што минуваа годините, така дизајнот почна да бледнее, секоја нова генерација постепено стануваше сè помалку иновативна од онаа што ја заменуваше. Купувачите продолжија да го бараат не затоа што беше возбудливо обликуван, туку поради традиционалните предности што ги има марката. Во меѓувреме Toyota доби нов шеф, Акио Тојода, кој јасно кажа дека компанијата ќе го смени својот став и дека повеќе нема да произведува здодевни автомобили. Неговите зборови преточени во реалност целосно се рефлектираа во новата четврта генерација на Yaris.

НОВ ДИЗАЈНЕРСКИ ПРИСТАП

Моделот Yaris во новата инкарнација на некој начин по своите димензии е најблиску до првата генерација. Габаритите на надворешноста се намалени, висината е спуштена за неколку сантиметри, севкупната должина е задржана под границата од четири метри, а меѓуоскиното растојание е зголемено и со тоа е обезбедено повеќе простор во кабината. Зашилениот остар нос, големиот отвор за воздух, делот предвиден за поставување на регистарска табличка изведен во специфичен дезен, како и внатрешноста на предните светлосни групи што го следат истиот терк се елементите што му даваат спортска нишка на предниот дел. Профилот, особено во двобојна верзија, како што е тестираниот примерок, го прави трендовски соодветен.

Како дополнување на предниот дел доаѓаат мускулестите набабрувања над тркалата, спуштената линија на покривот и високо поставениот спојлер. Со задниот дел доминираат изразените светлоснисостави поврзани со црна пластика што изгледа како втор, пониско поставен спојлер. На крајот од долниот дел е обликот на задниот браник што личи на дифузор, како што се употребува кај спортските модели.

Заклучокот е дека со новиот пристап на креирање и малите возила на марката може да изгледаат многу впечатливо и пријатно за око, со што соодветно ќе можат да им парираат на европските конкуренти што до неодамна важеа за дизајнерски посупериорни во тој поглед.

ВНАТРЕШНОСТ ШТО МУ ПРИЛЕГА

Штом стапнавме во внатрешноста на Yaris забележавме дека при конструирањето на кабината многу се внимавало и дека поврзаноста со надворешноста игра голема улога. Предните седишта се поставени спортски ниско, имаат добра седечка површина и солидна странична потпора. Користена е модерна ткаенина за обвивка на вратите, меката компонента е присутна над предниот дел, а остатокот од кабината е изведен во пластика што, во зависност од поставеноста, има вообичаена структура или е направена во висок сјај. Сè изгледа повеќе од солидно и, се разбира, сè е беспрекорно добро составено.

Пристапот до задните седиште изгледа тесен, но штом ќе се влезе се забележува дека на задната клупа има пристоен простор каде што две возрасни лица може да се сместат без никаков проблем благодарејќи на меѓуоскиното растојание од 2.560 мм. Патниците на располагање имаат доволно простор за стапалата и колената, а главата нема да им допира на покривот ако се пониски од 190 см. Багажниот простор е во долниот дел од класата со зафатнина од 286 литри, но правилниот облик и неговата длабочина дозволуваат да собере повеќе отколку што изгледа на прв поглед. Напредната технологија во кабината е застапена преку инфо забавниот систем со 8-инчен екран чувствителен на допир што наедно е задолжен за комуницирање со мобилните телефони што ги користат платформите на Apple и Android и други модерни ситници што се дел од денешното стандардно опкружување.

ХИБРИД СО ЗАБАВНА ПРИРОДA

Моделот Yaris нуди неколку моторни опции, а најинтересна од сите е токму хибридната. Значи, штом е хибрид, автоматскиот менувач (е-CVT) е стандард и споен е со нов 1,5-литарски трицилиндричен мотор што по традиција во Toyota работи по Аткинсонов циклус и користитехнологија што обезбедува значително поголема ефикасност од обичен бензински мотор. Исто така, новиот систем е од четвртата генерација, користи нова и помоќна литиум-јонска батерија. Бензинецот располага со 92 КС и максимална влечна сила од 120 Нм при 3.600-4.800 врт./мин., а електромоторот испорачува 80 КС и 141 Нм и по комплицирана пресметка овој хибриден состав заемно произведува системска моќност еднаква на 116 КС. На располагање се три начини на работа и тоа: EV, Eco и Power.

Режимот EV се обидува да го задржи автомобилот колку што е можно подолго користејќи само електрична енергија. Начинот Eco е насочен кон максимална штедливост, а моделот Power ја користи максималната моќ од двата система со цел да се постигнат колку што е можно подобри перформанси. Постигнувањата од 9,7 секунди до 100 км/ч и максимални 175 км/ч се во корист на Yaris затоа што за време на нашето дружење бевме во средина на декларираниот просек, постигнавме просечна потрошувачка од 4,5 литри на 100 км, а притоа не бевме нежни со педалот за забрзување.

Релативно малата тежина, ниско поставениот центар на гравитација и софистицираната архитектура прават новиот Yaris да се чувствува како автомобил со многу робустен интегритет што тешко се исфрла од зацртаната линија. Градскиот сообраќаен хаос е на негова природна територија, хибридниот систем работи беспрекорно и од возачот не бара големи залагања. Во меѓувреме, при брзина на автопатот изгледа цврсто поставен и стабилен и тоа влева дополнителна доверба кај возачот кога се патува и со поголема брзина.

Новиот Yaris Hybrid успешно се враќа во игра, повторно има комбинација што добива, поседува повеќе квалитетни атрибути што се потребни за директна пресметка со досегашните лидери во сегментот.

ТЕХНИЧКИ КАРАКТЕРИСТИКИ

Данчо Здравковски