Очигледно некој ја научил лекцијата во изминативе пет и повеќе децении. Зборуваме за Турција која произведува автомобили повеќе од половина век, но до пред неколку години немаше своја марка автомобили. На годинашниот саем ЦЕС што се одржува во јануари во Лас Вегас, Тог приреди светска премиера на лимузина со пет врати „т 10 ф“. Лифтбек или фастбек, најверојатно е ова второво бидејќи изведбата со погон на сите тркала има точно 430 КС, што е повеќе од доволно за едно семејно возило. Од 0 до 100 км/ч забрзува за 4,6 сек и изминува 530 км со едно полнење на батеријата. Моделите со погон само на задната оска можат да изминат 350, односно 600 км, а сето тоа зависи од батеријата и силината на погонската единица. Батериите од сите три изведби од моделот „т 10 ф“ се полнат за исто време, само 28 мин. од 20 до 80 отсто. Цената сѐ уште не се спомнува, но затоа е обелоденет дел од планот за иднината на Тог кој вели дека до крајот на 2030 ќе произведе еден милион возила, а гамата ќе биде составена од пет модели.
Ова е втор модел во семејството Тог, а првиот, „т 10 икс“ започна со сериско производство во 2022 год. – класична лимузина на електричен погон. Новиот член во гамата, исто така, е целосно електрифициран и според официјалните извори, тежи помеѓу 1.940 и 2.215 кг во зависност од изведбата и опремата.
ТОП НОВОСТИ
