Излегуваат на мегдан преголемата Тојота, малиот но лут Даихатсу, и секогаш упорниот Сузуки не да одат во битка еден против друг, туку да ги здружат силите и така заеднички да направат мал спортски автомобил од рангот на нивниот сосед Мазда со успешниот „м икс 5“.
Даихатсу порано го имаше двоседот наречен „капучино“ и не беше мал, туку многу мал (микро), а Тојота го имаше моделот „мр 2“. Сузуки уште во 1995 година го имаше моделот „икс – 90“, првото „сув“ купе двосед правено на основа од „витарата“. Ова здружување значи помалку трошоци за развој и поголема заработка. Тојота влегува со платформа, Сузуки со мотор – 1,0 л со три цилиндри и силина од 120 до 150 КС, а експертот за мали автомобили Даихатсу влегува со своето децениско искуство стекнато при создавање исклучиво мали автомобили. И секако умерената хибридна технологија нема да биде испуштена, а подоцна можно е целосно електрифицирање. Пред скоро една година Тојота претстави концепт што го носеше името од серискиот во пензија „мр 2“, дали е тоа тој модел?
За овој потфат на трите споменати производители веќе е пишувано на крајот од 2021 година, а потоа лани летото. Сега повторно се актуализира темата, но податоците од пред две години со сегашниве се слични, нема ништо ново. Малку е чудно што светов три пати пишува за една иста работа во период од две години. Како што велат, малото спортско купе ќе започне со продажба во 2025. Ќе има централно сместен мотор, погон на задните тркала и тарга изведба, а тежината ќе биде во духот на спортските автомобили, само 1000 кг, како што е редот, зарем не!? И цената е спомената, над 20.000 долари, но под 25.000. Уште цели две години нѐ делат од 2025, а потоа ќе видиме што ова трио ќе претстави.
ТОП НОВОСТИ
